¹ Uwene ahepa ukufuma kula nu kwinza mu nkaya yakwe, pe ava sundikwa vakwe vahamulandata. ² Lwe ilya sabata lyinzle, uwene ahavamanyisyaga mwi sinagogi. Avantu avinji vivuye pe avene vasukumiye. Vatili, ''Avyazile kwi ivimanyisyo vinivi?'' ''Njele vuli zinizi zye zipezilwe ku kwakwe?'' ''Mafindango vuli ganaga ge akuvomba ni nyove zyakwe?'' ³ Vuzye uno te mupala matabwa, umwana uwa Maliya uwamwavo uwa Yakovo nu Yosesi nu Yuda nu Simoni? Te vayemba vakwe ve tuli navo panapa?'' Pe avene vahapunula ni zya Yesu. ⁴ Pe uYesu ahavavuzya ahati, ''Umukuvwi atakushindamaga mweka munkaya yakwe, naku vajenzi vakwe nava mu nyumba yakwe.'' ⁵ Atali wakuvomba yimo imbombo iya maha, kweka ukuvaviha inyove avantu ve vavinile vansi nu kuvapozya. ⁶ Pe uwene asukumiye pa mulandu uwa kusita kusuvila kwavo. Pe ahavala mutwaya tonti twe twazyunguliye ukuvamanyisya. ⁷ Pe uwene ahavita 12 nu kwanda ukuvatuma vavili vavili, nu kuvapa uvulamulili uvwa kuzipotela impepo inkandamanu, ⁸ nu kuvalajizya ukuti vatahasende nashimo isha kujenda nasho pa vulendo vwavo, yeka ye ndisa - pamo umukate, pamo ifuku, na zye ndalama mu malamba ginyu - ⁹ Loli muzwale insapato, pe mutahazwale inkanzu zivili. ¹⁰ Uwene ahayanga ku kwavo, ''lwe imwe mwinjila mu nyumba, muhihale mumo ukufiha pe mulifumaga mumo. ¹¹ Nanti inkaya ye yitinza yavaposhela nu kuvatejelezya imwe, lwe mukufuma muvuzilo uvo, muhakunyunte ulusuto ukufuma ku vinama vyinyu ukuva lusimishizyo ku kwavo.'' ¹² Avene vahafuma vahajenda ukulumbilila izya lupinduho ku vantu. ¹³ Pe vahapilila impepo inkandamanu inyinji, nukuvapahazya amafuta avavinu avinji nu kuvapozya. ¹⁴ Umwene u Herodi ahazivwa zinizi, she izina ilya Yesu lihinza lyamanyikwa ahinza. Vamo vahayangaga, ''UYohani we ahozyaga azyusile kuvafwe, we mulandu amaha aga mafindango gakuvombaga mu mwakwe.'' ¹⁵ Vamo avinji vahati, ''Angavanga wu Eliya.'' Vope avanji vahati, ''uwene mukuvwi, ngati woka mu vakuvwi ava havalilo aha hali.'' ¹⁶ Lwe uHerodi ayivuye zinizi uwene ahati, ''UYohani, we nkamudumula itwe, angavanga azyusile.'' ¹⁷ Pe uHerodi ahatuma avakumulema uYohani pe vahamwigalila mujela pa mulandju uwa Herodiya ( umuha wamwavo umushi uwa Filipi), mulandu uwene amusenzite. ¹⁸ Pe uYohani ahamuvuzya uHerodi, ''Zitakwitishizilwa iwe ukuva nuwaha wamwinyu.'' ¹⁹ Nkandi uHerodiya ahamuhalalila pe ahanzaga ukumugoga uwene, loli ahapotwa, ²⁰ Pakuti uHerodi ahamunyilaga uYohani; amumanyile ukuti muntu mugolosu nu mufinjile, pe ahamusungaga ahinza. ukumutejelezya wuyo kuhamuhalazya nkanki, nashe amutejelezizye nuluseshelo. ²¹ Pe lihinza isiku ilyinza lwe u Herodi ahaseshelelaga impapwa yakwe uwene avasenganizizye ishakulya isha hamazuva avasongo vakwe na valwa vulugu na valongozi ava mu-Galileya. ²² Umwana umulindi uwa Herodiya ahinza mumo ahavimbila, ahamuseshelezya nu Herodi navashakulya shahamazuva. Umwene ahayanga kumulindu, ''unduve shonti she ukwanza nine nandi inkupe.'' ²³ Ahamulapila kuvuyanzi vwakwe, ''shonti she walava ndikupa , ukufiha pakasi ukwa vumwene vwakwe.'' ²⁴ Uwene ahafuma kunzi ahayanga kwa nyina ahati, ''Indave shoni kukwakwe?'' uwene ahati, ''Itwe ilya Yohani Umozyi.'' ²⁵ Mwaluvilo ahashimbila ukugalushila kwe kwali umwene, ahalava, ahayanga, ''nkwanza iwe umpe, ine shinishiatwe lya Yohani we