¹ Nia nanaidacate yae caweniri tacaisi yali Wacueriná Dios yasu bamuchuami iri capi nawendacatai cairica David ichuniaricate nali pina niae. Nese nia nachuliacate naca yae ofrenda nemerica, ofrenda iwali nacai yae nayanapinaca matuibanaita. ² Idecanamité David imalaidacate inuaca cuwesinai yemeiyipinaca ofrenda iyu, yate yaca nawali cayaberi niae weneicanai ipidena iwali Waiwacali. ³ Ya yacaté nalimabanamá macaita israelita nai iri, caita nacai nali inanai asianai, aberi pani iwalená, aberi iwalená inasi, aberi canai inaná namanirica puchichawaca nemaca quichai iyuni. ⁴ David iducuacate nia levitas naibaidacatena ya cualicu iricu caweniri tacaisi yalu Waiwacali yasu, nawacaidacataicawa casimaicatai nawawa nayaca nacataica cayaberi Waiwacali Israel yasu Dios iri nacai. ⁵ Levita yate Asaf, naiwitapu, yae puchaibanaca iyaca idenami, Zacarías, Jeiel, Semiramot, Jehiel, Matatias, Eliab, Benaía, Obed-Edom y Jeiel. Iwawacuteyité isanadacani yai ideniarica inumacaiwa ya arpaca, Asaf imacalté cachai niwaca isana yae címbalos napuerica. ⁶ Benaía Jahaziel nacai, niae icueyica Dios icape, namanicate isana yae cuwesinai ichale abemaidata isana yacualicutá yae caweniri tacaisi yalu, tacaisi baisiri wacueriná Dios yasu. ⁷ Nese, yate erica, David idabacate iducuaca ya Asaf yenasairi aiba icantana pina yai yanaca iri cayaberi iri yae Waiwacali. ⁸ Piacue iri cayaberi yae, pitanicue ipidena iwali; piasaidacue naica yae pimanirica nali nie iyeica chae yacalé manubeiyei. ⁹ Picantacué irri macaita iwali pimaniri cayaberica. ¹⁰ Wamanicué cayaberi ipidena iwali; casimaica nawawa niade icaideyeica Waiwacali. ¹¹ Picaidacue Waiwacali ichaini aibai picaidacue iri abemeidata. ¹² Piwawalicué yae cayaberi wawasica imaniricaté, imichaidanacaté nia itacai iyuwa. ¹³ Picacué Israel itaquenaimi yasunai weneica, picacué Jacob iyacale iminamica, pia iniweyicate. ¹⁴ Ya Waiwacali Wacueriná Dios. Imacaté itacaiwa nachulia pina inata yae maicai calii. ¹⁵ Pideniacue piwita iricuwa yasu tacaisi baisirica cairipinata camiri imalawa, yae tacaisi imaquericaté nali pina nie mil (1000) yawiriacatai nayaca itaquenai pinaca. ¹⁶ Piwawalicué ya tacaisi baisirica imaniricaté Abraham yapicha ya imerica itanica Isaac yapicha nacai. ¹⁷ Yaté imaquerica baisiri iyu Jacob iiri nachuliana pina Israel naica caide iyuwa tacaisi baisirica cairipinata. ¹⁸ Ya imaca nali: "Nua nepuada pinacué pirini yai calii Canaán piasu pinaca". ¹⁹ Nua numaca nutaica maisawanaitacue pia pimanubaca número iyu, camita manuba niae aiba cali nese yeica. ²⁰ Nia nacatewa calii imanubacata, nacaté nachulia aiba yacalé nere. ²¹ Ya camita imacate yawawa namawaniadacani; ya ichuliacaté napaidaca namawaniacalecawa cayaberi iyuta. ²² Yate imaca: "Pica piba nawali nide ideyeica nuasunaica camita nacai yewa pimanicue nali baweri niae nuasu profetas". ²³ Picantacue Waiwacali irri, macai calita; picalidacueni pichuliana pina cawa erii erii imanubacata. ²⁴ Picalidacue iwali yasu Gloria (cayaberi waneripinaca wadeniaca inata yae yacale