¹ Po ulu, u Isilayeli, ivwisya kundaghilo sona zyo nkhulonda nkhumanyisye, ukuti ubombe; ukuti wikale nukubukamo sona nukusenda akaya ko u Yahweh, u Chala watata bako, akukupa. ² Tewonjelezyepo kumazyu gho nakulamulila, ukuti usunge indaghilo zyo zya Yahweh u Chala wako zyo indi papipi pakupa. ³ Aminso ghako ghalinga vyo u Yahweh akabomba chifukwa cha Baal Peor; pakuti kubanthu bonsi bo bakamukonkha u Baal wa Peor, u Yahweh u Chala wako abakomania ukufuma kukwako. ⁴ Loli umwe mwe mukukonkha u Yahweh u Chala winu mwebabumi ilelo, wensi wa umwe. ⁵ Linga, nakumanyisya indaghilo sona nukwisika, ngati mo u Yahweh u Chala wane andamulila, ukuti ubombe ubunyene mukasi mu kaya ko ukubukamo ukuti uye wikalemo. ⁶ Polelo zisunge sona uzibombe; pakuti agha mahala ghako sona kwivwisya kwako kubanthu bo inthi bakivwe izya mbili yinu nukunena ukuti, 'Naloliloli ichisu ichikulu ichi muli abanthu bamahala sona aba kwivwisya.' ⁷ Ka pakuti nga chisu buli ichinji ichi cho chilipo mo muli u Chala papipi hee nabo, ngati mo u Yahweh u Chala witu abelile akabalilo konsi ko twamwitizya? ⁸ Ka Chisu buli ichinji cho chikulu chili nindaghilo sona nubulamulilo ubwiza hee ngati lulaghilo lonsi ulu lo indi pakubika papinu ilelo? ⁹ Muteghelezye bwaka sona musunge akiza mwebene, ukuti mutakaluvye ivinthu vyo mwavilinga na minso ghinu, ukuti bata kaleke imyoyo yinu ubumi bwinu bonsi. mubamanyisye abana binu sona nabana ba bana binu. ¹⁰ Pisiku lyo mukimilila paminso pa Yahweh u Chala winu ku Horeb, po u Yahweh akanena kukwane, ' Mbunganizye abanthu bane, po ndipanga ukuti bivwe amazyu ghane, ukuti bamanyile pakunoghopa amasiku ghonsi gho inthi bikalile pachisu, sona nukuti bamanyisye abana babo.' ¹¹ Mukiza papipi nukwimilila pa chinama cha chipili. Ipili likaka umoto ku moyo wakumwanya, nichisi, ibingu, sona nichisi ichikulu. ¹² U Yahweh akanena kukwinu ukufuma pakasi pa moto; mukivwa ichongo namazyu ghache, loli mutakalinga nachimo, mukivwa bwaka ichongo chene. ¹³ Akalonda kwa umwe ilaghano lyo akabalamula ukuti mupange , Indaghilo teni. Akasimba pambali zibili izi pibwe. ¹⁴ U Yahweh akandamula pakabalilo kalanyene ukuti mbamanyisye sona nindaghilo, ukuti mubombe mu kaya ko mukwendamo ukuti musende kabe kinu. ¹⁵ Po mwilingisye mwebene---pakuti mutakalinge nachimo pisiku lyo u Yahweh akanena kukwinu ku Horeb ukufuma pakasi pa moto---- ¹⁶ Pakuti mutakipusike mwebene sona ukuti mubanze ichinthu chimilile chimo, ukuyana numwanalume pamo numwanakazi, ¹⁷ ukuyana nichinyama chimo pa chisu, ukuyana nichiyuni ichamapapande chochikubuluka mumwanya, ¹⁸ Ukuyana na chilichonsi chochikutaba pa chisu, pamo ukuyana ni nswi yoyili muminzi pansi pa chisu. ¹⁹ Mutakinule aminso ghinu kumwanya sona nukulinga kwizuba, umwezi, pamo inthondwa----nachosi cho chili kumwanya mufumako kunyiputo nukudokela-----ivinthu vyo u Yahweh u Chala winu avigaba kubanthu bosi pachisu. ²⁰ Loli u Yahweh abasenda umwe sona abafumia muchibwina ichamoto ichachela, ukufuma mu Ijiputi, ukuti mube kukwache umunthu wa mpyana yache, ngati mo mubelile ilelo. ²¹ U Yahweh akankhalalila chifukwa cha umwe,' akalapa ukuti temphululile u Yolodan, sona nukuti tenjeko ku kaya akiza ko u Yahweh u Chala winu akabapa ngati mpyana. ²² Loli, nfwile mu kaya kanonyene; Nthakapululile u Yolodani. Loli inthi upululile sona inthi muye musende akaya akiza kala. ²³ Mwipe umuchinzi mwebene, ukuti mutakaluvye ilaghano lya Yahweh u Chala winu, lyo akalaghana numwe, po mupange ichakubanza ichaluko lulilonsi cho u Yahweh u Chala winu abakanila pakuti mupange. ²⁴ Pakuti u Yahweh u chala winu gho moto uwakunyeka, u Chala wa kabini. ²⁵ Po mukuba nabana sona nabana babana binu, sona napo mwiza mwaba mu kaya akabalilo akatali, po pala mwipusika mwebene nukupaya ichakubanza ichaluko lonsi nukubomba ichibibi paminso gha Yahweh u Chala winu, ukuti