¹ Ina ichabacatewa yali yae cayanamacataica icacanawa yai banacale, ya eriquei namanicataica abedenamata niae yacale icuerina ai nacawa alede naipunitawa puchaiba yacaleca, Joa nepunidaca iwitapu ya uwi yeripinacawa alede napeliacataleca ina namalaidaca Amonita nai yasu cali, ya yacatewa imaidaca Raba. David iyamacawa Jerusalen nere Joab ipeliacate yapicha yai Raba yate imaweniadacani. ² David yedacate yai imacaca iwita iwalise yai icuerica yacale nasuca nia yaliacate imiaca ipiseidawa treinta y cuatro kilogramos imiaca oro iyuiri quew neni iyatanacai iba caweniri, yai iwita imacaca yate naiyaca David irini ya imusuada ya caweniri nasuca nia yacale manuiri manibanama.

³ Ya imusuada niae weneicaca iyeiyeica chai manuiri yacale neni bachawale ya ichainiadaca iwali naibaidana pinaca iyuya yai nasiarranaca aicu, picu sierruiri aiba chipali nacai, David ichuliacte macaita niae yacale manuiri neniyeica iyaca weneicaca Amon yasunaica namanina pina yai abaidacalesi, nese David yasu uwinai yepuacawa macaita Jerusalen nere. ⁴ Yate ichabacawa idenami yai napeliacataica ale Gezer nere napicha niae Filisteos. Sibecai, ya husatita, inuaca Sipai, aberi nena niae Filisteos nai yate niacata iculiania.

⁵ Ichabacatewa abeta niwa aberi napeliacataica napicha niai filisteos ale God nere, yanacai Elhanan, iri quei Jair ya betlemita, inuaca Lahmi; yenasairi yai Goliat ya hitita, yacaina ichaquenacairica yasu Lanza cairide iyuwa aberi siero caireri nayanaca. ⁶ Ina caicate napeliaca ale Gat nere iyacate aberi asiali chenuniri ideniarite 6 imanubaca icapiapinawa aberi icapi neniwa yemanese aiba caitasa labaliapina 6 nama imanubaca baipunitacanama yabalica, ya naterinamitate nacai niae asianai manuinameyeica.

⁷ Caica ya icanica naquinina niae uwinai Israel yasunaica, Jonatan uiri uai Simea, yai David yenasairi ivacani.

⁸ Niate nataquenainami naie asianai manuinameyica Gat neseyei; ina caicate nanuaca nia icapi iricu David aiba nacapi iricu niae yasu uwinaica.