¹ Idecamité ichabacawa ya Rey ichuniacatéyasu capiwa, ya imaca Natán iri ya profeta: "Pica nua nuyaca chae aberi capiaicuiri cedro iricu, quewa ya caweneri tacaisi yalu yae tacaisi baisiri Waiwacali yasu iyamacawa yamiba aberinawendacatai". ² Nese Natán imaca David iri: "Piawa, pimani caide iyuwa piwawa imana, wacuerina Diso iya piapicha". ³ Caicaté ichabacawa neniali cata itacai Wacuerina Dios yanacaté imaca Natán iri: ⁴ "Pia picalida David iri nuasu weneica: Caica Waiwacali imaca: Pia camita pimani pina nuli capi nuyeripina iricu. ⁵ Quewa Nua camita nuyata capiricu Nuanaidacatenami Israel caita nacai siucalenama. Camicanita caini ya Nuyacata nenita iricu aberi nawendataica, aberi capimá, iyecate macaitabata. ⁶ Nuyacaté napicha nuepinicawa newiba nayacataba macaita nua Israel, ¿Numaté aberi nawali niae Israel iwacanaica ideyeica numaca nutani nawali numacana pina pastor iyu nuyacale neni: "¿Camicainá namani nuli aberi capi (aicu) cedro iyu?" ⁷ Nese, pima iri nuasu weneica David: 'Ya uwinai iwacali cachainirica imaca: Nua numuasuadacate pia sisade ipuleri masicai nese, icuacata oveja nai, yewacatena piaca ichuliarica chai nuyacale Israel neni. ⁸ Nua nuyacaté piapicha pepunicatabatewa yate numawaniadacate nia piuwidenaica piacawesimita. Nua numani pina pipidena cainawanaca manuiwaca nia iyeyeica chai cali inita. ⁹ Nua pina piri aberi piyacatai pina alede Israel iyacale nere numaca pina neni pia yewacatená nia nayaca nasu cali nenitawa ichana quiri nasaica nali wawasi. Camicatená nachulia quirimá nua baweyei weneica, caide iyuwate namanica quecha, ¹⁰ caica nia iyuwa namaniná nuemerica numaca nali chainisi iwali yae Israel iyacalé. Nese Nua nuchulia piná macaita piuwideica. Caitanacai, Nua numaca caide ya Waiwacali, Numanica piri pina aberi capi. ¹¹ Icabapinacawa piri piasu eri ichabacaliwa yewacatena pepocawa alede pianiri nere, Nua nuapinaca numichaidaca aberi numaqueri pina pialumiseca; aberi quewa pitaquerisiwa pinata; nua nuapinaca nubaluadaca yai ichuliacataica. ¹² Ya imani pina nuli aberi capi, Nua nuapinaca nubaluadaca yai iyacaitaica cairipinata. ¹³ Nua nuaca yaniri pina ya, ya nuiricani. Nua camita pina nueda nuichawa yai tacaisi baisirica yasuca. Caide iyuwa nuedana Saúl ichani, ichuliaricaté pipichawaise. ¹⁴ Nua nubaluadapina nucapewa nuchuliacataica cairipinericata, idecataica yanuacawa cairipinata". ¹⁵ Natán itanica David imaca macaitayae tacaisi, ya icalidaca iri iwali yae iquerica macaiwata. ¹⁶ Nese ya yacale icueriná David iwaluacawa iyamaca yawinacawa Waiwacali yacualicu; Ya imaca: "¿imaca caina nua, Dios Waiwacali, cainá nua nuenanaica yewacatená pité nua ale caitale pianaidaca nua? ¹⁷ Quewa achumerina wawasi piquerica, Wacueriná Dios. Pia pitanicate nawali niae yenanaica nasu weneica iwali yade aberi manuiri eri yericawa nese, ina yasaidaca nuicani iyeripinaca nudenami, Waiwacali Dios. ¹⁸ ¿Caina yewa aiba numaca piri nua, David? Pia yeri imiatacana yai piasu weneica aberi pialinaca iwali cayaba. ¹⁹ Waiwacali, iwali cayaberi ya piasu weneica, yewacatena yana imani caide iyuwa imana, pia pimanica yade manuiri wawasi pisaideripinaca macaita piasu manuinameri pimanirica. ²⁰ WAIWACALI, canacata aiba cairide iyuwa pia, canacata aiba iyeri piteseba aiba pina. Caide iyuwa cayaberi wemiaricamá. ²¹ Quewa ¿Cainá piyacalé Israel iyerica caide cali inata caide iyuwa pia, wacueriná Dios; yaté pimisuadacate Egipto nese nua caide iyuwa piasunaipina weneicaca, namanicatena aberi pipidena piripiná iwalisena manuica pinawana iwalise pibaidateca? Pia pimusuadate niae yacale ichiale, niade pimusuadeiyicate Egipto nese. ²² Pia pimanicaté piasu yacalewa yae Israel iyacalena cairipinata, pia, WAIWACALI, pimanicawa yasu Wacuerina Dios. ²³ Ina caita nacai, WAIWACALI, yae imaquerica iri imaniricaté caitade iri yasu weneica niae yenanai yewacatena ibaluadaca nenitani. Piamani caitani iyuwata pima pitanica. ²⁴ Ina pia pipidená yewa ibaluacawa cairipinata quewa manuiri pina, yewacatena naimaca niae weneicaca: Ya NAIWACALI niae uwinaica yacata Israel yasu Wacueriná Dios, idecunidaca nuasu capi, David, piasu weneica ibaluacawa pipichaleta. ²⁵ Quewa pia, nuasu wacueriná Dios, piasaidaca iri piasu weneica pimanina pina iri aberi capi. Ina iwalisena nua, piasu weneica, nuanaca chainisi yewacatená nutani piapicha piata. ²⁶ Siucata, WAIWACALI, piata wacueriná Dios, ideca pimaca aberi cayaberi wawasica iri yae piasu weneica: ²⁷ Ideca imani piri cayaberi pia yasu weneicaca, yewacatena piacawa abemaida tapipichalewa caitade iyuwa piyana piyaca. Pia, WAIWACALI, ideca pibendiciaca, ina ibendiciaca cairipinata".