¹ Po a banthu ba mu Isreal, ichikaya chonsi, ba kabuka mu nkholongo ya Zini umwezi ubwa bwandilo; bakikala pa Kadesh. U Miriam akafwa palanye nukumusila palanyene. ² Kutakabako aminzi naghamo ghamo agha chikaya, po bakabungana poka nukulimbana nu Moses nu Aaron. ³ Abanthu bakadandaula kwa Moses. Bakati, ''Chikaba chizapo pala tukafwila poka na ba Isreal abanyitu bo bakafwa panthanzi pa Yahweh! ⁴ Choni cho batatwala ichikaya cha Yahweh mu nkholongo muno ukuti bafwile munonyene, uswe nivitekiwa vitu? ⁵ Choni cho akatufumwanga mu Egypt ukwiza ukututwala mu chisu cha nthamio chino? Mute na malo agha mbeyu, imikuyu, ni vikomwa, sona mute na minzi aghakung`wa.'' <sup>6</sup> Po u Moses nu Aaron bakabuka ukufuma panthanzi pa lukomano. Bakabuka pa bwinjililo bwa chisakasa cha lukomano nu kwinama pansi ni vyeni vyabo. Palanyene ubu chindamu ubukulu ubwa Yahweh bukabonekela kukwabo. <sup>7</sup> U Yahweh akanena kwa Moses akati, <sup>8</sup> ''Senda inkhomo nu kubunganika ichikaya, uwe , nu Aaron uwamwinu. Nena ku libwe panthanzi pa manso ghabo sona ulamule ukuti lifume aminzi. Inthi ufumye aminzi ghabo ukufuma pabwe lilanye, sona ubaghile ukuchipa ichikaya ni vitekiwa vyabo ukuti bang`we.'' ⁹ U Moses akasenda inkhomo yache ukufuma panthanzi pa Yahweh ngati mo u Yahweh akamulamulila umwene ukuti abombe. ¹⁰ Po u Moses nu Aaron bakabunganika ulukomano panthanzi pibwe. U Moses akababuzya akati, '' Ulu teghelezya, mwe ba bakung'ànamukila. Tubaghile ukufumia aminzi ukufumila pibwe ukuti mung'we?'' ¹¹ Po u Moses akimika inyobe nukuma pibwe kabili ni nkhomo yache, po aminzi aminji ghakafuma. Ichikaya chikang`wa, sona ni vitekiwa vyabo vikang`wa. ¹² Po u Yahweh akanena kwa Moses nu Aaron, '' chifukwa mutakasubalila pamo nu kuntchindika ngati muswepu pamaso gha banthu ba Isreal, te mukabike sona ulukomano ku chisu cho nabapa.'' ¹³ Amalo agha baghitizya ukuti aminzi agha Meribah chifukwa abanthu bamu Isreal bakalimbana nu Yahweh, sona akilongizya mwene ku kwabo ukuti muswepu. ¹⁴ U Moses akatuma abanthu abatumiwa ukufuma ku Kadesh kwa mwene wa ku Edon: Uwamwinu u Isreal akunena ichi: '' Mubumenye ubupalapala bo babwagha mwa uswe. ¹⁵ Muzimenye ukuti abanyenya binu bakaya ku Egypt sona bakikala ku Egypt pakabalilo akatali. Aba ku Egypt bakatunyazya nkhani sona na banyenya bitu poka. ¹⁶ Bo twitizya u Yahweh, akivwa amazyu ghitu sona akatutumila uwa nthumi nukutufumia mu Egypt. Linga, tuli mu Kadesh, mukaya akakulu ku mpaka ni chisu chinu. ¹⁷ Nkhukulenga utwitikizye ukuti twize tupulunsanie mu chisu chinu. Tetukize twende mu minda yinu, pamo mu mayadi gha vikomwa pamo na pakung`wa aminzi ghinu muvifula. Tukwiza pakwenda mu musebo ubukulu ubwa kwa mwene. Te tukang'ànamukile ku mbali kunyobe iyandyelo pamo iyamongo mpaka po twaloboka impaka yinu.'' ¹⁸ Loli umwene waku Edom akabamula akati, ''Mutabaghile ukupulusania muno. Pala muchibomba, Nkhwiza ukwiza ni chipeni pakubakola umwe.'' ¹⁹ Po abanthu ba mu Isreal bakanena kukwache, ''Tukwiza ukwenda mu musebo umukulu. Nanthi uswe pamo ivitekiwa vitu twang'wa aminzi ghinu, tuliza tulipile. Twitikizye bwaka tupulusanie ulwa pansi, ukusita kubomba nachimo chimo.'' ²⁰ Loli umwene waku Edom akamula akati, ''Mutabaghile ukupulusania.'' Po umwene wa ku Edom akanda pakulimbana na ba Israel ni nyobe na ba Silikali abinji nkhani. ²¹ Umwene uwa ku Edom akabakanila aba Isreal pakupuluusania pampaka yabo. Pa chifukwa chino, aba Isreal bakachenja inzila iyakwendela ku Edom. ²² Po abanthu bakenda ubulendo ukufuma ku Kadesh. Abanthu ba ku Isreal, ichikaya chonsi bakiza pachipili cha Hor. ²³ U Yahweh akanena kwa Moses nu Aaron pa chipili cha Hor, pa mpaka zya ba Edom. Akati, ²⁴ '' U Aaron abaghile ukubunganika abanthu , pakuti te ize injile mu chisu cho nkhabapa abanthu ba Isreal. Ichi chifukwa chakuti mwebonsi umwe babili mukalimbana nizwi lyane pa minzi gha Meribah. ²⁵ Musende u Aaron sona nu Eleazar umwana wache, mwize nabo kumwanya ku chipili cha Hor. ²⁶ Senda imyenda iyakwiputizizya iya Aaron mumuvule mumupe u Eleazar umwana wache. U Aaron abaghile ukufwa sona abungane na banthu poka palanyene.'' ²⁷ U Moses akapanga ngati mo U Yahweh akamubuzizya. Bakabuka kumwanya ku chipili cha Hor kumbali ya banthu bonsi aba muchikaya. ²⁸ U Moses akasenda imyenda ya Aaron iya buputi nu kumuvula nu kumupa umwana wache u Eleazar. U Aaron akafwila palanyene pa chipili pamwanya. Po u Moses nu Eleazar bakisika ichipili. ²⁹ Bo abanthu bonsi abamuchikaya balinga ukuti u Aaron afwa, inyumba yonsi iya Isreal yikalila u Aaron kwa masiku sate.