ahozyaga musahani yikwi.'' ²⁶ Pe uwene ahaswimililwa nkani, ahapotwa nukumuhanila zye amulavile pakuti afinzile napa shifukwa shashakulya shavajeni ve avisite. ²⁷ umwene ahamutuma umusilikali ukufuma pe ayimiliye ahamulamulila ukuleta itwe lya Yohani. ²⁸ Ahaleta itwe lyakwe musahani yikwi ahamupa umulindu, wope umulinduahamupa unyina wakwe. ²⁹ Ilelo lwe avasundikwa vivuye zinizi, vahinza ukusenda umuvili wakwe vahamuviha mumbipa. ³⁰ Pe avapositili vahinza vavungana poka nu Yesu vahamuvuzya zyoti zye vavomvile nazye vahamanyisya. ³¹ Pe ahayanga navo, ''Mufume mwemwe mwekanukwinjila muvuzilo uvwa kwikwilu mutuzye ahavalilo hansi.'' She avinji vahinzaga nukujenda, vatali nahavalilo ahakulyela. ³² Pe vahalamba muvwato vahavala kuvuzilo uvwa kukwilu ulya vavo veka. ³³ nkandi avinji vahavenya lye vakwela pe vahavamanya,pe vahashimbilila ukufuma munkaya zyonti, ukuvala ukufiha kuko kwe vali lwe vashili avene. ³⁴ Lwe afiha kushipuma ahenya impuga impiti ya vantu. Pe ahavivwila uvwila she vali fwe ng'onzi zye zite numudimi. Pe ahanda ukuvasambilizya ivintu ivyinji. ³⁵ Lwe ahavalilo hajenda, ava sundikwa vakwe vahinza vahati, ''Umu mwe mulugwa hope ahavalalizyo hajenzite hali. ³⁶ Uvavwezye ukuti vavale kunsi zyamwavo namunkaya zyavo zye vapalamine nazyo ukuti vakale ivyakulya vyavo.'' ³⁷ Umwene ahamula ahati, ''Mwenemwe muvapanje vimo ivyakulya.'' Avene vahati, ''Tungavala tuvakalile ivyakulya kwa 200 dinali, ye yikukwila amakate nukuvapa vavo valyanje?'' ³⁸ Uwene ahavavuzya, ''Muli n amakate galinga? valaga mwenye.'' Lwevenyizye vahagaga amakate 5 ninswi zivili. ³⁹ Ahavavuzya avantu vonti tendamipansi mumpuga pa mulemvi wisole. ⁴⁰ Pe vahatendama pansi mumpuga 100 na 50. ⁴¹ Ahasenda amakate 5 ninswi zivili, pe ahenya kumwanya ahavisaya pe ahamensula amakate nukuvapa ava sundikwa ukuti vapanje avantu. Hasvili ahagavania inswi zivili kuvavo vonti. ⁴² Vahalya mpaka pe vikuta. ⁴³ Vahavunganiha amakate gonti ge vamensuye, ukwizula iviseje 12, nutusyi utumenyunanie. ⁴⁴ Vali avantu 5,000 vevaliye amakate. ⁴⁵ Mwaluvilo ahavavuzya ava sundikwa vakwe ukuti vazuve muvwato ukulongolela kuntanzi nukulamba ukuvala kwisyila lya Besayida, lwe ayivwezya impuga. ⁴⁶ Ilelo lwe alehana navo, ahazuva pigamba pakuputa. ⁴⁷ Uvusiku vuhafiha, pe uvwato vwali pakasi pa sumbi, uwene ali weka kwisyila lila. ⁴⁸ Pe ahenya vakulimbana ninkungu pa sumbi, she inkungu yihatutaga. Kumasho ga vusiku lwe afiha kuvavo, ahajendaga pa sumbi pe ahanzaga ukuvapitilila. ⁴⁹ Lwe vamuvonyi akujenda pa sumbi, vahasiva ukuti shizyuha pe vahakuta. ⁵⁰ mlandu lwe vamwenya zihavatamya. Mwaluvilo ahayanga navo ahati, ''simujimbaje! Nene! Mutahanyile!'' ⁵¹ Ahatendama mu vwato poka navo, pe inkungu yihapuma pe zihavasukumizya nkani. ⁵² Nkandi vatahazyaganiaga she amakate gahasulaga. MUlandu, vagomizye amoyo gavo. ⁵³ Ilelo lye valamvile, pe vahavala ukufiha munsi yamu Genesareti kwe vahejeha umwato kushipuma. ⁵⁴ Ilelo lwe afumile mu vwato, a antu vahamumanya mwaluvilo, ⁵⁵ vahashimbila ukuzyungulila mwe ivigava vwavo vyavaliye pe vahavaleta avavinu pavitala vyavo kuli kontki kwe amile. ⁵⁶ Mwonti mwe ahinjilaga mutwaya, munkaya, na munsi, vahavavihaga avavinu kuvuzilo vwa kukazizya. Vahamalaga ukuti valeme inkanzu yakwe kunsongo, vonti ve vahalemaga vahapolaga.