¹ Po ulu nkhubakumbusya, ba wamwitu, amazwi aminza gho nkhalumbilila ku kwinu, gho mukaghapokela sona gho mwimililepo, ² sona ghogho ghabapokite, nanthi mwakolesya amazwi gho nkhalulmbilila, po aponyene mwasubila nu bwanaloli. ³ Pakuti nkhabapa ngati ghakulondiwa hee gho nune nkhapokela, pakuti u Kilisiti akafwila imbibi zyitu ngati mo amazwi ghakunenela, ⁴ pati akasiliwa, nukuti akazyuka pi siku lya butatu ngati mo amazwi amiza ghakunenela. ⁵ Ukilisiti akamubonekela u Kefasi, polelo ku bala twelovu; ⁶ po akababonekela aba wamwitu abinji ukulusya fayivi handiledi pakabalilo koka. Abinji mwa abo bali nu bumi, loli bamo baghonite utulo. ⁷ Po akamubonekela u Yakobe, po na ku batumwa bonsi. ⁸ Pabumalilo bwa bonsi, akambonekela une, ngati wa bamo yo akapapiwa bo imyezi yitakwanite. ⁹ Pakuti ne wa bumalilo wa batumwa. Nthabaghile pakwtiziwa mutumwa papo mkhavwimanga i Chalichi cha Chala. ¹⁰ Lole mu chisa cha Chala indi ngati mombelile, sona ichisa chache mumwane chitakaba cha bwaka. Mumalo mwache, nkhalwisya pabomba nkhani ukulusya bonsi. Napo nthakaba nene, loli chisa cha Chala cho chikaba mu mwane. ¹¹ Napo lumo ningaba nene pamo bobabo, po tukalumbilila sona mukasubila. ¹² Po pala u Kilisiti akupalaziwa ukuti akazyuka ku bufwe, po choni cho bamo mwa umwe bakunena ukuti ukuzyuka ku bufwe nakumo? ¹³ Po pala ukuzyuka ku bufwe kutakabangako, po u Kilisiti wepe nge atazyukite; ¹⁴ Sona pala u Kilisiti atakazusiwanga, po ukulumbilila kwitu kwa bwaka, sona ulwitiko lwitu lope lwa bwaka. ¹⁵ Sona, twaghiwe ukuba bakaboni abamyansi aba Chala, chifukwa tukasimikizya pati u Chala akazusya u Kilisiti ukufuma ku bufwe. Lole nanthi atakamuzusya, nge momumo ubufwe butazusiwa. ¹⁶ Po ubufwe linga butazusiwa, po bo u Kilisiti wepe nge atakazusiwa; ¹⁷ sona pala u kilisiti atakazyuka, u lwitiko lwinu lwa bwaka sona muchili muli mu mbibi zyinu. ¹⁸ Po bo baghonite utulo mwa Yeso bope basobelite. ¹⁹ Pala mubumi buno bwene tukusubila mwa Kilisiti, pa banthu bonsi tubaghile ukupeleliwa ichisa. ²⁰ Po ilelo u Kilisiti, yo chikimwa cha bwandilo ku bo bafwile,azyusiwe ku bufwe. ²¹ Pakuti imwa yikiza nu munthu, po umunthu wepe akiza nu kuzyuka ku bufwe. ²² Pakuti ngati mwa Adamu bonsi bakafwa, po na mwa kilisitu bonsi baliba babumi. ²³ Loli wensi mulubatiko lwache: U Kilisitu, yo vikomwa cha vyabwandilo, sona nabo bali mwa Kilisitu baliba ba bumi pakwiza kwache ²⁴ Po buliba bumalilo, po alibika ichinamwene cha Chala u Tata munyobe zyache, po alimazya indaghilo zyonsi na mazaza na maka. ²⁵ Pakuti abaghile alamulile mpaka po abika abalwani bache bonsi pansi pa vinama vyache. ²⁶ Umulwani wa bumalilo pakumukomania yomfwa. ²⁷ Pakuti '' abikite chili chonsi pansi pa matamba ghache.'' Loli bo bakuti ''abikite chili chonsi,'' Vikumanyikwa pabwelu ichi chitakukwamfya yo abikite chimo pansi papache. ²⁸ Bo ivinthu vino vibikiwe pansi papache,po umwana wa mwenecho akwiza pakuba pansi pa yo akubika vyonsi pansi papache, pakuti uChala abe pa vyonsivyonsi. ²⁹ Pamo balibomba choni bo bakoziwa ku bafwe? Pala abafwe batakuzyuka napo panandinandi, choni cho boziwe chifukwa chabo? ³⁰ Po nga choni cho tuli pa bubibi akabalilo konsi? ³¹ Nkhufwa isiku lyonsi! Ichi chili ngati kwitumvya kwane ku kwinu, ko indi