¹ Leka bonsi bo bali pansi pi goli lya batumwa babasenye abasongo babo ukuba ba nchindi zyonsi. Babaghile ukubomba ichi ukuti izina lya Chala ni vimanyisyo vitakakoziwe insoni. ² Abatumwa bo bali na basongo abakusubaliliwa batabaghile ukubabonesya ukusita kubachindika chifukwa bo ba wamwitu. Mu buyo bwache, babaghile bababombele mwa kubukulila bonsi. Pakuti abasongo bo bakwavwilika ni mbombo yabo bakwivwila sona baghaniwa. Manyisya nukufumusya ivinthu ivi. ³ Nanthi yumo akumanyisya ichimanyisyo cha bumyansi sona nukusita ukukolelana na na mazyu gha kwivwika agha Mwene witu u Yeso Kilisitu sona ni chimanyisyo cha bwa chala, ⁴ akwibusa sona atakwivwa nachimo. Akulonda ukunyala ukwakwipelusya sona nu kususya kwa mazwi gho ghakwiza na kabini, ulombwa, inthusi,inyinong'ono izibibi, ⁵ sona nukukwelana ukukulu pakasi pa banthu bo bali ni nsibo izibibi. Batayite ubwanaloli sona bakwinong'ona ukuti ukumwiputa u Chala yo nzila iyakwaghila amakopala aminji. ⁶ Po ukwiputa u chala mwakufikapo bo bwanduzi, ⁷ pakuti tutakiza nacho nachimo pa chisu cha pansi, tutakwiza ukusenda chimo mu chisu. ⁸ Mubuyo bwache, zanga twikutisiwe ni chakulya sona nimvwalo. ⁹ Ulu bo bakulonda ukuba bakukwana bakuwa mu ngelo, mukasi mu chipingo. Bakuwa mu vyabukonyofu ivinji, sona ni vinyonywa ivilwani na mu vyonsi vyo vukudwivya abanthu nukutayika na mukupyutiwa. ¹⁰ Pakuti pakughana amakopala wowo musisi uwa mutundu wonsi uwa mbibi. Bamo abanthu bo bakulonda ichi basobeziwe nukufumako ku lwitiko sona bilasite bene ni vitima ivikulu. ¹¹ Loli umwe, banthu ba Chala, mwipoke ku vinthu vino. Mukonke ubugholosu, ukwiputa u chala, ulwitikano,ulughano, ukufwililikila, sona nu bololo. ¹² Lwanga ubwite ubwiza ubwa lwitiko. Kolelela ku bumi ubusita kumala bo ukwitiziwako, sona nako ukabika ukwitikizya ukwiza panthanzi pa ba kamboni abinji ¹³ Nkukupa indaghilo izi panthanzi pa Chala, yo akupa ubumi ku vinthu vyonsi, sona panthanzi pa Yeso Kilisitu, yo akimilila ubu kamboni ukwitikizya ukwiza panthanzi pa Ponsiyo Pilato, ¹⁴ pakusunga indaghilo ukusita katonyezi pamo kachilema ukufika pakuboneka kwa Mwene witu u Yeso Kilisitu. ¹⁵ U Chala akwiza ukusetula ukubonekela kwa Kilisitu pakabalilo akenecho-- u Chala, umusayiwa sona uwamaka ghonsi, umwalafyale yo akulamula sona u Mwene yo akulongozya. ¹⁶ Weyo mwene yo atakwiza ukumala sona ukwikala pabwelu ubusita kufikapo. Atalipo nayumo umunthu yo amubwenipo pamo yo angayezya pakumulinga. Kukwache kubenge amapalo na maka gha bwile.Ameni. ¹⁷ Mubabuzye abakabi ba mu chisu ichi ukuti batakabusenge sona batakabe nu lusubilo mu vyuma, vyo vinthu vya kuchenja. Mubuyo bwache, basubile mwa Chala. Akutupa uswe ubukabi bwa bwanaloli nu bwakwilagha. ¹⁸ Babuzye ukuti babombe ubwiza, ukuti babe bakabi mu mbombo inyiza, sona babenge bakwighana pa kugabana na banyabo. ¹⁹ Munzila inyinyene bakwiza pa kwisengulila bene ulufula ulwiza ulwa cho chikwiza, nukuti inti bize bakolelele bo bumi ubwenecho. ²⁰ Timoti, usungilile cho ukapewa. Ukane ivyakunena ivyabukonyofu sona ninyinong'ono zyakususya zyo tezyozizyo loli bamo bakuti mahala. ²¹ Abanthu bamo bakufumusya ivinthu ivi sona basobelite ukufuma ku lwitiko. Leka ubwila bube numwe.