¹ Umu momo umunthu abaghile ukuti atusendele, ngati swe babombi ba Kilisiti nabo bakusetula vyo vifisiwe vya Chala. ² Po ulu cho chikulondiwa nabo bakusetula chakuti babe bakusubaliliwa. ³ Loli kukwane, kanthu kanandi nkhani ko ningalongiwa numwe pamo nubulongi bwa munthu.Pakuti nthakwilonga nemwene. ⁴ Nthabumenye nubulongi bonsi bo bungiza kukwane. Loli chtakung'anamula ukuti ne mwiza. Yo akundonga une we mwene. ⁵ Polelo mutakanenenge izya bulongi bwa chili chonsi bo akabalilo katakwanite, bo u Mwene atizite. Akwiza ukubika pa bwelu ivinthu vyosi vyo vivwamikite ni chisi nukusetula vyo umoyo ghukubomba.Po wensi akwiza ukupokela amapalo ghache ukufuma kwa Chala. ⁶ Polelo, ba wa mwitu , nkhulenga ivi nemwene nu Apollosi chifukwa cha umwe pakuti ukufuma kukwitu mumanye iching'anamulo cha vyo vikuneniwa. ''Mutakapululizye pa vyo visimbiwe.'' Ivi vili ubunyene ukuti nayumo uwakwitutula ku munyantche. ⁷ Pakuti wewenu akulinga ukupambana pakasi pa umwe na banji? Muli ni choni cho mutapokelite? Nanthi mupokelite choni cho mukwukwezya ngati po mutapokelite? ⁸ Muli nacho kale cho mungalonda! Ngabuli mwe bakab kale! Mwanda pakulaghila--- mwapambana nuswe! Naloli, Ukulaghila ukwiza koko nkhubalondela, ukuti tungalaghila numwe. ⁹ Nkhwinong'onona ukuti u Chala atubikite ukuba batumwa pa bwaka ngati babumalilo, mu bubombi sona ngati bantu bo bakomiwe.Twaba swe vya kuligilapo vya chisu cha pansi---ku bangelo na ku banthu. ¹⁰ Uswe swe bakonyofu chifukwa cha Kilisiti, loli muli na mahala mwa Kilisiti, swe ba kufoka, loli muli na maka.Muchindikiwe,loli uswe tutachindikiwe. ¹¹ Mpaka pa kabalilo kano ko tuli ni nzala ni nyota, tuchili tuvwalukite,tukumwa akabibi sona tute na pa kwikala. ¹² Tukubomba imbombo iyighomu, tukubomba ni nyobe zitu. Nanthi tukuvinyiwa, tukupilila. ¹³ Nanthi batubepezesya tukunena mu bwiza.Twaba, ngati banthu bo bakaniwe ni chisu chonsi sona ngati vibibi vya vinthu vyonsi. ¹⁴ Nthakusimba vyonsi vino ukuti mbakozye insoni umwe awe, loli ukuti mbasoke ngati mwe bana bane abaghaniwa. ¹⁵ Napo mungaba na bakubasungilila teni sauzande mwa Kilisiti, mute na batata abinji. Pakuti une nkhiza naba ne tata winu mwa Kilisiti Yeso ukwizila mwizwi. ¹⁶ Po mube bakunkhonka une. ¹⁷ Chochobene nkhabatumila u Timoti, umughaniwa nu musubaliliwa wane mwa Mwene. Akwiza ukubakumbusya inzila zyane mwa Kilisiti, ngati mo nkhubamanyisizya konsi na mu ma Chalichi ghonsi. ¹⁸ Po mwebamo ba umwe mwatutumuka mukupanga ngati nthakizanga ku kwinu. ¹⁹ Loli nkwiza lululu ku kwinu, nanthi u Mwene itikizya.Po inthi nkhamanye pa kunena amazwi ku bala bo bakwitutumula nkhani, loli nkhwiza ukulinga amaka ghabo. ²⁰ Pakuti ichinamwene cha Chala chite na mazwi loli mu maka. ²¹ Mukulonda ichoni? Ka nize ku kwinu ni nkhomo pamo nulughano sona mu muzimu wa chikanga.