¹ kan intakum gum ma al Mesih, fetisu takum hajat ta fok, ze al Mesih bi geni fi idan yemin ta Allah. ² Fekiri takum be hajat al fok, ma be hajat ta ardiya. ³ Ashan intakum mutu, wa haya takum kati be al Mesih fi Allah. ⁴ kan al Mesih ja beinu, wa Huwo yau haya takum, kaman itakum bi beinu ma Huwo fi mejid. ⁵ Katulu takum hajat al bi juru itakum wara fi duniya, Zina, Najasa, Niyat ta jisim, Shahwat al batal, wa Shukul Tama, al huwo yau ibada ta asnam. ⁶ Ashan be sabab ta hajat del zalan ta Allah bi nenzil le iyal ta katia. ⁷ Fi hajat del itakum kan douru, wokit itakum kan aishin fogo. ⁸ Lakin hasa kede itakum agilau bar hajat del kulu. Waja gelba, Zalan, Niyat al batal, Sitima wa Kalmat al batal al bi tala min kasma takum. ⁹ Mata takum gata suwata fi zol tani, kan sei itakum agilau zol algedim dak be hajat bito, ¹⁰ wa itakum libisu zol al jedid al bi geni jedid fi marfa hasab sura ta Zol al kalagu huwo. ¹¹ De yau bi wori fi huwo mafi ferig beina de Yonani wole de Yahudi. de Teheru wole de ma teheru. Ajnebi, wole ma ajnebi. Abid, wole ma abid, lakin al Mesih wau kulu wa fi kulu. ¹² Libisu takum daiman ze nas al Allah yau ikhtaru kedisin wa mahbubin, mashair ta Rahma, Amulu kweis le nas, Hanan, Tawadu wa Sobur. ¹³ Kede itakum arfau bad takum. Afi takum le bad takum, kan fi zol indu shokuwa did zol tani, ze Rabuna afi le itakum kaman kede itakum afi le zol tanin. ¹⁴ Fok kulu hajat del, libisu takum Muhaba, de yau habil al bi wori itakum timu ¹⁵ Kede salam ta al Mesih hukumu fi gulub bitakum. ashan fi salam de nadi itakum fi jisim al wahid. Rija takum shukuran. ¹⁶ Kede kelima ta al Mesih hai fi itakum be ganian. be kulu hikma, alimu wa anziru badun takum be mazamir wa tesbihat wa gunat ta roho. Guna takum be wodi shukuran fi gulub bitakum le Allah. ¹⁷ Ai hajat al kan itakum bi amulu, kan be kalam wole be shokol, amulu takum kulu be isim ta Rabuna Yesuah. wodi takum shukuran le Allah al Abu be wasat bito. ¹⁸ Ya Nuswan, Nezilu badun le rujal takum ze deiru fi Rabuna. ¹⁹ Ya Rujal, hibu takum nuswan bitakum, wa matkum geni tekiyanin ma humaon. ²⁰ Ya Awlad, amulu takum kulu hajat al abu takum yau kelimu, de deiru fi Rabuna. ²¹ Ya Abuhat, matakum zalanu iyal ashan kede ma karabu. ²² Ya Kadamin, amulu takum kulu hajat al sidi takum fi jisim deir kede amulu. ma bes ashan nas bi aynu, lakin be gelba kuwes. kafu takum Rabuna. ²³ Ai hajat intakum bi amulu, amulu takum min juwa gelba ze intakum bi amulu le Rabuna ma le nas. ²⁴ Arufu takum gali intakum bi ligo ujura ta worisa min Rabuna. Ashan intakum bi kadimu le Rabuna al Mesih. . ²⁵ Ai zol al bi amulu hajat batal bi ligo ikab ta hajat batal al huwo amulu, bidun ai mujamala