¹ Aod 'corujuoächäji o'ca'a, Israel ttö̧ja̧mä̧ pä'äjita'anö TÖ̧Ä̧NÄ̧HUA̧ to̧ä̧ro̧mȩttö̧mä̧ surojötä jȩpö̧ ka̧cui̧nä̧tö̧. ² TÖ̧Ä̧NÄ̧HUA̧ Diosmä Canaán rȩjȩ ru̧hua̧ Jabin, Hazor ötahuiyä ruhuo hue'inörö̧ iyö i̧cui̧nä̧u̧. Ja̧u̧ umöhuäyotö su̧ra̧da̧u̧ ttu̧ru̧hua̧mä̧ Sisara pä'ö micuinö, ja̧u̧mä̧ ki̧nö̧ Harosel Goyimnä. ³ Israel ttö̧ja̧mä̧ TTÖ̧Ä̧NÄ̧HUA̧ ppädatö pä'ö pä̧i̧cu̧nä̧ huopönö jä'epinätö̧, Sísara Novecientonö cuoräu cäruquiyä u̧ju̧nä̧ri̧yä̧u̧ ja̧hua̧ta̧nö̧ Israel ttö̧ja̧rö̧ veinte ä̧'ȩ jo̧mȩnä pä̧i̧cu̧nä̧ ttösuräunä jȩi̧na̧'a̧ttö̧. ⁴ Jitämä Débora, Dios päö huȩnȩ jiäcuähuä isaju (Lapidot irecua), ja̧u̧nö̧ pä̧nä̧ Israelttö micuäunä pähuä jue'ipaju ji̧na̧'a̧. ⁵ Juajumä 'cuäopunä pä̧'chi̧'ä̧nä̧ju̧ Debora i̧so̧i̧ dȩa̧'a̧ Ramá ötahuiyättö'inä ja̧'hua̧ta̧nö̧ Betel ötahuiyättö'inä 'cä̧tȩ Efrain rȩjȩ möä'quiyö jo̧mȩ, ja̧'hua̧nö̧ ja̧'a̧ Israel ttö̧ja̧mä̧ 'chi̧'ä̧nä̧tö̧ juaju kö̧ja̧'a̧cu̧ jitörötä huȩnȩjö̧ aditäcuäö tticua pä'ö. ⁶ Jahuäjumä Abinoam i̧tti̧ Baracrö Cedes ötahuiyä, Neftali de'iyunä kö̧rö̧ jitähua'ja pä'ö hue'inäju̧. Jahuäju pä'inäju, Israel ttö̧ja̧ TÖ̧Ä̧NÄ̧HUA̧ Dios hueäjäcujä diez milnö huotörö Neftali ttö̧ja̧ttö̧'i̧nä̧ ja̧'hua̧ta̧nö̧ Zabulón ttö̧ja̧ttö̧'i̧nä̧ Tabor de'ara̧'a̧cu̧ o'ipö 'cui̧'cha̧ pä'ö. ⁷ Ttömä chȩpä̧cua̧sä̧ Sisararö, Jabín umöhuäyotö su̧ro̧do̧u̧ ttu̧ru̧hua̧rö̧, Kishon ajettö ttöäre caruquiyäcu'inä ja̧hua̧ta̧nö̧ su̧ro̧da̧u̧cu̧'i̧nä̧ cui'ätecuächätöcua pä'ö ja̧hua̧nö̧ jo̧mȩnä̧ ja̧u̧ ä'cattö iso juocuepönä ppä̧dä̧dä̧cua̧jä̧. ⁸ Barac jahuäjurö pä'inö, "ttöcu cuichöttötä, chi̧'chä̧cua̧sä̧, ja̧'hua̧nö̧ ja̧'a̧nä̧ ttöcu cui'choca'a jö̧ttö̧mä̧ ttö'inä 'cho̧cö̧sä̧". ⁹ Jahuäju pä'inäju, iso päinätä̧ ucutäcu chi̧'chä̧cua̧ju̧sä̧. Ja̧hua̧nö̧ ja̧'a̧nä̧ ucumä pi̧yȩttö̧mä̧ ucuo i̧sa̧ jö̧nä̧mä̧ pätti̧yä̧cua̧jä̧, iso päi'önä TÖ̧Ä̧NÄ̧HUA̧MÄ̧ isaju ku̧mu̧nä̧tä̧ i̧yä̧cua̧ Sisararömä". Ja̧u̧nö̧ o'ca'a Deboramä ä̧rä̧mi̧'ö̧ Baracu 'chinäju Cedesra'a. ¹⁰ Barac ä̧tȩpi̧nö̧ Zabulón umöhuäyotö u̧mä̧tö̧rö̧'inä ja̧hua̧ta̧nö̧ Neftali umöhuäyotörö'inä ji̧nä̧ yo̧mȩtȩ ca̧ca̧cui̧pö̧ tti̧'cha̧ pä'ö Cedesra'a. Diezmilnö umätö̧ o'canä 'chi̧nä̧tö̧, ja̧'hua̧ta̧nö̧ Debora'inä ja̧u̧tä̧cu̧ yo̧mȩtȩnä̧ 'chi̧nä̧ju̧. ¹¹ Ja̧'hua̧ta̧'a̧nö̧ Heber (Quenita ttö̧ja̧'i̧sa̧mä̧) 'quȩ'ȩcuä̧chi̧nö̧ Quenita ttö̧ja̧ttö̧mä̧ - jahuätömä Hobab ahuaruhuä o'cotö ji̧na̧'a̧ (Moisés i̧mi̧ya̧)- Ja̧'hua̧ta̧'a̧nö̧ ja̧u̧mä̧ oju isode huä̧ni̧nö̧ Roble