¹ lye isabata lyasila, u Maliya Magadalena, Maliya unyina wa Yakovo, penu Salome vahakala amafuta ukuti vinze vapashe umuvuli wa Yesu. ² Inzanchi sana pisiku ilyakwanda mwa sabata, vahavala kumbipa lwe izuva likufuma. ³ Vahayanga ku woka nuwamwavo, ''Wuwenu inti avale atugalagasizye ive ukufuma pamulyango wa mbipa?'' ⁴ Lwe vakwenya, vahenya ivwe valigalagasizye papo, pakuti lyali lipiti sana. ⁵ Vahinjila mumbipa pe v ahenya umuntu umulumendo azyaye inkanzu inzelu, ayihaye kuluvazu lwa malyelo, pe vahanyila. ⁶ Ahayanga kuvavo, ''Mutanyilaje, mukumulondola u Yesu, uwamu Nazareti, we vamuhomeleye. Azyusile! Atalipo apa. Yenya pavuyo vwe vamugonesile. ⁷ Loli valaji, muvavuzye avasundikwa vakwe nu Peteri, 'Avalongoleye akuvala ku Galileya. Kulanye kwe mwava ukumwenya wuyo, ngati she ahavavuzya."' ⁸ Vahepa nukjushimbilila ukufuma kumbipa; vahatetemaga nu kusukumila. Vatahayanga nashimo kuwonti shifukwa vali nilyoga nkani. ⁹ Inzanchi pisiku lya kwanda mw sabata, Lwe azyuha, ahavoneshela kwa Maliya Magadalena, kuwe vapiliye impepo inkandamanu ukufuma muwuyo. ¹⁰ Pe ahavala avavuzya vala ve amali navope, lwe vali pakulosya nukulila. ¹¹ Pe vahivwa ukuti mulanzi pe avoneshela ku wuyo, pope vatahasiuvila. ¹² Lwe zyavombwa izi ahavoneshela umwakulehana lehana ku vonti vavili lwe vahajendaga ukuvala munsi yila. ¹³ Vahavala vavavuzya avasundikwa ve vasyalishiye, pope vatahavasuvilaga venevo. ¹⁴ Uyesu pisinda ahavavoneshela 11pe vali pakulya pa meza, pe ahavapilila shifukwa shambula kusuvila kwavo nuvugomu vwa moyo, shifukwa vatahasuvilaga kuvala ve vamuvonye lwe azyusile ukufuma ku vafwe. ¹⁵ Pe ahayanga kuvavo, ''Muvale munsi yonti, muhalumbilile ivangeli ku vipeliwa vyonti. ¹⁶ We akwitiha nu kozyelwa we alipona, nkandi we atakwitiha we alilongwa. ¹⁷ Amafindango galivalandata ve vakusuvila; mwizina lyane valipilila impepo inkandamanu zilifuma. valiyanga namunjango izinji. ¹⁸ Valinyamula ninjoha mumwanya ninyove zyavo, nape inga vang'weleye ivyakuvagoga, vitalivavulazya. Valiviha inyove pavavinu, pe valipola.'' ¹⁹ Lwe u Mwene ayanzile kuvavo, pe ahanyamulwa ukuvala kumwanya nu kwihala kunyove iya malyelo iya Mulungu. ²⁰ Ava sundikwa vahepa nukulumbilila konti, lwe u mwene akuvomba navope nukukwanisya izyi namafindango gakuvalandata.