¹ Kituk meh nuan yang kaya, nangis dan ensidak meh, kehena pemedih akan datang ahung nuan. ² Pengaya nuan udah buhuk dan utan yang dipakai nuan udah dimakan sampuk. ³ Emas dengan pihak nuan udah nisik beguna, kahat iya jadi saksi nuan. Nuan akan makan dagin nuan baka api. Nuan udah ngumpul heta nuan di ahi- ahi pengabis. ⁴ Pantau meh, upah padak pekeheja yang nganyi diuma nuan nangis, yang napan dibayah nuan udah betumbau! Tumbau sidak udah datang ke kelindang Tuhan yang empu anyi. ⁵ Nuan udah idup miwah alam dunia alu ngemanja dihik nuan. Nuan udah nyuhuh gemuk ati nuan pakai ahi pembinasaan. ⁶ Nuan udah encela dengan munuh uhang yang benah. Ia yang nda ngelawan nuan. ⁷ Jadi besabah meh bala menyadik, sampai Tuhan datang. Pantau meh uhang buma yang ngantik musim nganyi yang behega dahi bumi, ia yang sabah nungguk anyi iyak,sampai mulai dan pengabis iya tuhun ujan. ⁸ Nuan pun ahus besabah ugak, kehena penatang Tuhan udah dampin. ⁹ Bala menyadik, anang meh ngeluh, saling belawan, sepaya nuan nda dihakim. Pantau hakim agik bedihi dipintu. ¹⁰ Bala menyadik, ambik meh sutik teladan, pikih meh pemedih dan penyabah padak nabi yang bandai demi nama Tuhan. ¹¹ Pantau meh, kami nganggap uhang yang sabah, baka uhang yang di behik behekat. Nuan udah ninga penyabah Ayub, nuan pun ketau maksud Tuhan ahung Ayub, luah biasa Tuhan ituk penyayang dengan penuh pengauk ¹² Yang pentin bala menyadik, anang besumpah, bait demi langit atau demi bumi, atau pun demi apa magang. Isak meh nuan bandai " auk" saja " auk" kalau " nda" saja " nda" sepaya nuan nda behada dibabah ukum. ¹³ Bisik nda dientaha kian yang pedih? Ia ahus bedoa. Ada nda dientaha kian yang hambik? Isak meh ia menyanyi pujian.Bisik ¹⁴ nda dientaha kian yang demam pedih? Ia ahus ningkau padak penatua gehija, sidak ahus ngunsut ia pakai minyak uhapan alam nama Tuhan. ¹⁵ Uhang yang bedoa dengan iman tau nyembuh uhang yang sakit, dan Tuhan akan ngangkat penyakit ia. Entik ia bedusa Tuhan akan ngampun ia. ¹⁶ Kehena iyak aku meh dusa- dusa nuan tehadap uhang lain, saling bedoa, sepaya nuan sembuh. Doa uhang benah akibat iya besah. ¹⁷ Elia uhang biasa baka kita. Ia bedoa benah- benah sepaya nda tuhun ujan, ujan pun nda tuhun didahat selamak tiga taun enam bulan. ¹⁸ Udah iyak sekali agik Elia bedoa, ujan pun tuhun didahat dengan dibumi, alu ngehasil panin. ¹⁹ Bala menyadik, enrik bisik dientaha kian yang jauh dahi utan yang benah, tapi ada yang talah ngemaik ia bebalit, ²⁰ ia ahus ketau, bahwa sepa yang ngemaik uhang bedusa keluah dahi jalan iya yang sesat, akan nyelamat jiwa ia dahi maut, dan akan nutup banyak dusa.