¹ Ahavalilo hanzanchi nkani, avashiputo avapiti na vasunga shivanza na vasimbi na vonti avasongo vashiyuda. Pe vahamukunga uYesu nukumulongolezya nukumulemeha u Pilati. ² Pe u Pilati ahamuvuzilizya, ''Vati we mwene wava Yuda?'' Ahamwamula ahati, ''Mwe wayanjila wewe'' ³ Pe avashiputo avapiti vahamulonjelela utuntu twe twinji. ⁴ Pe u Pilati havili ahamuvuzilizya, ''Utakwamula nashimo? Yenya she vakukulonjelela ivintu vye vyinji!'' ⁵ Pope uYesu atahamwamula havili u Pilati, pe ishi shihamukumizya. ⁶ Ishi pahavalilo hapaluseshelo lwa pasa, u Pilati shima ahasatulaga umukungwa woka, we vamulava, ⁷ pe pali umukungwa we ahitwaga Baraba ali poka nava shigaluka vevalinumulandu wa kugoga. ⁸ Impuga yihinza kwa Pilati nu kwanda ukumulava ukuti avombe inza she ahavombaga mwisinda. ⁹ U Pilati ahavamula ahati, ''mukwanza ine imbasatulile umwene wava Yuda?'' ¹⁰ Pakuti amanyile ukuti mulandu wa vuzuva we mulandu uyo avashiputo avapiti vahamutwala uYesu kuli wuyo. ¹¹ Loli avashiputo avapiti vavapiye hali inkama nzila avantu, vatili muhatinji; utusatulile u Baraba. ¹² U Pilati ahavamula havili ahati, ''Pe imbombe shoni nu mwene wava Yuda?'' ¹³ Pe vahahola havili, ''muhomele.'' ¹⁴ U PIlati ahayanga kuli vavo, ''Avomvile shoni ishivivi?'' Pe loli avene vahonjezya ukuhola nkani, ''Umuhomele pashihove nkanyo.'' ¹⁵ U Pilati ahanzaga ukuhovosya impuga, pe ahavasatulila u Baraba. Pe ahamuhoma u Yesu nu kumulemeha kuli vavo ukuti ahomelwaje. ¹⁶ Pe avasilikali vahavala nawo kuluvungana lwi lonjelwe lwe lwali munyumba ya valonzi pe vahitizya impuga yonti ya vasilikali. ¹⁷ Pe hahamuzwiha inkanzu inchemamu vahatavi nishipambwi shamimva vahamuzyiha. ¹⁸ Vahanda ukumulamuha vahati, ''Tukukulamuha we mwene wava Yuda?'' ¹⁹ Vahamuhoma nitete pitwe nu kumuswilila amati, vahamusugamila, vahamushindiha. ²⁰ Ilelo lwe vavovezizye, vahamusenda nukumuzula inkanzu inchemamu nu kumuzyiha amenda gakwe, pe nukumutwala ukuhomelwa. ²¹ Umuntu wumo u Simoni waku Keleni, (uyise wa Alekezanda nu Lufasi), vahamushinjilizya amunyatuliye ishihovenkanyo shakwe. ²² Avasilikali vahamuleta uYesu pa vuzilo vwe vukwitwa Goligota (lye likuti ²³ ''Pepalupanga'').Pe vahamupa ipele lye vasanginie nu mila, lole atahang'wela. ²⁴ Vahamuhomela nu kugavana amenda gakwe lwe vakwiliha ishili, ukuvonesya mwe umusilikali angasendela. ²⁵ Hali havalilo ha vutatu pe vahamuhomelaga. ²⁶ Pamwanya vasimvile isimbo lyakumulonga, ''Umwene wava Yuda.'' ²⁷ Nawope vamuhomeleye navapuma vintu vavili, weka kunyove indilo uwamwavo kunyove imongo. ²⁸ Pe amasimbo gahakwanilisiwa ge gakuti, ''Vamuvelenjeye na vatalamalandu.'' ²⁹ Ilelo vonti ve vahajendaga papo vahamusamulaga, nu kukuyinzya amatwe gavo, vahatinji, ''Aha! we umanyile ukumongola itempeli nu kuzenga amasiku katatu, ³⁰ yiposhe wemwenesho uyise pansi ufume pa shihovenkanyo!'' ³¹ Vope avashiputo avapitinava simbi vwevulo vahamusamula vahati, ''Ahapohaga avanji, loli atangayipoha weka. ³² Muleshe uChilisiti, uMwene wa Yisilayeli, ayishe leloukjufuma pashihovenkanyo, kwekuti naswe twenye nukwitiha'' vope nava vevahomelilwe nawo poka vope vaha mupepusya. ³³ Paha valilo havu 6, ishisi shihagwa insi yonti mpaka pa havalilo havu 9. ³⁴ Pahavalilo havu 9, uYesu ahakuta nizwi ipiti ahati, ''Eloyi, Eloyi, lama sabakatani?'' lye likuti, ''we Mulungu wane we Mulungu wane, wandeshela shoni ine?'' ³⁵ Vamo vevimiliye papo vahivwa vahivwa amazyi gakwe vahati, ''Yen ya , akumwita u Eliya.'' ³⁶ Wumo pe ahashimbilila, luvilo luvilo ahasenda ahenda nu kudwiviha mwipele ihali, nukuviha kuhatete, nukumupa ukuti ang'wele. Pe umuntu ahati, ''Leha twenye nanti u Eliya anginza amwisye.'' ³⁷ Pe uYesu ahakuta izyi ipiti nu kufwa. ³⁸ Umwenda wa kutempeli wu halepuha pavili ukufuma pamwanya mpaka pansi ³⁹ Lwe umusilikali we ayimiliye nukwenya nu kwernyanya nu Yesu ayenya ukuti afwa mwidala ili, ahati, ''Nalyoli umuntu uno amile mwana wa Mulungu.'' ⁴⁰ Pali papo navantanda vevahenyaga pavutali. mulivavo pali u Maliya Umagadala, Umaliya (unyina wa yakovo umunsi nu Yosesi) nu Salome. ⁴¹ Lwe ali mu Galileya vamulandite nukumuvombela. Navantanda avamwavo vevinjivahamulandata mu Yerusalemu. ⁴² Lwe shamazuva shafiha, mulandu lyali lisiku lya kusenganya, lwe isabata yitafisile, ⁴³ Uyosefu uwaku alimateya ahinza kwe kula. Ali wakushindikwa. Kunyumba ya bulongozi we ahagulililaga uvumwene vwa Mulungu. ahayipeleha kuvala kwa Pilati nukulava umuvili wa Yesu. ⁴⁴ Pilati ahazunguha ukuti u Yesu afuye hali, ahamwita umusilikali ukumuvuzya inga u Yesu afuye. ⁴⁵ Lwe u Pitala ahamanya ukufuma ku musikali kuti u Yesu afuye, ahamupa umuvili u Yosefu. ⁴⁶ Uyosefu ahakala umwenda umuzelu. Ahamwisya ahamupinya mumwenda uno, ahamuviha mwipumpa lye vadivile mwiyalavwe. Ahagalagasya ivwe nukukupishila pambipa. ⁴⁷ Maliya Magadaleni numaliya unyina wa yose ahenya uvuzilo vwe uYesu vamusyiliye.