munyamusye ubukalale bwache---- ²⁶ Nkhwitizya kumwanya sona nichisu ukuti chindongele ilelo ukuti lululu inti mukomanike nukufuma mu kaya ko mukubukako koti mwapululila u Yolodani, temukikale amasiku ghinu mulanyene, loli inthi mukakomanikile nzila. ²⁷ U Yahweh inthi akabasasye mubanthu, po inthi mukasyale banandi muvisu vyonsi mo uYahweh alibatanjilila. ²⁸ Mulanyene mukwiza ukwiputa aba chala abinji, imbombo zya nyobe ya banthu, ikomo nibwe, vyo vitakulinga, vitakwivwa, vitakulya , pamo ukunusya. ²⁹ Loli ukufuma kula mulilonda u Yahweh u Chala winu,sona po mulimwagha, pala mulimulonda nu moyo winu wonsi sona numuzimu winu. ³⁰ Po mwatamiwa, sona po nivinthu vyonsi viliba viza papipu, mu masiku aghanyene, mulinyokele kwa Yahweh u Chala winu nukwivyisya kwizwi lyache. ³¹ Pakuti u Yahweh u Chala winu we Chala wa chisa; te akapotwe pamo ukubakomania, pamo ukuluvya ipangano lyo akalapila kuba tata binu. ³² Lalusyani lelo izya masiku gho gabuka, gho ghakabako, bo akabalilo kinu katafikite, ukufuma pisiku lyo u Chala akapela umunthu pa chisu, lalusya ukufuma kumbali iyabumalilo bwa kumwanya mpaka ku bunji, pala kukabako ichikulu ngati ichi, pamo pala chimo ngati ichinyene chikivwikapo? ³³ Umunthu ivwilepo izwi lya chala likuneniwa mukasi mu moto, ngati mo mwivwila, sona nukwikala? ³⁴ Pamo u Chala ayezizye lumo pakubuka ukuti isendele mwene ichisu ukufuma pakasi pa chisu ichinyabo, mungelo, mu vimanyisyo sonanamuvisyigho sona namubwite, mu nyobe iyamaka, inyobe iyakuwolosiwa, namuvyakuboneka ivikulu, ngati chilichonsi cho u Yahweh u hala winu akababombela mu Ijiputi paminso ghinu? ³⁵ Kukwinu ivinthu ivi vikaboneka, ukuti mumumanye u Yahweh u Chala winu, nukuti patalipo nayumo uwakuyana nawe. ³⁶ Ukufuma kumwanya akapanga ukuti mwivye ichongochache, ukuti abape indaghilo; pachisu akapanga ukuti mulinge umoto uwukulu; mukivwa amazyu ghache mukasi mu moto. ³⁷ Chifukwa akabaghana aba tata binu, akasala aba lunyungu lwabo bo abene bafumapo, nu kubafumia mu Ijiputi nukubapo kwache, na maka ghache aghakulu, ³⁸ Ukuti bafumie kukwinu ichisu ichikulu ni chamaka ukulusya umwe, ukuti umwe mwinjile, ukuti babape akaya kabo ngati chakupyana, ngati lyo lilelo. ³⁹ Po ilelo mumanye, sona chibe mumyoyo yinu, ukuti u Yahweh uChala kumwanya sona napasi pachisu; patalipo uyunji nayumo. ⁴⁰ Inthi musunge vyonsi vyo muli navyo poka nindaghilo zyo nkhubapa ilelo, ukuti vibendele akiza sona nabana bo bakwiza pasinda pinu, ukuti monjelezye amasiku ghinu mukaya ko u Yahweh u Chala winu akubapa aka bwile na bwile.'' ⁴¹ Po u Mozesi akasala utwaya utukulu tutatu kubufumilo bwizuba bwa Yolodan, ⁴² ukuti yumo asamale ku weka wa babo pala akoma umunyabo umwangozi, we atakaba mulwani wache ukufuma kale. Pakusamalila kutwaya tutatu utukulu utu ukuti abe nubumi. ⁴³ Kukaba: u Bezer munkholongo, mu chisu mo mutakaba nachimo, pakuti abina Rueben; Ramoth mu Gilead, kuba Gadi, sona naba Golan mu Bashani, kuba Manase. ⁴⁴ Ulu lolo lulaghilo lo u Mozesi akabika kubanthu aba Izilayeli; ⁴⁵ ivi vikaba ivyakubanza ivya pangano, indaghilo, ni vyakale vyo akanena ku banthu aba Izilayeli bo biza ku Ijiputi, ⁴⁶ bo bali kubufumilo bwizuba bwa Yolodani, mwikombe lya kupipi ku Beth Peor, mukaya ka Sihoni , umwene wa ba Amorites, bo bakikalanga mu Heshiboni, bo u Mozesi na banthu ba Izilayeli bakabapota bobafuma mu Ijiputi. ⁴⁷ Bakasenda akaya ngati chuma chabo, sona nakaya ka Ogi, umwene wa ba Bashani---aba, abamwene babili aba Amorites, bobakaba kunthanzi kwa Jolodani kupipi nakubufumilo bwizuba. ⁴⁸ Akaya aka kakafuma ku Aroer, kubumalilo bwi kombe iya Arnon, ukuya kwipili lya Siyoni{ pamo ichipili icha Helimoni}, ⁴⁹ nukusanzya poka nubuyo momute nakamo ubwa ikombe lya lusoko lwa Jolodani, kubufumilo bwizuba ukupululila u Jolodani, kunyanja iyikulu iya Arabah, kuvighulumuka vya chipili cha Pisgah.