¹ Akxni David chu xtropa chinkgolh nak Siclag xliakgtutu kilhtamaku, amalecitas ey xtaratlawakgonit Neguev chu Siclag, taratlawakgolh Siclag chu mapasikgolh, ² xkachilenkanit lakpuskatni chu xlipaks tiku xtawilanalh antá, wa ti laktsukú chu wa ti laktlankata. Ni tiku makgnikalh, wampi kachilenkalh. ³ akxni David chu xtropa chinkgolh xkachikinkan, ey klhkukgonit xchikikan, chu xpuskatkan, xlakgawasankan, xlaktsumatnikan xkalenkgokanit. ⁴ chanchu David chu xtropa makatasikgolh chu lan tasakgolh, hasta kgalhtlawankgolh chu nialh lay tasakgolh. ⁵ Chatiy xlakpuskatni David, Ahinoam jezreelita chu Abigail ti xpuskat xwanit Nabal carmelita. ⁶ David lipekua xmakpuwama, sampi amakgolh tachixkuwitat xtalikgalhchiwinamanalh pi na aktalamakgnikgoy, sampi paks xtalipuwamanalh chu ksitsimakgolh, chatunu, chatunu xlakglipuwama xkgawasa chu xtsumat, wampi David litatliwekgli Puchina Dios. ⁷ wanilh David amá xpalakachiwina Dios Abiatar xkgawasa Ahimelec: katlawa litlan kakilitani klhakgat xpalakachiwina Dios. Abiatar liminilh ama lhakgat David. ⁸ David xakgatlih Dios, la uma wa: para na kakstalay umakgolh tropa, ¿na kamataxtuka? Puchina Dios kgalhtilh: ka kakstala, xlikana na kamataxtuka, chu xlikana nalakgmaxtukgoya tu takgalhalelh ⁹ Alh David, xla chu akgchaxan ciento xtropa ti akxtum xtalamakgolh, chankgolh nak chuchut tu wi kBesor, anta tamakgaxtekgolh makgapitsin. ¹⁰ David ni tachokgolh chu akgtati ciento xtropa, sampi akgtiy ciento tachokgoteyakgolh, xtlakgwaxnikgonit chu ni lay patakutkgolh chuchut tu wi kBesor ¹¹ Maklakgolh chatum chixkú egipcio nak pukuxtu, liminikgolh David, chu maxkikgolh kaxtilanchaw, walh, na maxkikgolh chuchut tu likgotnu. ¹² Na maxkikgolh xatalakgswakga sekgsiní, tamustiy xa xnekgni uvas. Akxni chu ey wayankgolh, stalank lakawa, sampi ni tu xwayama ni para xkgotnuma ey akgtutu kilhtamakú kakuni chu katsisní. ¹³ David kgalhaskilh: ¿tiku wix tapekgsiniya, ni xala wix? Kgalhtinalh ama kgawasa egipcio: Akit xtasakua chatum amalecita, kimakgaxtekgli sampi ey aktutu kilhtamakú lata snun xaktatatlay. ¹⁴ kitaratlawaw Neguev ti tapekgsinikgoy cereteos, chu kachikin tu tapeksiy nak Judá, chu kachikin tu tapekgsiniy Caleb, akinan klhkuyu Siclag. ¹⁵ David wanilh: ¿na kin tapina niku wi tama tropa? Egipcio kgalhtil: ka malaknu xlakatin Dios pi wix ti kin ti makgni, chu ni kin ti makamasta xmakan kimalana; akit nak pulalenan tani wilakgolh tama tachixkuwitat. ¹⁶ akxni egipcio ta alh David, amakgolh tachixkuwitat lakgaxtum xtawilana katiyatni, xtawayamana, xtakotmana chu xtatantlimanalh, xlipaxawamakgolh xpalakata tu xkikgalhankgonit nak xtiyatkan filisteos chu xtiyatkan Judá. ¹⁷ kamakgawilh chu kamaknilh David ama puntsisa hasta lakgakgotanulh xlichali. Ni para chatum makgaputaxtilh, ka xmanwa akgtati ciento lakgawasan kgetawilakgolh xtakgalhinkan (camello) chu tsalakgolh. ¹⁸ kilakgmaxtulh David xlipaks tu xkgalhankgonit amalecitas, na kakilakgmaxtulh chatiy xlakpuskatni. ¹⁹ ni tu kitsankgalh, ni para aktsu ni para tlanka, ni para lakgawasan chu laktsumatni, ni para tu xtakgalhanit chu xlipaks tu xtatiyanit ama kachikin. David paks maspitli. ²⁰ kakitiyalh David borregos chu xalhuwa takgalhin, lakan talimilh chu xtakilhwamanalh: wa uma tu kitlajalh David. ²¹ kalakgmilh David akgtiy ciento xtropa ti xtachokgonit nialh lay stalanikgolh David xpalakata pi xtlakgwankgonit, wa cha ti xtawilanalh nak xchuchut Besor, umakgolh minkgolh makgamakglhtinankgoy David chu makgapitsin tropa. Akxni kaukxilhi David lipaxaw kaxakgatilh. ²² wampi makgapitsin ti ni xalakuan ti kstalanikgonit David la uma tawa: sampi wixinan ni pitit nak pulataratlaw ni ktikamaxkin uma tatlaja tu kliminaw, xman wa mi puskatkan chu min kamankan kalipitit chu ey tlan na pinatit. ²³ David kawanilh: ni chuna katlawatit, natalanin, xpalakata wa tu kinkamaxkinitan Dios, ti kinkamakgtakgalhni, chu kinkamakamaxkin tama kgalhananin ti kilakgochi kinkachikinkan. ²⁴ ¿Tiku na kakgalhakgaxmatan tu kilhwampatit? Uma tatlaja paks kinkalakgchanan, wa ti kila nak pulataratlaw chu wa ti ka xmakgtalhnama, lakxtum na kinkalakgchanan. ²⁵ Uma tachiwin chuna kgantaxtulh chu litaxtulh akgtum limapeksin tu natalakgachixkuwiy nak Israel hasta lanchiyu. ²⁶ Akxni David chalh nak Siclag, kamalakgachanilh aktsu tatakin ama lakgolotsin xalak Judá, ti lu xkatalalen, kawanilh: u wi aktum tatakin tu milakan wa tu kamakgltiw xtaratlawananin kimPuchinakan. ²⁷ na kamalakgachanilh tatakin lakgolutsin ti xtawilanalh nak Betel, chu ti xtawilanalh nak Ramot xapakgalhu, chu ti xtawilanalh nak Jatir, ²⁸ chu ti xtalamanalh nak Aroer, chu ti xtalamanalh nak Sifmot, chu ti xtalamanalh nak Estemoa. ²⁹ chu ti xtalamanalh nak Racal, chu ti xtalamanalh nak xkachikinkan Jerameelitas, chu ti xtalamanalh nak xkachikinkan Quenitas ³⁰ chu ti xtalamanalh nak Horma, chu ti xtalamanalh nak Corasán, chu ti xtalamanalh nak Atac, ³¹ chu ti xtalamanalh nak Hebrón, chu xlipaks kachikinin tani xkilatamakgonit David chu xtropa.