¹ Mube bamanyili bane, ngati une mo mbelile mumanyili wa Kilisiti. ² Po nkhubapa umuchinzi umwe chifukwa mukunkhumbuka une mu chilichonsi. Nkhubapala umwe papo mukukola imyiko ngati mo nkhabapela. ³ Polelo nkhulonda ukuti mwivwisye ukuti u KIlisiti gho mutu wa munthu wensi, nukuti umwanalume gho mutu wa mwanakazi, napakuti u Chala weyo mutu wa Kilisiti. ⁴ Umwanalume wensi yo akwiputa pamo akulotela nu mutu wache gho ghuvwinkhiwe atakughuchindika umutu wache. ⁵ Polelo umwanakazi yo akwiputa pamo akulotela bo umutu wache ghutavwinkhiliwe akusamula umutu wache. Po chikuyana bwaka nukuti umutu wache ghumweliwe. ⁶ Po nanthi umwanakazi yo atakwiza ukukupikila umutu wache, abaghile ukudumula isisi lyache ukuti libe lifupi. Po nanthi chikumukozya insoni umwanakazi ukuti adumule isisi lyache pamo amwe, po avwinkhile umutu wache. ⁷ Umwanalume atabaghile ukuvwinkhila umutu wache, pakuti weyo chifwani nu buchindamu bwa Chala. Loli umwanakazi bo buchidamu bwa mwanalume. ⁸ Pakuti umwanalume atakapeliwa ukufuma ku mwanakazi. Mu malo mwache, umwanakazi akapeliwa ukufuma ku mwanalume ⁹ Napo panandi ukuti umwanalume akapeliwa wa mwanakazi. Mu malo mwache umwanakazi akapeliwa ukuba wa mwanalume. ¹⁰ Chochobene umwanakazi abaghile ukuti abe chimanyisyo mu mutu wache, chifukwa cha bangelo. ¹¹ Napopanandi, mwa Mwene, umwanakazi atangiyimilila pamwene ukufuma ku mwanalume, pamo umwanalume atangiyimilila pamwene ukufuma ku mwanakazi. ¹² Pakuti umwanakazi akufuma ku mwanalume, po momo vibelile umwanalume akufuma ku mwanakazi. Po ivinthu vyonsi vikufuma kwa Chala. ¹³ Mulonge mwebene: Ka chakulondiwa ukuti umwanakazi iputenge kwa Chala ativwinkhite ku mutu? ¹⁴ Ka akabele akene katakubamanyisya ukuti nanthi umwanalume ali nisisi ilitali, te chakughidikiwa ku kwache? ¹⁵ Ka akebele katakubamanyisya ukuti nanyhi umwanakazi ali ni sisi ilitali, bobo buchindamu bwache? Pakuti isisi likapeghiwa ku kwache ukuti limuvwinkhenge. ¹⁶ Loli nanthi alipo yumo uwakudalika pa ichi, tute nichakupanga ichinji, sona na ma Chalichi gha Chala ghope ghate nacho. ¹⁷ Loli pa ndaghilo izi, nthakubapala. Nanthi mwiza mwakomana, vitakwiza ukuba akiza loli akabibi nkhani. ¹⁸ Pakuti pabwandilo, nkhivwa ukuti po mwakomana poka mu Chalichi, pali ukugabinkhana mu mwinu, sona ku mbali yimo nkhusubalila. ¹⁹ Pakuti pangaba sona imbombo pakasi papinu, ukuti bo bali nu bwanaloli babe bakwivwisya mukasi mumwinu. ²⁰ Pakuti pala mwabungana, chitakuba chakulya cha chamabwila cho mukulya. ²¹ Po mukulya, aliwensi akulya ichakulya chache panthanzi pabanyabo bo bali ni chakulya chabo, yumo inzala yimubabite, sona po yumo akukolwa. ²² Ka mute ni nyumba izyakuti mungalyelamo pamo mungang'welamo. Ka mukusula i Chalichi cha Chala nukusula bo bate nacho nachimo? ka mukulonda mbabuzyechi? Ka mbapalenge? Nthangabapalapo pa ichi! ²³ Pakuti nkhapokela kwa Mwene pavyo nhkababuzya,pati uMwene u Yeso, pabusiku bo bakamupayikanga, akasenda ichibama. ²⁴ Bo apalizya, akachimensula nukunena ukuti, ''Ughu mubili wane, gho winu. Mubombe ichi pakuti munkhumbuke une.'' ²⁵ Munzila yilanyene akasenda u kapu bo alya ichakulya cha pachamabwila, akati, '' U lupindi ulu kupangana ukupya mwidaba lyane. Mubombenge ichi po mukung'wa, pakuti munkhumbukenge une.'' ²⁶ Pakuti akabalilo konsi ko mukulya ichibama ichi nukung'wa ulupindi ulu,mukulumbilia ubufwe bwa Mwene mpaka po alizila. ²⁷ Polelo, wensi, yo akulya ichibama unukung'wa ukomeji wa Mwene mu nzila yo yitabaghilile akunangila umubili wache ni daba lya Mwene. ²⁸ Wensi ilinge tasi mwene, po munzila iyi alye ichibama nukung'wa ukomeji. ²⁹ Pakuti yo akulya nukung'wa kusita kwilinga akulya nukung'wa ubulonzi bwache. ³⁰ Chochobene abinji mwa umwe bafokite nu kulwala, na bamo mu mwinu baghonite utulo ³¹ Loli nanthi wiyaghania swebene, tutalilongiwa. ³² Loli pala tulilongiwa nu Mwene, tukuba ba nkhalo pakuti tutakalongiwenge ni chisu. ³³ Polelo, ba wamwitu, nanthi mwiza poka, ukuti mulye mulindililane. ³⁴ Pala yumo inzala yamubaba, alye pakaya, ukuti nanthi mwiza poka manye vibenge vyakulongiwa. Sona ivinthu ivinyabo vyo mukasimba,ndibapa indaghilo po niza.