nayacataica calinacai) cayaberi imanirica iwali yae yacale. ²⁵ Ya cainá Waiwacali manuiri iwawacuteri na irri cayaberi manuisiwata iwacuteri na icaluinina macaita aibanai dios icha. ²⁶ Macaita niae yacale nebaidaca nawali nia idolonaica, niae yacale nebaidaca nawali nia idolonaica, quewa ya Waiwacali Dios imaniricate eeri. ²⁷ Icacanawa cayabanama ipichale yae naiwacali. Cachaini casimaiwaca chai iyacataica. ²⁸ Picue Waiwacali Dios irini, piacue abemisanaca weneicaca, picacue waiwacali Dios iri cayaberi cachaini waca; ²⁹ pimaipidena iwalii. Pianaidacue aberi ofrenda yacué pepuadaca irini. Pinacue pibaluacawa ipunita ipichale yae Waiwacali. ³⁰ Pimanicue ichuliaca ipichale, macai calii. Ya icacanawa eri idecate imaca icacanawa; camita yewa nachupiaca. ³¹ Cayabacana chenuniré, caita nacai cayabanama calii inata; quei naimaca yae yacale manuinameri: "Ya waiwacali yata ichuliari". ³² Yate casanaca lamaa caide iya isana aberi cuwesi manuiri macaita casimaicania. Casimaica nawawa macaita niae iyeyeica neni manacuali namanitaica aberi wawasi. ³³ Nese pimacacué nia aico analima nesei namani nasanawa cayabawaca ipichale yae Waiwacali, yana pina caina icacania yuwichaidacatena nia calii inata. ³⁴ Picacue iri cayaberi Waiwacali, cayabericainani, ya caina iderica ideniaca piapichacue cairipinerita. ³⁵ Nese pumacué: "pichuliadawia, wacuerina Dios ichuliaderipinawia. Piwacaidawia pedawia aibanai yacalé icha, yewacate waca piri cayaberi pipidena iwali cayaberi nawali nia sanasinai isana nacai". ³⁶ Ya Waiwacali quewa, Wacueriná Dios Israel yasu, watanicali aiba iwali sisade camirica imalawa quirinama iyerica cairipinata. Macaita ya yacale imaca: "Amén" naca irri cayaberi Waiwacali. ³⁷ Ina caita nacai David imaca Asaf aiba yae yenasairi nenite ipunita yae cabeniri tacaisi yalu Waiwacali, yewacatena waibaidaca abemaidata ipunita yae caweniri tacaisi yalu, caiwacatade iyuwa nachuliana naibaidaca macai erita. ³⁸ Obed-Edom napicha niae sesenta y ocho (68) namanubaca nenanai cawa yate naiyaca napichawa nia. Obed-Edom, irri yae Jedutún, abedanamata Hosa yapicha, niataté icueyi capinuma. ³⁹ Sadoc, ya icueyi Dios icape, imanubacanai aiba icueyi Dios icape nayacat´r neni naibaidacatena ipunita yae tabernáculo Waiwacali yasu yalumi iricu alede chenuniré Gabaón. ⁴⁰ Nia iwawacutá nate iri nanaca irri cayabaca nawawalicani nemeri pina irri yae Waiwacali abemeidata mapisaita catacali aiba, macaita caide iyuwa itanana yani Waiwacali, caide iyuwa nepuadericate nali niae Israel nai nachuliana pina. ⁴¹ Hemán Jedutún nacai nayacaté napichá nia abedanamata napicha nalini naipidena iwalini, Nacate cayaberi Waiwacali iri, imacaca nali tacaisi baisiri cairipinata. ⁴² Hemán Jedutún nadeniacaté nacapi iricuwa yae nasanaiderica iyu sanasi trompeta, quirapiali nacairi namaniri isana aiba nacai iripina yae sanasi camirica yewa namanica. Niae yenibe yai Jedutún nadeniacawa capinuma. ⁴³ Nese macaita ya yacalé nepuacawa nacape nerewa, David yepuacawa yacaté nali cayaberi niae yenanaicawa.