¹ Avene vahinza ku luvazu ulunji ulwa sumbi, ku shigavo isha Gelaseni. ² Lwe uYesu akufuma mwi voti, umwaluvilo kula ahinza umuntu ukufuma ku mbipa we mpepo inyazu. ³ Umuntu wula ahihalaga ku mbipa. Atalipo nawumo uwa kumukunga, nage manyololo vwelele. ⁴ Uwene mutuvalilo utwinji vahamupinyaga ni mpingwi na manyololo. Uwene ahadumulaniaga amanyololo ni impingwi zyakwe. Atalipo nawumo we ali namaha aga kumupotela. ⁵ Uvusiku vonti nu musanya ahalindaga ku mbipa namu magamba, ahaholelaga nu kuyivola weka na mavwe amahozu. ⁶ Lwe uwene amwenya uYesu pavutali, ahashimbilila ku kwakwe nu kusugamila pansi pilongolela lyakwe. ⁷ Uwene ahaholela kwi zwi ipiti, ''Buzye ine ndinishoni ishakuvomba niwe, Yesu, mwana uwa Mulungu umulusyi? Ine nkukulava iwe mwa Mulungu wuyo weka, atahanjimvye ine.'' ⁸ She uwene ahayangaga ku kwakwe, ''Fuma mu muntu, we mpepo inkandamanu.'' ⁹ Uwene ahamuvuzilizya wuyo, ''Buzye izina lyaho we wenu?'' Uwene ahamwamula, ''Izina lyane ne mphuga, she iswe swe vinji.'' ¹⁰ Uwene ahamulambilizya havili havili uYesu ukuti atahazishimbizizye kunzi ku shigavo. ¹¹ Ilelo pali idimilo ipiti ilya nguluve lyali kula lihalyanga mu hagamba , ¹² pe izyene zihamulava zihati, ''Tutumaje iswe mu nguluve; leha iswe tuzyinjile zyenezyo.'' ¹³ Pe uwene ahazyitishizya; Impepo inyazu zihinza zyafuma nu kwinjila mu nguluvu, pe izyene zihashimbila ukwiha ku lwiha ulwa hagamba nu kwinjila mwa sumbi, pe inguluve ukupalamila 2,000 zihadwiva mwa sumbi. ¹⁴ Pe vala ve vahalisyaga inguluve vahashimbila nu kuyanga zyonti zye zivomvilwe mu nkaya na muluvazu ulwa nsi, pe avantu vahavala ukwenya zye zivomvilwe. ¹⁵ Lwe avene vinzile kwa Yesu pe vahamwenya umuntu we amile ni mpepo inkandamanu, we ayizuye ni mpepo iya mpuga, ayihaye pepala, azwaye havili ali ni nsivo zyakwe ingolosu; pe avene vamunyizile. ¹⁶ Vala vonti ve venyizye zye zyavomvilwe ku muntu uwa mpepo - inkandamanu vahavabuzya avene umwa kuzilingania ahinza, havilinye avene vavavuzizye nizya nguluve. ¹⁷ Pe avene vanzite ukumulava ukuti ayepe mu shigavo shavo. ¹⁸ Lwe uwene akuzuva mwi voti, umuntu uwa mpepo - inkandamanu ahamulava ukuti avanje nawo. ¹⁹ Loli u Yesu atahamwitishizya uwene, loli ahati ku kwakwe, ''Valaga ku nyumba yaho na ku vantu vaho uvavuzye zye u Mwene akuvombeye iwe, havili nashe uwene akwenyezizye uvwila iwe.'' ²⁰ Pe uwene ahepa nu kuvala mu Dekapoli ukukumusya ivintu ivipiti vye uYesu amuvombeye, pe vonti vasukumiye. ²¹ Ilelo lwe u Yesu alamvile havili ku luvazu ulunji mwi voti, impuga impiti yavungine ukumuzyungulila wuyo, lye ali kuluvazu ulwa sumbi. ²² Pe woka usongo uwa mwi sinagogi we izina wu Yayilo ahinza, pe lwe amwenya uwene, ahagwa mu vinama vyakwe. ²³ Uwene ahalambilizya nkani, ahati, ''Umwana wane umulindu ali papipi ukufwa. Ine nkukulava, winze umuvishe inyove zyaho papakwe ukuti uwene angava ahinza nukuva mupuma.'' ²⁴ Pe uwene ahajenda nawo, ni impuga impiti yihamulandata uku yikututana mupipi ukumuzyungulila wuyo. ²⁵ Ilelo pe pamile umwantanda wumo we ahatonyanga ivanda ku maha 12. ²⁶ Uwene ayimvile nkani ku vaganga ve vinji ahataga ivintu vye vyinji vye ali navyo, loli mu vuzilo vwakwe uvwa kuva ahinza uwene ahajindelela ukuvina. ²⁷ Lwe uwene ayivuye ipangwi ilya Yesu, ahinza kunsizi iyakwe mu mpuga nu kumupalamansya amwenda wakwe. ²⁸ She uwene atili, ''Inga ine ningapalamansya ge menda gakwe vwelele, ndipola.'' ²⁹ Lwe uwene amupalamansizye wuyo, ivanda lyalesile ukutonya, pe uwene ahayivwa mumuvili wakwe ukuti apozile ukufuma ku vuvavu vwakwe. ³⁰ Uyesu umwaluvilo ahazimanyinsania wuyo weka ukuti amaha gefile ukufuma mu mwakwe. Uwene ahagalunkana nu kuzyungulila impuga pe ahati, ''Wuwenu apalamansya amenda gane?'' ³¹ Avasundikwa vakwe vahati ku kwakwe, '' Yenya impuga ino she yititinkine ukukuzyungulila iwe, pe iwe ukuti, Wuwenu ampalamansya ine?'' ³² Loli u Yesu ahenyelezya ukuti ayenye we avomba zinizi. ³³ U mwantanda, ukuzimanyinsania zye zyavovilwe ku kwakwe, ahogopa nu kutetema. Uwene ahinza nu kusugamila pilongolela lyakwe pe ahamuvuzya uvwa nalyoli vonti. ³⁴ Uwene ahati ku kwakwe, ''Mulindu, ulwitiho lwaho lwakupelela iwe ukuva ahinza. Jendaga nu mutende havili upolaje ukufuma ku vuvavu vwaho.'' ³⁵ Lwe uwene ashili akuyanga, vamo avantu vahinza ukufuma kwa mulongozi uwi sinagogi, vahati, ''Umwana waho umulindu afuye. Shoni she ushili ukumutamya umu manyisi?" ³⁶ Lwe uYesu ayivwa nkani amazwi ge vayanzile, ahati kwa mulongozi uwi sinagogi, ''Utahogope. Suvila vwelele.'' ³⁷ Uwene atahamwitishizya nawumo umuntu ukuyisangania nawo weka u Peteli, nu Yakovo, nu Yohani, umukulu uwa Yakovo. ³⁸ Avene vahinza kunyumba iya mulongozi uwi sinagogi, pe uwene kula ahenya avantu vakuzuma nkani ishongo; avene vahalilaga nukuyilumbusya nkani . ³⁹ Lwe uwene ayinjiye mu nyumba, ahati ku kwavo, ''Shoni she musungime havili shoni she mukulila? Umwana atafuye loli asyupiliye.'' ⁴⁰ Avene vahamuseshela. Loli avafumizye vonti kunzi pe ahamusenda uyise uwa mwana nu nyina na vala ve vali poka navo, pe vahinjila kwe kwali umwana. ⁴¹ Pe ahasenda inyove ya mulindu nukuyanga nawo ukuti, ''Talitha, kumi!'' kwe kuti, ''We halindu, nkukuvuzya, nyamuha.'' ⁴² Mwaluvilo ahalindu hahanyamuha nukujenda (pakuti hali na maha gakupapwa 12). Mwe pe vahatetema nu kusukumila nkani. ⁴³ Uwene ahavahomeleshezya nkani ukuti nawumo we azimanye zinizi. Ishi pe ahavavuzya ukutivamupanje shimo ishakulya alye.