¹ Mulondelonde ulughano sona mubike imyoyo yinu pa vyabupi vya muzimu, nkhalinkhani icha kulotela. ² Pakuti yo akunena mu ndimi atakunena ku banthu loli kwa Chala. Pakuti nayumo akwivwisya papo akunena mu muzimu ivya kubufisamu. ³ Loli yo akulotela akunena ku banthu ukuti abazenge, akubaghomye nu kubagholosya. ⁴ Yo akunena mu ndimi akwizenga mwene, loli yo akulotela akuzenga i Chalichi. ⁵ Po nalonda ngati mwebonsi nge mukanena mu ndimi. Lole ukupululizya apo, nkhulonda ngati nge mukalotelanga.Yo akulotela wa pamwanyapo ukulusya yo akunena mundimi (pene po yumo ang'anamukila pakuti i Chalichi chipokele ubuzengi ). ⁶ Polelo ba wamwitu, pala nkhwiza kwa umwe nkhunena mu ndimi, ka ningavwa ichoni? Nthangabavwa pene po nanena numwe nu buvumbuzi, pamo nu bumanyi, ukulotela pamo nubumanyisi. ⁷ Mu nzila iyinyene, vyo vitakufuta vikufumya amazwi--ngati imbata--pala viyakufumya utumazwi twa kulekanalekana po aliwensi angamanya bulibuli ukuti mazwi buli gho imbata yikulizya? ⁸ Pakuti pala imbata yikuliziwa mu mazwi ghoteghoghagho, yumo angamanya bulibuli po kabalilo ka kwisenganizya inkhondo? ⁹ Mu nzila iyinyene numwe mwe ba ndimi nanthi mukufumya amazwi gho ghatakwivwika vyo vyaneniwa vingivwika bulibuli? Inthi unenenge, sona nayumo inthi akwivwisye. ¹⁰ Pali ivinenelo ivinji vyo vikukayikisya pa chisu, sona nachimo cho chite niching'anamulo. ¹¹ Loli nanthi nthamanya iching'anamulo cha chineno inthi imbe mulendo kwa yo akunena, sona yo akunena inthi abe mulendo kukwane. ¹² Po vili numwe. Pakuti mukulonda hee ivyabupi vya mu Muzimu, po londani ivya kuzenga i Chalichi. ¹³ Po yo akunenela mu ndimi ipute ukuti ang'anamulile. ¹⁴ Pakuti nkhwiputa mu ndimi, umuzimu wane wukwiputa, loli aminong'ono ghane ghatakupapa ivikomwa. ¹⁵ Mbombechi? Inthi nipute mu muzimu wane, po inthi nipute naminong'ono ghane. Inthi nimbe mu muzimu wane, sona inthi nimbe na minong'ono ghane. ¹⁶ Po kokuti, ukumupala u Chala nu muzimu, po abakunzi banganena bulibuli ukuti '' Ameni'' po ukumupalizya pala atamenye vyo mukunena? ¹⁷ Pakuti mukupalizya naloli, lole umunthu uyunji atazengiwe. ¹⁸ Nkhumupalizya u Chala pakuti nkhunena mu ndimi nkhani ukulusya mwebonsi. ¹⁹ Lole mu Chalichi inthi nene amazwi fayivi nukwivwisya kwane pakuti mbalongozye abanji, ukulusya amazwi teni sawuzande mu ndimi. ²⁰ Ba wamwitu, mutakabe bana mu minong'ono ghinu. Pamo ku vibibi, mube ngati twa bonda, lole mu minonong'ono mube bakuzi. ²¹ Mundaghilo zisimbiwe,''Mu banthu ba ndimi zya chilendo sona mumilomo ya chilendo ndinena ku banthu aba.Napo batalinivwa,'' akanena u Mwene. ²² Polelo,indimi chimanyisyo, ku bakusubalila hagha, lole ku bote bakusubalila. Lole ukulotela kwa chimanyisyo, ku bo batakusubalila hagha, ku bo bakusubalila. ²³ Po, i Chalichi chonsi chikwiza poka sona bonsi bakunenela mu ndimi, po abakunzi nabo batakusubalila bakwiza, ka batakwiza ukunena ukuti mupen ²⁴ Lole nanthi mwebonsi mukalotelanga po yo atasubalila pamo uwa kunzi injila, akukuziwa na vyonsi vyo ivwa. Angalongiwa na vyonsi vyo vikuneniwa. ²⁵ Ichinsinsi cha moyo wache chingavumbuliwa. Ubumalilo bwache angawa pansi nuku mwiputa u Chala. A tangitikizya ukuti naloli u Chala ali pa pinu. ²⁶ Ka cho chikukonkha chochoni lelo, ba wa mwitu? Nanthi mwiza poka aliwensi ali ni nyimbo, ubumanyili,ubuvumbuzi, ululimi, pamo ukung'amulila. Bomba chili chonsi ukuti muzenge i Chalichi. ²⁷ Nanthi yumo akunena mu ndimi, pabe babili pamo batatu, sona wensi, po yumo ang'anamulile vyo vyaneniwa. ²⁸ Lole nanthi pate nayumo uwakung'anamulila, leka bonsi bikale bwaka mya mu Chalichi. Leka yumo anene pa mwene na kwa Chala. ²⁹ Mubaleke abaghonela babili pamo batatu banene, abanji bivwisye nu kulonga vyo vyaneniwa. ³⁰ Lole nanthi pali ubuvumbuzi kwayo ikalite pa mbombo, muleke yo anena abe mya. ³¹ Pakuti wensi mwa umwe angalotela weka na weka pakuti yumo amanyile sona bonsi bakaziwe. ³² Pakuti imizimu ya baghonela yikulondiwa ku baghonela. ³³ Pakuti u Chala tewe Chala wakuvulungania, loli wa mutende. ³⁴ Abanakazi batenge bwaka mu ma Chalichi. Pakuti batakwitikiziwa pa kunena.Mu malo mwache, loli bivwilenge, mo indaghilo zikunenela. ³⁵ Nanthi palipo chimo cho bakunyenywa ukumanya,balalusye abalume babo ku nyumba. Pakuti chansoni kwa mwanakazi pakunena mu Chalichi. ³⁶ Ka amazwi gha Chala ghakafuma ku kwinu? Ka muli mwebene mwe ghakafikapo? ³⁷ Pala yumo akwinong'ona ukuti mughonela pamo wa muzimu amanye ukuti ivinthu vyo nkhubasimbila umwe lulaghilo lwa Mwene. ³⁸ Loli pala yumo atakuzyaghania izi, wepe atakamanyikwe. ³⁹ Polelo,ba wamwitu,nubwanaloli nyonywanga ukulotela, sona mutakakanile nayumo pakunena mu ndimi. ⁴⁰ Loli lekani ivinthu vyonsi vibombiwe mu bwiza na mu lubatiko