nako mwa Kilisitu Yeso u Mwene witu. ³² Nkhwaghamo ichoni, mu bunthu pala nkhulinga, pala nkhalwa ni vinyamana vya ba Efeso, nanthi abafwe butakuzyuka? ''Za tulye nu kung'wa, pakuti indabi tukufwa.'' ³³ Mutakapusikiwe: ''Abamanyani aba mbibi bakukomania inkhalo iziza.'' ³⁴ Cheba! Mwikale mu bwanaloli! Manyi mube mu mbibi. Pakuti bamo mwa umwe batazimenye nazimo izya Chala. Nkhunena ivi ukuti insoni zibakole. ³⁵ Lole yumo alinena, Po abafwe bakuzyuka bulibuli, sona bazukwiza na kabele ka bulibuli ka mibili yabo?'' ³⁶ Mwe basita mahala umwe! Cho wabyala chitakwanda pakukula pene chifwe tasi. ³⁷ Cho mwapesa temo ububili wulibela, lole imphumba bwaka. Yingaba ngano pamo ichinyabo chimo. ³⁸ Lole u Chala alipa mubili ngati mo asalila, sona ku mphumba yonsi umubili wache. ³⁹ Imibili yonsi yitayanite. Mu malo mwache, pali umubili woka uwa munthu, umubili uwuyabo uwa vinyamana, umubili uwunji uwa viyuni, sona uwunji uwa nswi. ⁴⁰ Pali sona imibili iya kumwanya niya pa chisu cha pansi. Lole ubuchindamu bwa mubili wa kumwanya buli boka sona nu buchidamu bwa pa chisu bunji. ⁴¹ Pali ubuchindamu boka ubwa lizuba, nu buchindamu ubunji ubwa mwezi, po nubuchindamu bwa nthondwa. Pakuti ulunthondwa loka lutakuyana nizinyabo zyonsi mubuchindamu. ⁴² Po viyanite bwaka nukuzyuka ku bufwe. ⁴³ Cho chipesiwe chikukomanika, lole cho chazyusiwa chitakukomanika. Chipesiwe mo temwakwenelela; Chikupesiwa mubufoboke; chikuzyuka na maka. ⁴⁴ Chipesiwe mu mubili uwenecho; wukuzyuka nu mubili wa muzimu. Pala pali umubili uwenecho, po pali sona umuzimui uwenecho. ⁴⁵ Po visimbiwe,'' umunthu wa bwandilo u Adamu akiza aba mumi.'' U Adamu wabumalilo akaba muzimu umupela bumi. ⁴⁶ Lole umuzimu wutakiza pa bwandilo lole uwa bwaka, po uwabuzimu ⁴⁷ U munthu wabwandilo wa chisu, akapangiwa nilyongo, uwa bubili umunthu wa kumwanya. ⁴⁸ Ngati mo abelile yo akapangiwa ku lufumbi, momo babelile boba kapangiwa ku lufumbi, mo abelile uwa kumwanya, momo abelile u munthu wa kumwanya, momo babelile bo bali kumwanya. ⁴⁹ Ngati mo uswe tukapapiliwa mu chifwani cha munthu ukufuma ku lufumbi, po tukwiza ukukozya ichifwani cha munthu uwa kumwanya. ⁵⁰ Po nkhunena ichi, ba wamwitu, pakuti umubili ni daba vitangapyana ubukulu bwa Chala. Sona cho chinangikite chitangapyana pa cho chitanangikite. ⁵¹ Linga! Nkhukubuzya ivya chinsinsi cha bwanaloli: Te swebonsi tungafwa, loli swebonsi tukwiza ukusintha. ⁵² Tuli chenjiwa pa kabalilo, mukukapizya aminso, pipenga lya bumalilo. Po ipenga lililila, po abafwe balizyuka batanangikite, po tulichenjiwa. ⁵³ Pakuti umubili uwu komanikite uwu wubaghile wuvwale wo teghukomanike, posona umubili uwupuma uwu wuvwale wo teghupuma. ⁵⁴ Loli pala umubili wukomanikite uwavwala wotewukomanike, po numubili uwupuma wavwala wotewupuma, ukunena ko kusimbwa, '' Imfwa yamiliwa mu bupoti. ⁵⁵ '' Wemfwa ubupoti bwako buli kwiyi? ''Wemfwa, ulubolela lwako luli piyi? ⁵⁶ Ulubolela lwamfwa bo butula nongwa,po namaka gha butula nongwa lo lulaghilo. ⁵⁷ Loli amapalo ghache kwa Chala, yo akutupa ubupoti ukwizila mwa Mwene witu Yeso Kilisitu ⁵⁸ Polelo, ba wamwitu abaghaniwa, mwimilile lubilo sona kusita kuneng'ena. Akabalilo konsi mubombe imbombo ya Mwene, papo mumenye pati imbombo yinu mwa Mwene te ya pabwaka.