¹ Po ilelo ukuyana ni mfundo zyo nkhasimba: ''Chizapo ukuti umwanalume atakamupalamansyenge umwanakazi.'' ² Loli chifukwa cha ngelo ku vinyonywa ivya bu malaya, umwanalume wensi abenge nu mukazi wache, nu mwanakazi wensi abenge nu mulume wache. ³ U mulume akwanisyenge imbombo yache pa kughonana nu mukazi wache. ⁴ Umwanakazi ate na mazaza pa mubili wache, loli umulume. Wepe umwanalume ate na mazaza pa mubili wache loli umukazi wache. ⁵ Mutakakananenge weka nu yunji, pene po nanthi mwivwana tasi nu kupaghula akabalilo. Mubombe ichi ukuti mwiyipe mwebene mu lwiputo.Po mube sona poka, ukuti u satana atakabayezye umwe chifukwa cha kusita ukwikola kwinu. ⁶ Loli nkhunena ivinthu ivi ku kwinu umwakwivwana te mwa kubapatikizya. ⁷ Nalondanga ngati ali wensi abe ngati mombelile une.Loli ali wensi ali ni chabupi chache ukufuma kwa Chala.Yumo ali ni chabupi ichi, po uyunji ichinji. ⁸ Ku bo batasendite na bafwilwe nkhunena ukuti chingaba akizapo nanthi bangikala kusita kusenda ngati mo mbelile. ⁹ Loli nanthi bakupotwa pakwikola,babaghile ukusenda pakuti chizapo ku kwabo pakusenda nukusita ukutamiwa ni vinyonywa. ¹⁰ Po ku bo basendanite nkhubapa ululaghilo ulu--tenene, loli uMwene--umwanakazi atakafume ku mulume wache ¹¹ (loli nanthi akufuma ku mulume, atakasendwe sona, pamo asayane nu mulume wache),nu mwanalume wepe atakamusoke umukazi wache. ¹² Loli ku banji nkhunena--une; te we Mwene---ukuti nanthi yumo uwamwinu ali nu mukazi yo te mwitiki, sona nanthi akwikala nawe ichete umwene atakamusoke. ¹³ Nanthi umwanakazi ali nu mulume yo te mwitiki, sona nanthi akwikala nawe ichete, umwene atakamusoke. ¹⁴ Nanthi umwanalume weyo temwitiki akuba muswepu chifukwa mukazi wache, nu mwanakazi yo te mwitiki akuba musswepu chifukwa cha mulume. Nanthi bo ubonyene abana binu te bakabe baswepu, loli ilelo baswepu. ¹⁵ Loli nanthi yo te mwitiki akufuma, muleke abukenge. Muvifukwa ivyonyene, umuyemba pamo umukulu atapinyiwe mukufuma kwabo. U Chala atwitizizye ukuti twikale mu mutende. ¹⁶ Ka ungazimanya bulibuli, we mwanakazi, lumo ungize umusunge umulume wako? Pamo ungazimanya bulibuli, we mwanalume, lumo ungize umusunge umukazi wako? ¹⁷ Nanga buli ngati mo u Chala amupelile wensi ichigaba, wensi u Chala amwitizizye. Ubu bulamulilo bwane mu ma Chalichi. ¹⁸ Alipo yumo akacheketiwa ukuti po akitikizya ukuti asubile atakayezye ukwibonesya ngati acheketiwe. Alipo yumo yo atakachetiwa bo itiziwa ku lwitiko yo atakacheketiwapo lumo. ¹⁹ Pakuti te chifukwa cha kucheketiwa pamo ukusita kucheketiwa koko kuli ni mbombo. Cho chikulondiwa ko kukonkha indaghilo zya Chala. ²⁰ U munthu wensi abenge mukwitiziwa mo akabela po u Chala akamwitizya ukuti asubile. ²¹ Ka uwe ukaba muzya po u Chala akakwitizyanga? Utakatamiwenge nacho. Loli natnthi ungaba we musatuke, bomvya ulusako lwache. ²² Pakuti yumo yo itiziwe nu