¹ Cicaté idabacawa Nahas idenami, yacalé icueriná nasuca nide Amonita nai yaté yetacawa, iricataté imacawa yalumiseca. ² David imaca: "Yasaidaca yawawa Hanún iri yai Nahas ya caina yaniri yasaidaca cayabaca yapichani". Ina caicaté David ibanuaca nia yeyicaté icalidaca tacaisi iri ya yewacatena isimaidaca yaniri iwalisena. Niae David yasunai weneica nawaluacatewa alede nasu cali nere niae Amonitas yaté nacawa Hanún, yewacatená isimaidacani. ³ Quewaté niae yacale icueriná yenibe Amonita neniyeica naimacate Hanún iri: "¿Pebaidasica pia caide iyuwa David yebeidana pianiri iri inate ibanua asianai isimaideyeipina pianiri? ¿Camita sica niae yasu weneica ya piatale yewacatená nepunicawa nacaidaca neniba naicacate cali yewacatena nalicuadaca neseni?". ⁴ Caicaté Hanún ibaca niae David yasu weneiwica, yate iriadaca yai nabaleca nawalisé nawada nese ale inumani caliucutenama yate ibanuaca nepuawa. ⁵ Quewa nacalidacalité David irini, ibanuacaté yeyeipina icalidaca tacaisi yewacatenaté nawacaidacawa napicha niae aberi tacaisi nia cainae asianai nayacaté mabainita. Yai yacalé icueriná imaca: "Piyamacuewa chai Jericó ata idecataleta yepuaca idawinacawa, nese pepuapinacuecawa". ⁶ Caicate nanaca naliacawa niae amonitas camino naya cayaberi iyu nayacaitaté baweri iyu ipichalé yae David, Hanún amonitas nacai nabanuaca mil (1000) imanuica palata yewacatena napaidaca yai nepuniricawa iyu arameos asianai yepuniyeiwa cawayú Aram yasu iyu, Maaca aiba Seba nacai. ⁷ Nia nacate nacaba nianie arameos treinta y dos mil nepuniricawa iyu yapicha ya yacalé icueriná Maaca yasu weneica yapichawa, yeyicawa nese nayamacataiwa ipichawaise Medeba. Nia amonitas nawacaidacawa abecataita sisanama inumani nasu yacale manuiri nese namusuawa yeiyipinaca imani uwicai. ⁸ David yemiacalité inawana yae, ya ibanuacaté Joab yasu uwinai macaita yewacatena nanayicacawa napicha niae. ⁹ Amón yasu weneica namusuacatewa yate nachuniaca nabaluacawa iripina yai peliacaisi chai yacale manuiri inuma iricu idecunitaca niae icueyeica yacalé nadeca nanaca alede ipuleri cali nere. ¹⁰ Caicaté Joab icaca nabaluacawa niae ipeliayipinaca chade nayamataipinaca nacuaca, iniwacaté abenama newise niae yaliayeica ipeliaca Israel yasunai yate ichuniacania naipunita pina niae arameos. ¹¹ Caide iyuwa niae imaqueyeicawa uwinaica, ya ibaluadaca ichulianapina Abisai yai yenasairica niae uwinai Amón yasuca. ¹² Joab imaca: "Iya niae arameos maini cachainica nuli pina, nese pia, Abisai, pedanaicha nua. Quewasica ya uwinai Amón yasunai cachainiyei piri pina, nese nua nuepuapina yewacatena nuedacapia naipichawa. ¹³ Cachaini pimacala nacai wia wasaidacatena wiawa cachainian wia nali niae wayale iminaica nali aiba niae yacale manuinameyeica Wacueriná Dios yasunaica ya caina Waiwacali imaniri yai cayaberica caita iyuwa iwawaná. ¹⁴ Caide Joab niae yasunai uwica nacacatewa abemeidata alede naipunitai dayacatai pinawa naipunita pina niae arameos naica, nacatewa chainisi iyu Israel yasu uwinai icha. ¹⁵ Nenialité ya uwinai Amón yasu naicaca niae arameos idecaté nacawa idunamaita, nia nacai nacatawa icha yai yenasairi icha yai Joab, Abisai, ya nepuacawa alede yacalé manuiri nere. Joab yepocawa naicha niae Amón yasu weneicaca yaté yepocawa ale Jerusalén nere. ¹⁶ Caicaté naicaca niae arameos Israel cainaté imawaniada nia, nabanuacaté chainisi nia sisade ya Uni Éufrates yapicha yai Sofac ya icuerica Hadad Ezer. ¹⁷ Caicaté naimaca David iri, ya iwacaidaca macaita Israel nai abecataita nachabapinawa ya Jordán ina yaca natale nia. Ya iwacaidacania ya uwica iripina nacataica naipunitawacawa naipunita niae arameos ina nia napeliacaté ipunita ya. ¹⁸ Niae arameos nachuliacatewa Israel nese, ina David invate siete mil (7000) arameos nai yepuniyeicawa inata yai nepuniderica inata weneica aiba cuarenta mil uwinai ipineiyica yabali iyuwa. Caitanacai nanuaca Sofac, ya ichulierica niade uwinaica. ¹⁹ Caicaté macaita niae yacalé icuerinanai niate yasuweneicaca niae Israel nai, nia namanicaté matuibanaina pina nayaca David yapicha yate naibaidaca iri. Caide iyuwa ya yacale Aram yasu ina camitate iya neni maulena iyudapinaniae amonitas naica.