¹ Yakobus hamba Allah dengan hamba Tuhan Yesus Kristus, dituju ahung dua belas suku yang agik mehantau: Salam. ² Timbang meh semua iyak jadi utan yang dikehambik kita, bala kaban, entik nuan kenak bemacam penyuba idup. ³ Nuan ketau entik iman nuan diuji, nambah sepaya kita lebih tekun. ⁵ Tapi entik sepa dientaha kian mehelu hikmat, ia ahus mintak dahi Allah, yang mehik ahung semua uhang dengan muhah ati dan nda tecela, Ia pun akan mehik utan iyak ahung iya. ⁶ Ia ahus mintak dengan iman, dengan netau hagu. Sepa yang hagu, ia baka gelumbang laut kenak hibut kiak kituk. ⁷ Uhang yang baka iyak seahus iya anang bepikih ia nehimak utan dahi Allah. ⁸ Baka iyak ugak meh uhang yang hagu- hagu, ia nda tenang alam semua keheja. ⁹ Abuh meh bala kaban yang miskin kita bemegah entik Allah ngeninggik kian, ¹⁰ baka iyak ugak yang kaya ia ahus hambik entik Allah ngehendah ia, kehena ia tau abis baka bunga liah ditengah humput. ¹¹ Kehena waktu mata ahi keluah dengan panas ia yang kayah, humput iyak jadi layuk. Bunga jadi mati,nda isik agik utan yang dikehambik diak. Baka iyak ugak uhang yang kaya iyak, ia akan dilenyap dahi jalan idup ia. ¹² Dibehekat meh uhang yang sabah entik kenak cuba, kehena entik ia mampu kenak uji, ia akan nehimak mahkuta pengidup yang udah dijanji ahung sidak yang ngasaih Allah. ¹³ Anang ada yang bandai entik ia dicuba," Aku dicuba Allah," Kehena Allah nda dapat di cuba utan yang jat, Ia kedihik pun nda encuba sepa- sepa. ¹⁴ Tiap uhang yang dicuba, iyak empadai kemauk ia yang nda bait, yang ngemaik ia alu nyehat ¹⁵ ia.Udah niat ati yang jat iyak dimbai, iyak meh yang nimbul dusa. Udah dusa iyak masak, iyak meh yang nyuhuh mati. ¹⁶ Bala menyadik yang kegauk aku, anang meh kian mauk diakal. ¹⁷ Utan bait yang dibehik dengan yang sempuhna, datang iya dahi surga. Iyak dituhun dahi Bapak segala tehang. Dadap Ia nisik behubah atau baka ditukah. ¹⁸ Atas kemauk Ia kedihik Ia nyadi kekita jadi anak- anak Ia dahi pirman yang benah, kehena iyak meh kita jadi buah yang petama dahi semua yang Ia pulah. ¹⁹ Kian ketau hal ituk bala menyadik yang aku kegauk.Semua uhang ahus ligas ninga, lat ngumung, lat bihang. ²⁰ Kehena pemihang mensia nda isik ngehasil pemenah dahi Allah. ²¹ Kehena iyak buang semua pengutuh dusa dan yang jat, alu dengan hendah ati tehimak pirman yang udah ditanam, yang mampu nyelamat jiwa nuan. ²² Jadi meh penyebah pirman, anang hanya ninga magang, kehena iyak akan ngakal nuan kedihik. ²³ Kehena sepa yang ninga pirman, alu nda ngeheja iya, ia baka mantau mua ia di cehemin. ²⁴ Ia mantau mua ia, udah iyak ia angkat, ia nda ketau kati baka mua ²⁵ ia.Tapi bahang sepa yang nyelidik taurat dengan benah, masalah kebibasan, alu dengan benah- benah ngeheja iya, ia nda baka uhang yang ninga tapi abis iyak kelupa, uhang yang baka iyak di behekat alam semua keheja ia. ²⁶ Entik ia madah kedihik ia taat beibadah ahung Allah, tapi ia netau nyaga dilah ia, ia ngakal ati ia dan ibadah ia pun nisik guna. ²⁷ Ibadah yang asli dan yang nisik cela dadap Allah baka ituk, ia mampu mantuk padak anak yang udah nisik apang indai, janda, entik sidak susah, dan yang mampu nyaga dihik dahi dunia yang nda bait.