Mwene ukuba munthu musatuke uwa Mwene. Umwa kuyana bwaka, yumo yo akaba musatuke po akitiziwa ukuba mwitiki yo muzya wa Kilisiti. ²³ Umwe mughuliwe nu mutengo, po mutakaba bazya ba banthu. ²⁴ Ba wamwitu, mukabele konsi ko akabamo po akitiziwanga, chobene wensi abe nu Chala. ²⁵ Ivya kukwasania nabo batasendizwe lumo, nthe nululaghilo nalumo ukufuma kwa Mwene. Loli nkhubapa inynong'ono zyane ngati we yumo yo, pa chisa cha Mwene ne musubaliwa. ²⁶ Polelo, nkhwinong'ona ukuti chifukwa cha bu bibi bo bukwiza, chizapo ukuti umunthu abe mo abelile. ²⁷ Ka usendizwe ku mwanakazi? Po utakalonde pa kusoka. Nanthi utasendite, utakalonde umwanakazi. ²⁸ Loli nanthi usendite, bo utanangite, sona nanthi umwanakazi yo atasendizwe akulonda ukusendwa bo atanangite. Loli bonsi bo basendite bakwiza ukuba ni nthamyo izinji izya pa chisu, sona nkhulonda mbapoke ku izi. ²⁹ Loli nkhunena ichi, ba wa mwitu: Akabalilo kafupi. Ukwanda ilelo ukuya mu nthazi leka bo bali na banakazi bikalenge ngati bate nabo. ³⁰ Bonsi bo bakulila babe ngati batalilanga, sona bo bahobokite babe ngati batahobokite, sona bo bakughula babe ngati bate navyo navimo, ³¹ sona bonsi bo bakuchibomvya ichisu babe ngati batakuchibomvya chonsi. Pakuti ichisu cha pansi mo chibelile ilelo chili ku bumalilo. ³² Une nkhulonda ukuti umwe mube basatuke ku vyo vikubayimvya. U munthu yo atasendite akwinong'ona bwaka zyo zya bu Mwene, mo angamuhobosezya. ³³ Loli umwanalume yo asendite akwinong'ona zyo zya chisu cha pansi, mo angamuhobosezya umukazi wache--- ³⁴ wakugabinkhana. U mwankazi yo atasendizwe pamo umusungu akwinong'ona zyo zya bu Mwene, namo angiswefezya mu mubili na mu muzimu. Loli umwanakazi yo asendizwe akwinong'ona zyo zya chisu cha pansi,mo angamuhobosezya umulume wache ³⁵ Nkhunena ichi pakuti zya kubatula umwe, sona ukuti nthakabike ubupinyiwa bumo papinu. Nkhunena ichi pakuti mumanye ubwanaloli, nukuti imwe mumukakatile u Mwene ukusita icha kubapinga. ³⁶ Loli nanthi yumo akwinong'ona ukuti atakumubombela iviza umusungu wache mwa muchinzi--- nanthi yo apululile imyaka ya kusendezezwa sona zibaghile mo zibele---abaghile abombe cho akulonda. Bo atanangite. Babaghile basendane. ³⁷ Loli nanthi umwene imilile kusita kuyingana mu moyo wache, nanthi atafyenyeleziwe loli ali na maka pa bwighane bwache mwene, sona nanthi umwene yo adumwile mu moyo wache pakubomba ichi ,pakwisungila mwene ubusungu bwache, akwiza ukubomba akiza. ³⁸ Po yumo yo amusenda umusungu bo abomba ichiza, sona yumo yo akusala ukuti manye asende akwiza ukubomba ubwiza nkhani. ³⁹ Umwanakazi apinyiwe ku mulume wache po ali nu bumi. Loli nanthi umulume wache afwa, po musatuke pa kusendwa na wensi yo akulonda, loli mo mwa Mwene. ⁴⁰ Loli mubulonzi bwane umwene akwiza ukuhoboka nkhani nanthi akwikala mo abelile. Sona nkhwinong'na ukuti nune indi nu muzimu wa Chala