¹ Ji̧yȩnö̧ mo̧ro̧ päi'omenä Debora'inä ja̧hua̧ta̧'a̧nö̧ Abinoam i̧tti̧ Barac'i̧nä̧ pi̧yȩ ra̧huä̧huä̧ ra̧'i̧nä̧tö̧: ² Oicuä ttö̧ja̧ Israel rȩjȩttö̧ ruhuo kä̧mä̧dö̧ huettomenä, ttö̧ja̧'i̧nä̧ jitötä amucuädö curära'a ti̧'cha̧ pättäjä'attö, ujutumä TÖ̧Ä̧NÄ̧HUA̧RÖ̧TÄ̧ adihua'a pä'ö esehuätöjä. ³ Ruhuo hue'ätö, ä̧ju̧cuä̧tu̧cui̧ ¡oicuä ttö̧ja̧, adiunä ä̧ju̧cuä̧tu̧cui̧! ra̧dä̧cua̧ju̧sä̧ ttömä TÖ̧Ä̧NÄ̧HUA̧RÖ̧; adihua'a pä'ö eseu ra̧dä̧cua̧ju̧sä̧ TÖ̧Ä̧NÄ̧HUA̧RÖ̧, Israel ttö̧ja̧ TTÖ̧Ä̧NÄ̧HUA̧ Diosrö. ⁴ ucu TÖ̧Ä̧NÄ̧HUA̧, Seirtö räcuopomenä, Edomttö̧ rä'opö cui'chomenä, rȩjȩmä̧ tti̧ȩpi̧na̧'a̧, ja̧hua̧ta̧'a̧nö̧ mo̧ro̧ji̧yä̧'i̧nä̧ tti̧ȩpi̧na̧'a̧; ajiya isoppattö'inä ajiya 'chȩnö̧ ichina'a. ⁵ Mö̧ä̧'quiyumä TÖ̧Ä̧NÄ̧HUA̧ to̧ä̧ro̧mȩttö̧ tti̧ȩpi̧na̧'a̧; Sinai mö̧ä̧'ca'inä TÖ̧Ä̧NÄ̧HUA̧ Israel ttö̧ja̧ TÖ̧Ä̧NÄ̧HUA̧ Dios tö̧ä̧ro̧mȩttö̧ tti̧ȩpi̧na̧'a̧. ⁶ (Anal i̧tti̧) Samgar ö̧ji̧nö̧ pä̧nä̧mä̧, ja̧hua̧ta̧'a̧nö̧ Jael kö̧ji̧nö̧ pä̧nä̧'i̧nä̧, jinä isocu mä̧ni̧yä̧nä̧mä̧ cue'ächocotö pi̧nä̧tö̧, ja̧u̧ mä̧ni̧yä̧nä̧ cue'ächinätömä ppo̧ö̧ mä̧ni̧yä̧nä̧tä̧ hui̧sä̧tö̧ cue'ächinätö̧. ⁷ Israel su̧ro̧da̧u̧mä̧ a̧'u̧cuo̧tö̧tä̧ ji̧na̧'a̧, ja̧hua̧nö̧ jo̧mȩttö̧ ttö Deboramä, odipa pä'ö pätecuächina̧'a̧ Israel ttö̧ja̧ tta̧ju̧ jö̧nä̧ odipa pä'ö. ⁸ Jahuätömä jarepätö yapare ttö̧ä̧nä̧huo̧tö̧rö̧ ttesetomenä, Curä ki̧na̧'a̧ ötahuiyära'a doächäcuähuomettö̧ ja̧hua̧nö̧ ja̧'a̧nä̧ rohuäu ttoecuäräcuähuäbi'inä dacuodiyä'inä jui'inätö̧ cuarentamilnö huotö Israel ttö̧ja̧ttö̧mä. ⁹ Chami'iso'qui esehua'a Israel ttö̧ja̧ tturuhuotörö; jitötä a̧möcuädäcuäu iyäcuähuinätu̧cu̧ ujutumä jahuätörö TÖ̧Ä̧NÄ̧HUA̧ i̧mi̧nä̧ adiunätä̧ 'cuäopatöja̧ pä'ätöjä̧. ¹⁰ Pi̧yȩ a̧mu̧cuädi - ucu burötö̧ te'ätönä ttu̧huä̧mä̧da̧ pä'ö i̧sä̧ta̧ huȩnä̧huo̧tö̧nä̧ä̧ huö̧mä̧, ja̧hua̧ta̧'a̧nö̧ ucu juhuä̧mä̧nä̧tä̧ cue'ächömä̧ ¹¹ Jitö äjicuäcuähuotö ttahuo'ta ko̧mȩ ka̧cuä̧tö̧ ra̧tta̧'a̧ ra̧mi̧pa̧'a̧ ä̧ju̧cui̧. Juhuorumä̧ pä'äjita'anu TTÖ̧Ä̧NÄ̧HUA̧ aditähuä jueöjähuä inä ja̧'hua̧ta̧'a̧nö̧ Israel ttö̧ja̧ttö̧ su̧ro̧da̧u̧ jueöjähuä jettö'inä ji'ähuätö,. Ja̧'hua̧nö̧ ja̧'a̧ TÖ̧Ä̧NÄ̧HUA̧ umuhuäyotömä ötahuiyä apate ä'cacu