¹ Filisteos taratlawakgolh Israel, lakchixkuwin xalak Israel tsalanikgolh filisteos wampi kamataxtuk´ka chu kamakgnikalh nak kakiwín Gilboa. ² Filisteos akstalakgolh Saúl chu xkaman, makgnikgolh Jonatán, Abinadab chu Malquisúa, xkamán Saúl. ³ Taliukilh taratlawakalh Saúl, chu ti lilakgxtonankgoy kinkaslajaja likan makgawikgolh. Saúl tsukulh pekuan xpalakata tu tlawanikgolh filisteos. ⁴ Tunkan wanilh Saúl ti xlema xlikan, “katamakaxtu tu lilakawilinana kakilimakgni. Para ni chuná, natamin umakgolh filisteos nakilikgamanankgoy, nakilaklhtukuwilikgoy”. Wampi ama xtasakua ni lay tlawa chuná sampi xpekuaxninit. Chanchu Saúl man tiyalh xlikan chu lipalhtukukalh. ⁵ Akxni uma tasakau ukxilhi pi Saúl xakstu makgnikalh, nachuna tlawalh chu akxtum tanilh. ⁶ Chuna ama nilh Saúl, kgalhtutu xkamán chu xtasakua; lakxtúm tanilh watiya ama kilhtamakú. ⁷ Akxni ama tropa xalak Israel ti xtawilanalh a kgalhpatu, chu ti xtawilanalh pekganacha kgalhtuchokgo Jordán, ukxilkgolh pi makgapitsin tropa xalak Israel tsalakgolh, pi Saúl chu xkamán kamakgnikgokalh, taxtukgolh nak xkachikinkan chu tsalakgolh, filisteos minkgolh chu wa latamakgolh ama kachikinín. ⁸ Xlichalí, akxní filisteos minkgolh makglhtikgoy xlikankan nin, maklakgolh Saúl chu kgalhtutu xkamán ey xanin nak kakiwín Gilboa. ⁹ Pixkaktikgolh xakgxakga chu makglhtikgolh xmaklikan, chu malakgachakgolh makatsinanin xlikatlanka xtiyatkan filisteos laki pi namakatsinankgoy nak xpusikulankan tani lakgtakilhputakgoy tamakanitlaw chu xlipaks kachikín. ¹⁰ Wilikgolh xlikan Saúl nak xpusikulan tamakanitlaw Astarot, chu chiwakakgolh xtiyatliwa nak patsaps xla kachikín Bet San. ¹¹ Akxni tachixkuwitat xalak Jabes Galaad kgaxmatkgolh tu tlawanikgolh Filisteos amá Saúl. ¹² Takaxkgolh xlipaks lakgtliwekgen chixkuwín chu skaka tlawankgolh chu kimaktikgolh xtiyatliwa Saúl chu xtiyatliwa xkamán nak xpatsaps Bet San. Liyankgolh nak Jabes chu anta lhkuyukgolh. ¹³ sakikgolh xlukutkan chu maknukgolh xtantun kiwi nak Jabes, chu kgalhxtekgnankgolh akgtujún kiltamakú.