¹ Ukunena uku kwa bwanaloli kokukuti: Pala yumo akunyonywa ukuba mulingilili, bo akunyonywa imbombo inyiza. ² Pololi umulingilili wache abaghile ukuba wakusita akalema nakamo, ube munthu wa mawanakazi weka, abe wakwikola, wanyinong'ono, mukuzi, abe musungi. Abe munthu yo angamanyisya. ³ Atakabe we chakolwa, atakabe wa bwite, mumalo mwache abe, mutenga moyo, uwa mutende. Atakabe wakuzighana indalama. ⁴ Abaghile ukuba wakulongozya akiza inyumba yache, sona abana bache babe bakumwivwila nukumupa umuchinzi uwenecho. ⁵ Pakuti nanthi umwanalume atakumanya mo angalongozyela inyumba yache, ka angasungilila bulibuli i chalichi cha Chala? ⁶ Atakabe yo afuma ukupokiwa, umwakuti atakabe wakwizula na madinkho nu kwikwezya mwakuti angize asusiwe ngati mo u satana akasusiliwa. ⁷ Abaghile sona ukuba munthu uwakumupala na bakunzi bwaka, ukuti manye ize akoziwe insoni nukukolwa mu chipingo cha satana. ⁸ Viyanite bwaka, na ba Dikoni, babe numuchinzi uwecho, batakabe bakunenanena. Manye bang'we nkani ubwalwa pamo ubupafu. ⁹ Babaghile ukuba bakusunga ichisinsi cha bwanaloli mu lusubilo na mabyebye amiza. ¹⁰ Babaghile ukugheliwa tasi, po babukilile ni mbombo nanthi chitalipo nachimo ichakubakanizya. ¹¹ Umwakuyana bwaka, abakazi babo babe nu muchinzi uwenecho, batakabe baliyebo, loli abakwikola sona babe bakusubaliliwa mu vinthu vyonsi. ¹² Aba dikoni babaghile ukuba banalume ba mwanakazi weka. Babaghile ukuba bakusungilila akiza abana babo ni nyumba zyabo. ¹³ Ku bonsi bo bakubomba akiza imbombo zyabo bakwisendela bene izina iliza sona bakumanya ukubomba na maka nu lusubilo loluli mwa Kilisitu Yesu. ¹⁴ Ngati mo nkusimbila ivinthu ivi ku kwinu, indi nu lusubilo ukwiza ku kwinu lululu. ¹⁵ Loli nanthi nakabila, nkubasimbila ukuti mumanye mo mungichindikila mu nyumba ya Chala, yo cho Chalichi cha Chala uwabumi, we yo mphanda sona wakwavwa ubwanaloli. ¹⁶ Twebonsi tukwitika ukuti ichisinsi cha nyiputo cha pa mwanya. ''Aboneka ku mubili, wo wukalangiziwa nu Muzimu, abangelo bakamulinga, bakalumbilila mukasi mu visu vyonsi, akasubaliliwa pa chisu, sona akasendiwa ukuya kumwanya mu buchindamu.''