¹ Bala menyadik, anang nuan beiman tehadap Yesus Kristus, Tuhan yang mulia, dengan caha pilih kasih ahung uhang lain. ² Misal iya ada uhang datang sembayang kehumah nuan makai cincin emas bebaju miwah, alu bisik uhang miskin makai baju nda bait tamak. ³ Alu nuan mantau uhang yang kaya tedik alu bandai," Nuan ahus duduk ahung yang bait," udah iyak nuan madah ke yang miskin," Nuan bedihi diak magang," atau " Duduk meh dampin kaki aku ituk," ⁴ dengan baka iyak nuan udah ngukum uhang dan jadi hakim yang bepikih jat? ⁵ Dinga bala menyadik yang aku kegauk, ukan meh Allah udah milih yang miskin dahi dunia ituk untuk jadi kaya alam iman, dan ngewahis kehajaan yang udah dijanji Ia untuk sidak yang ngasih Ia? ⁶ Tapi nuan nda ngehega uhang miskin! Ukan meh uhang yang kaya yang nyusah nuan? ukan meh sudak iyak ugak yang ngemaik nuan ke pengadilan? ⁷ Ukan meh uhang yang kaya yang ngehina nama bait nuan? ⁸ Kati baka pun entik nuan ngimbai ukum Allah, baka yang udah ditulis alam pirman," Kasih meh sesama mensia baka nuan gauk kenuan kedihik," nuan bebuat bait. ⁹ Tapi entik nuan ngebida mensia, nuan bebuat dusa, dan nuan dituduh ulih ukum sebagai pelanggah ukum. ¹⁰ Kehena sepa magang yang ngimbai semua ukum,alu ngelanggah sutik pehintah magang, ia udah ngelanggah semua ukum. ¹¹ Kehena bagi uhang yang bandai," Anang bejinah," alu bandai piak ugak," Anang munuh." Entik nuan nda bejinah tapi nuan udah munuh, maka nuan udah ngelanggah semua ukum. ¹² Jadi bandai dan betindak meh baka uhang yang jekak dihakim ulih ukum yang nyuhuh bibas. ¹³ Kehena yang nama iya ukum ia datang nda pakai gauk pengauk bagi sidak yang nisik kasih mengasih. Belas pengasih pasti menang atas penghakiman. ¹⁴ Apa guna iya bala menyadik, entik ia madah dihik ia beiman, tapi nda bebuat hal- hal yang benah? tau meh iman yang baka iyak nyelamat ia? ¹⁵ Entik bala menyadik nuan mehelu utan dipakai dengan utan dimakan sahi- ahi, ¹⁶ alu bisik dientaha kian bandai ahung sidak," angkat dengan tenang, angat meh tubuh nuan, dan makan meh dengan kenyang," tapi nuan nda mehik ahung sidak apa yang dipehelu tubuh sidak, bait meh iyak? ¹⁷ Baka iyak ugak meh iman, entik nisik pebuatan ia mati. ¹⁸ Alu bisik yang bandai," Nuan bisik iman, aku bisik pebuatan." Padah meh iman nuan tanpa pebuatan, aku nunjuk iman aku ngelalu pebuatan aku. ¹⁹ Nuan pecayak hanya suhang Allah, nuan saja benah. Tapi padak sitan pun pecayak baka iyak ugak dan sidak begetah begitit. ²⁰ Apa nuan mauk ketau oi uhang budu, iman tanpa bebuat nisik guna- guna? [ Yang lain dibaca baka ituk,] [ Dapis alam lubang yang kangap sampai masa penghakiman." ] ²¹ Ukan meh Abraham inik muyang kita dibenah kehena ia bebuat mauk mehik anak ia Ishak datas altah? ²² Nuan pantau, bahwa iman bekeheja sama dengan pebuatan, dan atas dasah pebuatan iman ia jadi bekembang. ²³ Alam hal ituk iman digenap, yang madah" Abraham udah pecayak pada Allah, dan iyak dipehitung ahung ia sebagai kebenahan. Iyak meh sebab iya ia disebut sebagai sahabat Allah. ²⁴ Nuan ngeliat bahwa dahi pebuatan uhang dibenah, ukan magang dahi iman. ²⁵ Baka iyak ugak meh Rahab yang jadi pelacuh, dibenah ngelalu pebuatan ia, empak ia nehimak padak uhang yang ngemaik pesan alu nyuhuh sidak ngimbai jalan lain? ²⁶ Baka tubuh kalau nisik ruh ia mati, baka iyak ugak iman kalau nisik bebuat, ia mati