¹ Filisteos mamakxtumikgolh xtropakan nak Afec, chu Israel na tamakxtumikgolh lakatsu kchuchut tu wi nak Jezreel. ² Chu akxni xanapuxkun xtropa filisteos minkgolh ukxilhkgoy tropa xa akgtum ciento chu xaakgtum mil, David chu xtropa ka kstalanimakgolh Aquis ³ la uma tawa xanapuxkun xtropa filisteos: ¿tuku tatlawamanalh unu umakgolh hebreos? Chu Aquís kakgalhtil ama xanapuxkun xtropa filisteos: ¿ni katsiyatit pi uma David, xtaskua Saúl puxku xalak Israel unu kinkatalaman akglhuwata kilhtamakú, ni tu kmakgtakgsma para tuku nitlan chunatiya lata timilh hasta lanchiyu? ⁴ xanapuxkun xtropa filisteos lakgsitsikgolh chu tawanilh: katlakgalipi uma chixku, laki pi na an nakputawilh tu maxkinita, ni ka kinkastalanin, ni xawa na ki taxtatuy para akxni ey kinkataratlawamakán na nakinkamakgtaratlawayan; sampi, ¿tuku lipaxaw nalimakgamalhtinamparay xpuxku para ni wa ki akgxakgakan? ⁵ ¿ni wa uma David, wa ti xlikilhtlimaka akxni xtantlimakalh, xtakilhwamanalh: Saúl makgnilh akgtum mil, David akgkaw mil? ⁶ Aquis tasanilh David chu wanilh: xastakna Puchina wi, pi wix xakgstitum, tlan lata pina chu tamparaya makxtum kinkatalaya, chu nitu kmakgtakgsnitan para tuku nitlan chuna lata tanita hasta lanchiyu, wampi umakgolh xanapuxkun xtropa filisteos ni ukxilhputunkgoyan. ⁷ kataspitti, chu chapaxawa kapit, laki pi ttlakg nakamaakchichiwiya umakgolh xanapuxkun xtropa filisteos. ⁸ David kgalhtilh Aquis: ¿tuku ktlawaninitan? ¿tuku kimaklaninita nitlan chuna lata ktimilh hasta lanchiyu, laki pi ni nakan chu naktaratlaway xtaratlawana kimpuchina puxku? ⁹ Aquis kgalhtil David, wanilh: akit katsiy pi wix tlan chixku, xtachuna la chatum makatsinina xala kakgapun; wampi umakgolh xanapuxkun xtropa filisteos kintawanilh: ni xliminat xla nak pulataratlaw. ¹⁰ lu tsisa natakiyatit wix chu makgapitsin ti taminkgonitan, katakitit akxni ey ama kaxkgakgay, kapitit. ¹¹ David lu tsisa takilh, chu makgapitsin, laki pi na ankgoy chu na taspitkgoy nak xtiyatkan filisteos, wampi filisteos ankgolh nak Jezreel.