¹ Ulu u Muzimu wukunena pa bwelu ukuti mutubalilo twa ku nthanzi abanthu bamo bakwiza ukuleka ulwitiko nukwanda ukwivwila imizimu yakupusika sona na kuvimanyisyo ivya mphepo iyibibi, ² mukutamantha amabumyansi, mu nsibo zyabo zyo basubilemo. ³ Bakwiza ukulesya abanthu ukusendana sona nukubalonda ukuti bilyesye ivyakulya vyo u Chala akapela ukuti bapokele nukusalifya nabo bakusubila sona bakumanya nu bwanaloli. ⁴ Pakuti ichipeliwa chonsi icha Chala chili akiza, sona , nachimo cho chipokeliwe nukusalifya cho chingakaniwa. ⁵ Pakuti chiswefiwe na mazwi gha Chala sona ni nyiputo. ⁶ Nanthi ukubika ivinthu vino panthanzi pa ba wamwinu, ukuba we mubombi umwiza uwa Yesu Kilisitu. Pakuti muyaniziwe na mazwi gha lwitiko sona na mu bumyansi ubwiza bo ukonkhezizye. ⁷ Loli kana utupangwi twa chisu to tughaniwe abanakazi abasongo. Mumalo mwache, wimanyisye wemwene mu zya Chala. ⁸ Pakuti ukumanyisiwa kwa mubili kwa kulondiwa panandi bwaka, loli ubwa chala bwakulondiwa pa vyonsi. Bukuba ni laghano ilya bumi buno sona nubumi bo bukwiza. ⁹ Inthumwi iyi yikusubaliliwa nkani sona nukwitikiziwa ukwakukwana. Pakuti mo vili ukulwisya sona nukubomba na maka. ¹⁰ Pakuti tukusubila mwa Chala uwa bumi, yo we mupoki wa banthu bonsi, loli bene bo bukusubalila. ¹¹ Babuzye nu kubamanyisya ivinthu ivi. ¹² Atakabepo nayumo uwa kukana ubulumendo bwako. Mu buyo bwache, ku bo bakusubila, ube chilangizyo mukunena, mu mikalile, mu lughano, mu busubaliwa sona mu buswepu. ¹³ Mupaka po nkwiza, ubikepo umoyo pakubabelengela, nukubalalikila, sona na muvimanyisyo. ¹⁴ Utakakane ichabupi cho chili mu mwako, cho chikapeghiwa ku kukwako ukwendela mubulaghuzi, nukubikiwa ni nyobe izya basongo. ¹⁵ Sungilila ivinthu vino. Ube mukasi mumwabo, umwakuti ivyakubombiwa vyako vibe chisimikizyo ku banthu bonsi. ¹⁶ Wichenjelelke uwe wemwene sona naku vimanyisyo. Pitilizya mu vinthu ivi. Pakuti pakubomba ulu, ukwiza ukwipoka wemwene na bonsi bo bakukwivwila.