¹ ''Manye mulongaghe, ukuti numwe manyemwise mulongiwe. ² Pakuti ubulongi bo mukulonga, mukwisa ukulongiwa nabo, sona nichipimo chomukupimira, chochicho tichise chibapime numwebu. ³ Chifukwa chiki muketa akamindu kokali mulyiso lya mukamu wako, lori ukusita kumanya ichisinga chochiri mulyiso ilyako? ⁴ Ingaba ungabusya buli-buli mukamu wako, 'Sagha ndisye akamindu kokali muliso lyako,' bonuwe muliso lyako muli ichisinga? ⁵ Mwebamyasi umwe! tisya tasi ichisinga muliso lyako, apo po ungaketa akisa pakutisya akamindu kako kali muliso lya mukamu wako. ⁶ Manye musipaghe imbwa cho chikemo, sona manye musiponyeraghe ingulube imikanda yinu yamutengo. Para hagha singakanyaniya bwaka nifinama, sona nukupwayukana. ⁷ ''Suma, po mukwisa ukupeghiwa. Londa, sona ukwisa pakufyagha. Kongòsya, sona ukwisa pakwighuliriwa. ⁸ Pakuti wesi yo akusuma, akupokera; wesi yo akulonda, akufyagha; sona umundu yuyo akukongòsya, akwisa pakwighuliriwa. ⁹ Pamu weni yo papinu, para umwana wake umunyamata amusuma ichibama, angise amupe ibwe? ¹⁰ Pamu para asuma iswi, angise umupe injoka? ¹¹ Polero, para umwe mwebabi mukumanya ukubapa ifisa abana winu, ingapo fingaba buriburi ifyisa fyo Utata winu wakumwanya angabapa bobakumusuma umwene?. ¹² Polero, chosi chicho mukulonda abandu bababombere, numwe mubabombere ngati isabubo, pakuti ulu lolulaghiro lwa basolori. ¹³ ''Ingila pa mulyango umufinye. Pakuti umulyango ghoghukulu sona nisila yakuya pakunangika yongulu, sona abandu abingi bakwenda mumo. ¹⁴ Lori umulyango bufinye sona isila yoyikuya ku bumi mphala , nukuti bandi bobakuyagha. ¹⁵ ''Mube maso kubasolori abamyasi, bobakwisa ngati ngòsi lori nalori syo mbumbi inkhali. ¹⁶ Timukabamanyire iseke syabo. Imba abandu bakuyabagha afyamulebe mwikomo ilya mifwa pamu ilya ndolofi? ¹⁷ Musila yiyi, ikomo ilyisa likwera iseke inyisa, lori ikomo lyo libibi likwera iseke imbibi. ¹⁸ Ikomo lyo lisa litangera iseke imbibi, nikomo ilibibi litangera iseke inyisa. ¹⁹ Ikomo lyosi lyo litakwera iseke inyisa likudumuliwa sona nuponyiwa mu moto. ²⁰ Po pano, timwise mubamanye niseke syabo. ²¹ Tebosi bobakuti, 'Malafyale, Malafyale,' bakwisa ukwingira kubunyafyale bwa kumwanya, lori abene bobakupanga bwighane bwa Tata wangu kumwanya. ²² Abandu abingi pisiku ilyo bakwisa ukuti kukwangu, 'Malafyale, Malafyale, tutakasololeragha mungamu yako, mungamu yako tukafumyanga imbepo imbibi, nukuti mungamu yako tukapanga ifiswigho ifya maka?' ²³ Po ngwisa pakuyugha pamaso ghabo, 'nthabamenye umwe! Fumako kukwangu, mweba kupanga imbimbi umwe!' ²⁴ Polero, wesi akwifwa amasyu ghangu sona nughachindika akwisa ukuyana numundu yuyo akazenga unyumba yake pilyalabwe. ²⁵ Ifula yikawa, ipwisi likisa, sona imbepo yikaputa nukukoma kunyumba, lori yitakawa pasi, pakuti yikazengiwa pilyalabwe. ²⁶ Lori umundu wesi yo akwifwa amasyu ghangu nukuleka ukughachindika akwisa ukuba ngati mundu umulungane yuyo akazenga inyumba pa musesenga. ²⁷ Ifula yikawa, ipwisi likisa, nimbepo yikaputa nukukuba kunyumba, nukuwa, sona yosi yikakomanika.'' ²⁸ Bo u Yesu amala ukuyugha amasyu ghagha, ichilundiro icha bandu chikaswigha ngani namumo akamanyisikisyagha. ²⁹ Pakuti akamanyisyanga ngati mundu yuyo alinamaka, sona kukatayana nukwa bamanyindaghilo.