¹ Utakamususye umunthu usongo. Mu buyo bwache, umukwezye ngati po akaba we tata. Mukwezye abanthu abananadi ngati bo ba wamwinu, ² abanakazi abasongo ngati bo ba mama, sona abasungu abanandi ngati bamuyemba, mu buswepu bonsi. ³ Bachindike abafwilwe, abafwilwe abenecho. ⁴ Loli umufwilwe nanthi ali na bana pamo abizukulu, baleke tasi balangizye umuchinzi mu nyumba zyabo bene. Baleke balipile abapapi babo, chifukwa ichi chikumuhobosya uChala. ⁵ Loli nanthi yo mufwilwe nkani, yo asyete mwene, abikite ulusubilo mwa Chala sona akubukilila ukupanga inyiputo zya kwiyipa ubusiku nu musanya. ⁶ Napo buli, umwanakazi yo akwikala changalilo afwile napo buli mumi. ⁷ Ubanuzye ivinthu ivi, ukuti babe basita bubibi. ⁸ Loli pala yumo atakutula abakamu bache, nkali nkani aba mu nyumba yache, bo akana ulwitiko sona yo mubibi umukulu ukulusya yo atasubile. ⁹ Muleke umwanakazi abelengiwe ngati mufwilwe yo atafikite imyaka sikisite, umwanakazi wa mwanalume weka. ¹⁰ Abaghile ukumanyikwa nu bubombi ubwiza, napo buli akusungilila abana, pamo ukupokela akiza abayeni, pamo ozizye insalala zya bana abaswepu aba Chala, pamo ukwavwa abakufyenyiwa, pamo ipile mwene ku mbombo zyonsi iziza. ¹¹ Loli kuba fwilwe abanandi, mukane pakubasimba pa mundandanda. Pakuti nanthi baba ni vinyonywa vya mubili umwakususania nu Kilisitu, bakulonda ukusendwa. ¹² Munzila iyi vikususiwa chifukwa cha kukana ululaghilo lwabo ulwabwandilo. ¹³ Mukabalilo akonyene, bakumanyila sona ukuba bakata sona bakwenda ponsi ukufuma inymba yino ukuya sona iyinji. Batakaba nubukata bwene, po sona bakunena ivya kusita mahala nu kuba ba malaya, nukunena ivinthu vyo batanganena. ¹⁴ Polelo nkulonda abanakazi abanandi basendwe, ukuti bapape abana, ukuti basungilile inyumba, sona batakabape umwabi abalwani ukuti batutukenge. ¹⁵ Pakuti bamo bang'anamukile kale ku mbali ya satana. ¹⁶ Nanthi wensi umusubiliwa umwanakazi ali na bafwilwe, muleke abavwenge, umwakuti i chalichi chitakabe chakuwa pansi, umwakuti chingavwa abafwilwe abenecho. ¹⁷ Baleke abasongo balamulile akiza bapeghiwe umuchinzi uwakubabaghila, nkalinkani bo bakubomba na mazwi sona na mu vimanyisyo. ¹⁸ Ngati mo amasimbo ghakuknenela, ''Mutakapinye imilomo ya nkambako po yili pa kusyola ichakulya''sona '' Uwambombo alipiliwe umuvwalo wache.'' ¹⁹ Utakapokele ukususya ukwa songo mupakana pabe abakamboni babili pamo batatu. ²⁰ Gholosya abananzi pa nthanzi pa bonsi ukuti abinji babe nu bogha. ²¹ Nkubalamula umwe, panthanzi pa Chala nu Kilisitu Yesu sona na banthumi abasaliwa, ukusunga indaghilo izi ukusita ukusala, nukusita ukubomba chimo pakulinga icheni. ²² Utakasamazanie pakubika inyobe pa nayumoyumo. Utakagabe imbimbii zya munthu yumo ku yunji. Loli wisunge mu buswepu bwako. ²³ Utakang'wenge aminzi ghene. Mu buyo bwache, loli ung'wengeko nutu bwalwa panandi ukuti wavwe inthamyo yako iya nthumbo nu bulwale ubunji. ²⁴ Imbibi zya banthu bamo zimanyikizwe pa bwelu, sona bakwiza ukubuka nazyo panthazi pa bulonzi. Loli imbibi zimo zikukonka pisinda. ²⁵ Munzila iyonyene, imbombo zimo iziza zimanyikizwe pabwelu, napo buli zimo izinyabo zitangafisiwa.