¹ Izya vyabupi vya muzimu, ba wamwitu, Nthakulonda mube bakusta kuvimanya. ² Mumenye pakuti po mukuputanga ivifwani, mukasobeziwa ni vifwani vyo vitakanenanga, mu nzila yiliyonsi vikabalamulilanga. ³ Polelo nkhulonda umwe mumanye pakuti nayumo yo akunena ukwizila mwa muzimu wa Chala anganena, '' U Yeso akulongiwa,'' penepapo akwizila mwa muzimu umuswepu. ⁴ Po pali ivybupe ivyakulekanalekana, loli uMuzimu ghoka. ⁵ Pali ubutumwa bwa kulekanalekana loli uMwene weka; ⁶ pali sona imbombo zyakulekanalekana, loli we Chala weka we akubomba mu zyonsi. ⁷ Po kwawensi kupeghiwe ivyakubonesya vya Muzimu ukuti abinji bapindule. ⁸ Pakuti kwa yumo ukwizila mwa Muzimu kupeghiwe amazwi aghamahala,na kwayunji amazwi ghakumanya chimo mwa Muzimu weka. ⁹ Kwayunji kupeghiwe ulwitiko mwa Muzimu uwunyene, na kwayunji ichabupe chakupozya mwa Muzimu weka. ¹⁰ Kwa yumo kupeghiwe imbombo zya viswigho, kwa yunji ukulotela. Kwa yunji kupeghiwe amahala ghakulekanalekana pakasi pa mizimu, kwa yumo indimi zyakulekanalekana, nakwa yunji ukung'anamulila indimi. ¹¹ Zyonsi izi mbombo zya weka sona uMuzimu, ghupa ivyabupi kwa aliwensi, ngati mo alondela. ¹² Pakuti umubili ghuli woka, sona ghuli ni vyinji sona ivyinji ivi vya mubili woka, po vili nu Kilisiti. ¹³ Pakuti mwa Muzimu weka swebonsi tukoziwa mu mubili woka, kali ba Yuda pamo ba Giliki, kali muzya pamo musatuke, bonsi bakapeliwa ukuti bang'we mu Muzimu weka. ¹⁴ Pakuti umubili wute nacho choka, loli ivyinji. ¹⁵ Pala ichinama chikuti, ''Pakuti tene nyobe, nthe poka nu mubili,'' pate cho techakulondiwa ku mubili. ¹⁶ Sona nanthi ikutu likuti tene linso, nthe poka nu mubili,'' Pala umubili wonsi wukabanga linso nge tukuvwila pighi? ¹⁷ Pala umubili ghonsi wukabangalikutu nge tukununsizya piyi? ¹⁸ U Chala abikite ichipeliwa cha pa mubili ichi na ichi ngati mo akalondela. ¹⁹ Nanthi vyonsi vikayananga, nge umubili wuli piyi? ²⁰ Po ulu vilipo ivipeliwa vya mubili ivyinji, loli umubili woka. ²¹ Ilinso litanganena ku nyobe ukuti, '' Nthakukulonda.'' Pamo umutu wutanganena ku vinama, ''Nthakukulonda.'' ²² Loli abanyabo ba mubili bo bafoka bakulondiwa, ²³ sona akapa mubili ko tukwinong'ona pakuti katachindikiwe, tukukapa inchindi izikulu, po sona vyo vitakubomba tukuvipa inkhalo. ²⁴ Po ivipeliwa vya pa mubili vyo vyiza nkhani vita kulondiwa ukuvipwelelela bunonyene hagha, po uChala apelite umubili ukuti ivipeliwa ivyansoni ukuti vipokele inchindi ku bo bakuvisoba. ²⁵ Akabomba ichi pati patakabe ukugabana nakumo pa mubili, loli pakuti wupwelelelane umwa kuyana bwaka. ²⁶ Po nanthi ichipeliwa cha pa mubili choka chikutamiwa, vyonsi ivpeliwa vikutamiwa poka, pamo pala ichipeliwa choka chikuchindikiwa, vyonsi vikuhoboka poka. ²⁷ Po mwe mubili wa Kilisiti sona weka mwa umwe chipeliwa cha mubili wula. ²⁸ Po u Chala asalite mu Chalichi abatumwa aba bwandilo, aba bubili baghonela, aba butatu bamanyisi, po bobo bakubombanga iviswigho, po ivyabupi vikupyola, bo bakwavwa, bo bakubomba imbombo ya bulongozi nabo bali ni ndimi zyalekanalekana. ²⁹ Ka bonsi batumwa? Ka bonsi baghonela? Ka bonsi bamanyisi? Ka bonsi bakubomba iviswigho? ³⁰ Ka bonsi bali ni vyabupe vya kupozya? Ka bonsi bakunena mu ndimi? Ka bonsi bakung'anamula indimi? ³¹ Bikani imyoyo yinu pa vyabupi ivyakuchindikwa. Lole inthi mbalangizye umwe inzila iyenecho iyiza.