¹ Dahi mena datang selisih, bekelai, dientaha kian? Ukan meh behasal dahi pengemauk nuan yang jat tehadap sesama uhang yang pecayak? ² Nuan mauk tapi nuan nda tulih pakai iya. Nuan munuh alu ngunjah, tapi nuan nda ugak tulih pakai iya, nuan ngelawan, kian pun bekelai. Nuan pun nda tulih kai ia kehena nuan nda mintak. ³ Nuan mintak alu nuan nda nehimak, kehena nuan mintak hal- hal yang jat, sepaya nuan tau nguna iya paakai pengemauk nuan yang nda bait ⁴ Oi,nuan yang mauk bejinah! nda ketau meh nuan, bahwa bekaban dengan dunia ituk heti iya bemusuh dengan Allah? jadi bahang sepa yang mauk bekaban dengan dunia, ia ngawai dihik jadi musuh Allah. ⁵ Atau apa nuan nganggap pirman iyak sia- sia?, Ruh yang diam alam kita palin cembuhu. ⁶ Tapi Allah mehik kasih kahunia yang lebih besah. Iyak meh sebab pirman Allah bandai," Allah nemauk mantau uhang sumbung, tapi mehik kasih kahunia ahung uhang yang hendah ati." ⁷ Kehena iyak, tunduk meh ahung Allah. Lawan meh iblis, ia akan nda behani nampin nuan. ⁸ Dampin meh Allah, Ia akan nampin nuan. Basuk meh tangan nuan, nuan uhang yang bedusa, behesih meh ati nuan, oi nuan yang agik hagu. ⁹ Besedih meh, ensidak, dan nangis meh! Ubah meh ketawak nuan dan pehambik nuan jadi penyedih. ¹⁰ Hendah meh dihik nuan dadap Tuhan, Ia pasti ngangkat nuan. ¹¹ Anang bandai encela uhang lain, bala kaban. Uhang yang encela atau uhang yang ngehakim kaban iya, ia nentang ukum Allah, dan ngehakim ukum Allah. Entik nuan ngehakim ukum Allah, nuan nda ngimbai ukum Allah, tapi ngehakim ukum Allah. ¹² Hanya sutik yang mehik dan ngehakim ukum, iyak meh Allah, yang mampu nyelamat dengan ngebinasa. Sepa meh nuan yang tau ngehakim sesama kian? ¹³ Maka dinga meh ituk, nuan yang bandai," Ahi ituk atau pagi kami jekak kekuta, selamak setaun kami diak, dan bulih untung." ¹⁴ Sepa yang ketau apa yang tejadi ahi pagi, dan apa sebenah iya heti idup nuan? Empadai nuan baka kabut yang keliat sekejit alu nisik keliat agik. ¹⁵ Seahus iya nuan bandai," Entik Tuhan nyuhuh, kami akan idup alu bekeheja iyak ituk." ¹⁶ Tapi pituk nuan nyumbung dihik tentang padak hencana nuan. Yang nyumbung dihik baka iyak meh yang jat. ¹⁷ Jadi untuk uhang yang tau bebuat bait tapi nda ngelaku iya, maka ia bedusa.