¹ Ana deru kede itakum arufu godur shunu taab tai le itakum, wa le nas alfi Laudukia wa kaman del al ma sufu ana wusa fi wusa. ² Ana ishtakal ashan kede humon ligo teshji fi gulub tomon ma limu sawa fi muhaba. wa fi ganian wa takid al faham al kamil, fi marafa sir ta Allah al fi Mesih. ³ Fi Huwo dusu kulu kunuz ta marafa wa ta hikma. ⁴ Ana kelim kalam de ashan mafi zol tani kede kabasu itakum be ai kalam barau. ⁵ Sala kan ana mafi be itakum fi Jisim, lakin ana fi ma itakum fi Roho. ana mokosot kan ana bi ainu itakum bi geni be nizam, wa itakum bi geni gowi fi Mesih. ⁶ Ze ma itakum rudu Masiah Rabuna, douru takum fi Huwo. ⁷ kede juzur takum lesegu gowi, wa kede itakum abinu fogo Huwo , wa kede asisu itakum fi Iman. ze alimu itakum be shukuran. ⁸ Kutu takum bala ashan kede mafi zol tani kabasu itakum be falsafa bito al batal. wa be kalamat tanin al farig ze ta tagalid ta nas. al bi tifagu ma hajat ta dunia, wa ma bi tafigu ma al Mesih. ⁹ Ashan fi Huwo Allah hai be lahut bito. ¹⁰ Malau itakum fi Huwo, Huwo yau ras ta kulu guwa wa sulan. ¹¹ Teheru itakum fi Huwo be teheru al ma amulu be nas be gatau gilid ta jisim, lakin be teheru ta al Mesih. ¹² Dofunu itakum ma Huwo fi mamudia, wa goumu itakum fok be wasat Iman fi guwa ta Allah. al goumu Huwo mara wahid min mutu. ¹³ Zaman itakum kan meitin fi katia takum, wa lisa kan ma teheru itakum, Huwo kutu itakum hai sawa ma Huwo wa kaman afi le nina katiat ta nina. ¹⁴ Huwo masa dein al katibu le nina wa gawanin al did nina. Huwo agilau wa dugu be musmar fi selib. ¹⁵ Huwo agilau silahat kulu min nas al indum guwa wa alfi sulta, wa beinu fadia tomon bara, wa gilibu humon fi Selib, ¹⁶ Wa ashan kida, kede mafi zol hukumu inta fi kalam akil wole fi kalam shirab, wole kaman fi kalam ta Eid aw bidayat ta shuhur wa kalam ta yom Sebit. ¹⁷ Del kulu dulu ta hajat al bi ja hasil. lakin al jisim yau al Mesih. ¹⁸ Kede ma abusu itakum min ligo hadia takum, ma shikil zol al deir beinu gali huwo yau mutuwadi wa bi seli le malaikat, wa bi dakalu fi aynu hajat al bi woduru huwo, huwo bi mofugu bidun sabab be fikra bito ta jisim. ¹⁹ Huwo ma gobudu gowi fi ras. Ras al bi wodi akil fi jisim kulu, wa bi robutu jisim sawa be mafasil wa aasab, ashan bi raba tamam ze raba al Allah yau wodi ²⁰ Kan sei itakum mutu sawa ma al Mesih wa min hjat kulu ta Dunia, leh itakum lisa bi geni ze kan itakum fi Dunia. ²¹ Mata takum amsuku, mata takum jeribu, wa mata takum lemesu. ²² Kulu hajat del jahizu ashan bi demiru nas kan istamilu, ashan nizamu hasab awamir wa talimat ta Insan. ²³ Nizam ze del indu hikma al salau be jisim wa be tawadu wa .batal ta jisim. Lakin humon ma indu wozin ashan bi agder woduru jisim