mȩjä̧hui̧nä̧tö̧. ¹² ¡Debora porächi'i, porächi'i! ¡porächi'i, porächi'i ji̧yȩtȩ ra̧huä̧huä̧ ra̧'i̧! ucu Barac, Abinoam i̧tti̧, ä̧rä̧mi̧'i̧, 'chu̧cuä̧dä̧jä̧u̧ru̧mä̧ ȩpö̧ täi. ¹³ Ja̧hua̧nö̧ ja̧'a̧nä̧ curättö ka̧cui̧pä̧jä̧tö̧mä̧ ruhuotö ttö̧jo̧mȩcu̧ 'chinätö; TÖ̧Ä̧NÄ̧HUA̧ umöhuäyotömä curä rohuäcuähuä ttö̧ja̧cu̧ ichäjätö ttö chö̧ja̧'a̧cu̧. ¹⁴ Jitö Amalecnä ka̧cuä̧tö̧mä̧ ichinätö̧ Efrainra̧'a̧ttö̧; ja̧hua̧ta̧'a̧nö̧ Benjamin sotö'inä cuo'ca'anä 'chi̧nä̧tö̧. Marquirttömä su̧ro̧da̧u̧ tturuhuotö ja̧hua̧ta̧'a̧nö̧ Zabulónttömä jitö ruhuo itta'ca cue'ädätö'inä mȩjä̧hui̧nä̧tö̧. ¹⁵ Ja̧'hua̧ta̧nö̧ Isacarttö churuhuotö tti̧tti̧mö̧mä̧ Deboracu ka̧cui̧nä̧tö̧; Isacarmä Baracu ki̧nö̧, ja̧u̧tä̧ huea'anä pä̧mä̧roppära̧'a̧cu̧ o'ca'anä 'chi̧nö̧ . Ruben ahuaruhuä o'cotöttömä ttahuäruhuätä ji̧yȩtȩ huȩnȩ amäcuädö pä'ächäcuäcuinätö̧. ¹⁶ ¿Dä̧bö̧ ocuränätä̧ cu̧'ä̧tu̧cua̧'a̧ jä̧ttö̧, ovejatö̧ tti̧huȩnȩ ä̧ju̧cuä̧rö̧tä̧mä̧? ja̧'hua̧nö̧ ja̧'a̧nä̧ Rubén ahuaruhuämä rö̧ä̧nä̧ pä'ä'chäcuähuinätö̧ ji̧nä̧ ji̧yȩtȩnä̧tä̧ ttamöcuäda pä'ö. ¹⁷ Galaad ahuaruhuä o'cotö Jordan aje ji̧jä̧nä̧ ki̧'i̧pi̧nä̧tö̧; ja̧hua̧ta̧'a̧nö̧ Dan ahuaruhuä o'cotömä ¿dä̧bu̧ pä'ö huoi'quiyu jäyä kä̧nö̧ amöcuädä'chö ttö̧ji̧pä̧ttö̧? Aser ahuaruhuä o'cotömä jäyoto ka̧cui̧pi̧nä̧tö̧ ja̧'hua̧ta̧'a̧nö̧ jitötä ttöttahuärä rö̧ä̧ö̧ huoi'quiyu rä̧mä̧do̧mȩ tö'cö ki̧nä̧tö̧. ¹⁸ Zabulón ahuaruhuä o'cotöttömä tta̧'cua̧rö̧'i̧nä̧ iyäu icu totte'ome jubö yettecuoca'a rohuahuinätö̧, Ja̧hua̧ta̧'a̧nö̧ Neftali ahuaruhuä o'cotö'inä ja̧hua̧nö̧tä̧ huinätö̧, curä ttörohuähuomettömä. ¹⁹ Ruhuotö'inä rȩbȩhui̧pö̧, rohuähuinätö̧; Canaánttö̧ ruhuo hueätömä Taanac ötahuiyä Meguido ajei̧sä̧ra̧ tö'cöttö rohuähuinätö̧. Ja̧hua̧'a̧nö̧ ja̧'a̧nä̧ yorö'iso micuäu juhuäi pärätämä ȩmi̧po̧co̧tö̧ pi̧nä̧tö̧. ²⁰ Mo̧ro̧jä̧ra̧'a̧ttömä̧ si̧ri̧'cö̧'i̧nä̧ rohuähuinätö̧, ttu̧rö̧jo̧mȩttö̧ cue'ächö rohuähuinätö̧ Sísararömä. ²¹ Cisón aje su'ädi'ö juatädi'inä̧u̧, juhuoto Cisón ajemä, täbocutä päi'önä rinoto. ¡Cha̧'cua̧rö̧mä̧ yabocutä ujurucu 'cha̧'a̧! ²² Ja̧'hua̧nö̧ ja̧'a̧ttö̧ cabayu̧tu̧ ttunä 'ca̧tä̧huä̧tta pä̧i̧cu̧nä̧ ttöjurucu jotta'a rä̧mi̧pi̧na̧'a̧. ²³ ¡Merozrö suronä ja̧rö̧ pä'i! pä'inö TU̧RU̧HUA̧ mo̧ro̧jä̧nä̧ kö̧ u̧mu̧huä̧ya̧mä̧. !A̧, ja̧hua̧ta̧'a̧nö̧tä̧ ju̧huȩnȩ ka̧cui̧nä̧tö̧rö̧'i̧nä̧ suronä ja̧tö̧ ja̧ pä'itö! TU̧RU̧HUA̧RÖ̧ ppä'ädö tti̧'cho̧ca̧'a̧ ja̧'a̧ttö̧. TU̧RU̧HUA̧ su̧ro̧da̧u̧ juruhuätucu örohuähuome ppättädoca'a ja̧'a̧ttö̧. ²⁴ Jaelmä korotö nä̧tö̧ttö̧'i̧nä̧ abonänö adiunä pä'ö kö̧nä̧hua̧ju̧, Jaelmä (Ceneo ttö̧ja̧'i̧sa̧ Heber irecua), Jahuäjumä nä̧tö̧ isodenä kä̧tö̧ttö̧'i̧nä̧ abonänö adiunä pä'ö kö̧nä̧hua̧ju̧. ²⁵ Ubomä ajiya jä'epa'anä i̧sa̧ atate isoyatä kiyinäcu̧; ruhuotö ttö̧sä̧rä̧bi̧yä̧nä̧ isähuatä i'cächö kiyinäcu̧. ²⁶ Jahuäjumä koju'isode ti̧ä̧dä̧cuä̧huo̧'quȩ 'chu'ädö, ja̧hua̧ta̧'a̧nö̧ ku̧huo̧jua̧mö̧nä̧ aditö pȩä̧huäyu 'chu'ädo'ö; Sisara u dirächipönä pȩ'o̧pi̧nä̧ju̧. Jahuäjumä i'eraranä pȩjo̧po̧mȩnä̧mä̧ u isätta'inä pparächi'ina̧'a̧. ²⁷ Ja̧u̧mä̧ diyapächi'ö kö̧jä̧pi̧yä̧ 'cä̧tȩ, tecäcänö juȩnȩtä̧ mo̧'ä̧mi̧nö̧. Ujuru jui̧'a̧tä̧ kö̧jä̧pi̧yä̧ 'cä̧tȩ mo̧'ä̧mi̧nö̧. Juȩnȩ idiyähuächi'ä jo̧mȩtä̧ juruhuäi 'corupäi'inö. ²⁸ Jahuäjumä isode isatenä peracu topinäju̧. Sisara a̧ju̧mä̧ Isode isate isäcä 'cä̧tȩnä̧ topö ka̧'cua̧tta̧ päi'äcua pä̧i̧cu̧nä̧ huopinäju̧ ¿tta̧'a̧nö̧ pä'ö jurunänö ichoca'attö̧ öcarucämä? ¿tta̧'a̧nö̧ pä'ö cabayutu̧ ttunä 'ca̧tä̧huä̧ otta dödöäcuähua'anä ttöcaruquiyä dotta'anämä jurunänö ichoca'a jä̧ttö̧? ²⁹ Kumöhuäyotö nä̧tu̧ huo̧juȩcu̧nä̧ huotumä ädätinätö̧, ja̧'hua̧ta̧'a̧nö̧ jahuäjumä juhuätö pättäjita'anö ppa̧'a̧di̧pö̧ ädätinäju̧: ³⁰ ¿Jahuätumä 'chottipa pä'ö jä̧ji̧ ji̧nä̧ ttö̧'o̧cui̧'o̧ca̧'a̧ttö̧ iyä'chäcuähuocotö 'cua̧ra̧'a̧? ¿yajuterötäcö̧, ta̧ju̧ pö̧nä̧cö̧ u̧mä̧tö̧ yotucunärömä; pu̧jä̧ta̧ 'cucuecuä o̧ta̧ chottipäji Sisararö iyätöcö̧, pu̧jä̧ta̧ 'cucuecuä o̧ta̧ to̧ta̧rȩ pu̧nä̧ ttu̧ru̧pä̧'quȩ jo̧mȩ pätecu a̧'cua̧cu̧nä̧ 'tö̧ä̧huä̧ o̧ta̧ 'cho'ipätörö iyätö̧cö̧? ³¹ Ja̧'hua̧nö̧ jö̧ttö̧mä̧ o'catoinä cuabo'iyotömä 'corujuottächäcuotö, ¡TU̧RU̧HUA̧! ja̧hua̧nö̧ ja̧'a̧nä̧ ucu cuahuäruhuämä mo̧ro̧ ka̧huä̧ ujurucu cäecuächa'a jä̧'i̧nö̧'a̧nö̧ ttäcuotö. Ja̧hua̧nö̧ ja̧'a̧ttö̧ ja̧huä̧jä̧ rȩjȩnä̧ ka̧cuä̧tö̧mä̧ cuarenta a̧'ȩ jo̧mȩnä̧ huȩnȩ juiyönä ka̧cui̧nä̧tö̧.