¹ Bo u mwene wa chikaya cha Kenani ku Arad, yo akikalanga ku Negev, bo ivwa ukuti u Isreal akwenda mu musebo uwakuya ku Atharim, akalwa ubwite mu Isreal akamupoka na banthu bamo. ² U Isreal akalambilizya kwa Yahweh ukuti, '' Pala ungatupa ubulamulili pa banthu aba, po tukuya pakomania utwaya tonsi utukulu.'' ³ U Yahweh akivwa amazyu gha Isreal nukubapa ubulamulili pa banthu ba ku Kenani. Bakabanangania sona nu twaya twabo utukulu. Amalo ghala ghakitikiziwa izina lya Hormah. ⁴ Bakenda ukufuma pachipili cha Hor ukwenda mu musebo mphaka ku nyanja iyikulu iya Reeds pakuya pazungulila ichisu icha Edom. Abanthu bakugongowesiwa munzila. ⁵ Abanthu bakanena akabibi kwa Chala na kwa Moses: '' Choni cho mwatufumia ku Egypt ukuti tufwile muno mu nkholongo? Mute ivibama, aminzi, sona tutakulonda ichakulya ichibibi chino.'' ⁶ Po u Chala akatuma injoka zya nsalile mu banthu bala. Muchikaya injoka zikaluma abanthu; Abanthu abinji aba Isreal bakafwa. ⁷ Abanthu bakiza kwa Moses bakati, ''Twananga imbibi chifukwa twanena akabibi kwa Yahweh na ku kwako. Iputa kwa Yahweh ukuti azifumie injoka kukwitu.'' Po u Moses akabiputila abanthu. ⁸ U Yahweh akanena kwa Moses, '' Yipange injoka po uyimatike kulupanda. Chikwiza ukuchitika ukuti wensi yo yimulumite akwiza ukupona, pala akuyilingisya.'' ⁹ Po u Moses apanga injoka yabulozi nukuyimata kwipanda. Pala injoka yamuluma yumo , pala alinga panjoka yabulozi , akupona. ¹⁰ Po abanthu bakenda nukubungana pa buyo bwa pa Oboth. ¹¹ Bakenda ukufuma pa Oboth nukuya pakubungana pa Iye Abarim mu nkholongo yo yilinganite nu Moab kubufumilo bwi zuba. ¹² Ukufuma palanyene bakenda nukuya pakubungana pikombe ilya Zered. ¹³ Ukufuma pala bakenda nukuya pakubungana kumbali iyabo iya lusoko lwa Arnon, yo yili mu nkholongo yo yikupululila ku mphaka ya Amorites. Ulusoko lwa Arnon lukugaba imphaka ya Moab, sona pakasi pa Moab nu Amorites. ¹⁴ Chocho chifukwa vikasimbiwa mu ma bukhu gha bwite gha Yahweh, ''...Zahab mu Saphah, na mwikombe ilya Arnon, ¹⁵ ubughulumuka bwa mwikombe ukuya ku kaya akakulu aka Ar nukughona kumphaka kumphaka ya Moab.'' ¹⁶ Ukufuma pala bakenda nu kuya ku Beer, pachifula cho u Yahweh akanena kwa Moses, '' Babunganike abanthu poka pakuti mbape aminzi.'' ¹⁷ Po u Isreal akimba ulwimbo luno: ''Izula uwe, uwe Chifula! Imba mwakukwamfania nacho, ¹⁸ ichifula cho abalamulili bitu bakakumba, ichifula cho abenekaya bakakumba ni nkhomo zyabo izyakwendela.'' ¹⁹ Ukufuma kwa Mattanah bakenda ukya ku Nahaliel, sona ukufuma kwa Nahaliel bakaya kwa Bamoth, ²⁰ sona ukufuma kwa Bamoth bakaya kwikombe mu chisu cha Moab. Popo po pamwanya pa Chipili cha Pisgah cho chili mu nkholongo. ²¹ Po u Isreal akatuma inthumi kwa Sihon umwene wa ba Amorites nu kuti, ²² '' Twitikizye tudumunsanie mu chisu chako. Te tuye tulingisyepo iminda yinu ni minda ya vikomwa vinu. Tu takuya pakung'wapo aminzi ghinu agha muvifula vinu. Tukuya pakwenda mu musebo gho ghukuya kwa mwene winu mphaka tuloboke imphaka yinu.'' ²³ Loli umwene wa ku Sihon atakitikizya pakuti bize badumuasanie mu mphaka yabo. Mumalo mwache, u Sihon akabunganika aba silikali poka nakaya ka mu nkholongo nu kulimbana na ba Isreal. Bakiza ku Jahaz, kobakalya nukulimbana nu Isreal. ²⁴ U Isreal akalwa ubwite na basilikali ba Sihon na banthu bache nu kusenda ichisu chabo ukufuma palusoko lwa Arnon mphaka ku lusoko lwa Jabbok, ukupululila mphaka ku banthu ba Ammon. Ilelo imphaka ya banthu ba Ammon bakayizungulila nukuzigha imphaka na maka. ²⁵ U Isreal akasenda utwaya utukulu tonsi utwa ba Amorite nukwikala mulanyene, nu kongania nu Heshbon nu twaya twache tonsi. ²⁶ U Heshbon kakaba kaya akakulu mu Sihon umwene wa ba Amorites, yo akalwapo ubwite nu mwene umutanzi uwa ba Moab. U Sihon akasenda akaya konsi mutuvigaba twa kulusoko lwa Arnon. ²⁷ Chocho chifukwa bo bakunena muvili bakati, '' Zanga ku Heshbon. Kaleke akaya aka Sihon kazengiwe sona. ²⁸ U moto ghukaka ku Heshbon, ukulilila kwa moto kukafuma mu kaya aka Sihon ghukocha akaya akakulu aka Ar mu Moab, sona nabenecho aba malo ghapamwanya agha Arnon. ²⁹ U tondwe uwe, we Moab! Wamala, abanthu ba ku Chemosh. Apanga abana bache ukuba bazya sona na bana bache bonsi abanakazi ukuba ba kayidi ba Sihon umwene wa ba Amorites. ³⁰ Loli twapota u Sihon. U Heshbon akomanikite mphaka ku Dibon. Twabanangania mphaka ku Nophah, yo akufika mphaka kwa Medeba.'' ³¹ Po u Isreal akanda pakwikala mu chisu cha ba Amorites. ³² Po u Moses akatuma abanthu pakulinga kwa Jazer, bakasenda utwaya twache nukubasamazya aba Amorites bo bakaba kulanyene. ³³ Po bakang'anamuka nu buka kululu ku musebo wa Bashan. Og u mwene wa ku Bashan akandana nabo, umwene na ba basilikali bache bonsi, ukulwa nabo pa Edrei. ³⁴ Po u Yahweh akanena kwa Moses, '' Mutakamoghope chifukwa na bapa ukupota papache, na basilikali bache, nichisu. Mubombe ngati momukamubombela u Sihon umwene wa ba Amorites, yo akakula ku Heshbon.'' ³⁵ Po bakamukoma, na bana bache , na basilikali bache, bosi mpaka nayumo yumo uwa banthu bache yo akasyalikila. Bonsi bakafwa po bakasenda ichisu chache.