¹ Zivwika ukuti mu mwinu bulimo ubwa malaya, ubwa malaya ubu butakubonekamo na mu ba panzi: U munthu yumo asendite umukazi wa tata wache. ² Umwe mukwikwezya! Ka mutabaghile ukuti musulumanyenge,po nanthi yo abombite ichikulu ichi mumufumyemo mu mwinu? ³ Napo une nthaliko uko mu mubili, une ndiko mu muzimu. Une ndongile nzila izya yo abombite ivi, viyanite bwaka ukuti une nkhabako. ⁴ Nanthi mwabungana mwizina lya Mwene witu u Yeso sona nune nkhuba numwe mu muzimu, po na maka gha Mwene witu u Yeso ghalipo. ⁵ Vikuti u munthu uyu abikiwe kwa satana ukuti umubili wache baghukomanye, ukuti u muzimu wache wize ghupokiwe pisiku ilya Mwene. ⁶ Ukwitumvya kwinu te kwiza.Umwe mutazimenye ukuti inyambo bwaka yingatutumula ichibama chonsi? ⁷ Po mufumyepo inyambo iya kale ukuti mube baswepu imyoyo, inthi mube ngati chibama ichipya cho chite ni nyambo, pakuti u Kilisiti, ing'onzi ya pa lusekelo yipeghiwe. Po twebonsi za tusekelele pa lusekelo, patakabe ni nyambo ya kale, inyambo iya nkhalo imbibi nu butulanongwa. ⁸ Po loli za tusekele ni chibama ccho chite ni chilungo cho chiza sona ni chanaloli. ⁹ Mwa kalata wane yo nkhabasimbila umwe ukuti mutakongane na banthu aba malaya. ¹⁰ Te nzila yakuti nkhang'anamulanga abanthu aba malaya aba muchisu ichi, pamo abapafu, pamo ivigabenga, pamo bo bakwiputa ivifwani, papo ukwikala pabutali nabo umwe nge mufumitemo lonsi mu chisu icha pansi. ¹¹ Loli ilelo mbasimbile umwe ukuti mutakongane na wensi yo akwitiziwa we wa mwinu loli akwikala mu bwa malaya,pamo mu bupafu, pamo ichigebenga, pamo uwiyebo, pamo uwakwiputa ivifwani, pamo uching'wela, nu mwiba. Ni chakulya chope mutakalye nawe umunthu yo ali ubunye. ¹² Ka une chili bulli buli nabo ukubalonga bonsi bo bali kunzi kwa Chalichi? Napo, umwe mutangabalonga bosi bo bali mu Chalichi? ¹³ Loli u Chala akubalonga bonsi bo bali kunzi.''Fumya umunthu umubibi mu mwinu.