dau tö'cö jo̧mȩ Zaanaimnä, Cedes ötahuiyättömä tö'cönänö. ¹² Jahuätö Sísararö, Abinoam i̧tti̧ Baracmä Tabor mö'ca'aracu 'chä̧ji̧ pä'ö jittähuäcu, ¹³ Sisaramä huopinö o'ca juiyö öäre caruquiyä, novecientonö cuoräö ocä juȩ'ȩpä̧rä̧tö̧rö̧'i̧nä̧, ja̧'hua̧ta̧nö̧ o'ca to'iönä su̧ro̧da̧u̧ chucutä ka̧cuä̧tö̧rö̧'i̧nä̧, Haroset Goyimttö kä̧mä̧dö̧ Cison aje jubö. ¹⁴ Débora Baracrö pä'inäju̧: ¡täi! Jitä mo̧ro̧ TÖ̧Ä̧NÄ̧HUA̧ ucuru iyäji Sisararö rohuä'u iso juocuepa pä'ö". "¿TÖ̧Ä̧NÄ̧HUA̧MÄ̧CÖ̧ tä̧ji̧ ucuru juȩ'ȩpä̧rö̧mä̧?" Ja̧hua̧nö̧ ja̧'a̧ttö̧ Baracmä mȩyȩhui̧nö̧ Tabor möä'cattö diezmilnö u̧mä̧tö̧ chutäcu cue'ächätucu. ¹⁵ TTÖ̧Ä̧NÄ̧HUA̧MÄ̧ Sisara umuhuäyotö su̧ra̧da̧u̧ru̧mä̧ jerutu icuinö, o'cajuiyönä ttiäre cuoräu caruquiyä'inä ja̧hua̧ta̧nö̧ o'ca toi'önä umuhuäyotö su̧ro̧da̧u̧ru̧'i̧nä̧. Barac umuhuäyotö ttörohuähui'omenä, Sisaramä ö'äre cuoräu carucättö mȩyȩhuä̧chö̧ ö̧jä̧pö̧nä̧tä̧ tö'ipächinö. ¹⁶ Ja̧hua̧nö̧ ja̧'a̧nä̧ Baracmä jahuätö ttiäre cuoräu caruquiyä juȩ'ȩpä̧rä̧tö̧rö̧'i̧nä̧ ja̧hua̧ta̧nö̧ su̧ro̧da̧u̧ru̧'i̧nä̧ tto'ca'anä ruhui'inö Haroset Goyim jubö, ja̧hua̧nö̧ jȩpö̧ Sisara umuhuäyotö su̧ro̧da̧u̧ru̧ 'cui'ö icuinätö curä o'chunä̧tä̧, juorömä ya̧tȩ'i̧nä̧ a̧'cua̧ra̧mä̧ ki̧'i̧po̧cö̧ pi̧nö̧. ¹⁷ Ja̧'hua̧ta̧nö̧ Sisara tö'ipächinö ö̧ja̧pu̧nä̧tä̧ Heber irecua Ceneo ttö̧ja̧'isaju Jael koju isodera̧'a̧cu̧, Jabin Hazor ötahuiyä ru̧hua̧cu̧mä̧ ja̧hua̧ta̧nö̧ Haber Ceneo ttö̧ja̧'i̧sa̧ oju isodecumä huȩnȩ juiyönä ki̧nä̧tö̧. ¹⁸ Jael räjopomenä topinä̧ju̧ Sisararö ja̧'hua̧nö̧ ja̧'a̧ päji̧nä̧cu̧, "ichi, chu̧ru̧hua̧ huo̧juȩcuä̧'i̧sa̧; yecuecuoca'a ichi ttöcu". Ja̧hua̧nö̧ päjäcu jahuäju kö̧jo̧mȩcu̧ 'chä̧hui̧'ö̧ kojusodenä do'ächinö ja̧hua̧ta̧'a̧nö̧ juhuajumä ttojepinäcu̧ jä̧ttä̧pä̧ya̧ tto̧ȩcuä̧chä̧ta̧nä̧. ¹⁹ Ja̧u̧mä̧ pä'inö jahuäjuru, "ji̧'qui̧ya̧nö̧ ajiya chahua iyö ppä'adittö, juiyo chahua a̧di̧ri̧jä̧cu̧sä̧". Ja̧hua̧nö̧ päcua kahuäba i̧sa̧ i̧jȩtä̧ttö̧ adicuäba ba'epo'ö iyinäju̧ i̧sa̧ atateja ahuapä'ö, ja̧hua̧'a̧nö̧ jä̧ji̧ o'ca'a pä'äjita'anö ttojepinäcu̧. ²⁰ Ja̧u̧ pä'inö jahuäjuru, "isode doächäcuähuome ä'ca to̧pä̧rö̧ kä̧hui̧. Ya̧tȩ ichi'ö ucuru, ¿Ka̧ra̧'i̧nä̧ ö̧ja̧'a̧ pȩnȩmä̧? pä'ö jäepöttömä, toa'a päcuajá". ²¹ Jä̧'huanö jä̧ji̧ o'ca'a (Heber irecua) Jaelmä isode o̧ta̧ 'chu̧a̧ra̧ pä'ö pȩä̧huo̧'quȩ'i̧nä̧, pȩä̧huäyu'inä ȩmo̧po̧'ö̧,Sisara täcunä ä'ö ö̧'o̧mȩ yä̧huä̧i̧nä̧ 'chä̧hui̧'ö̧ unä pätecua'anä ppörahui'önä pȩjo̧pi̧nä̧cu̧ ja̧'hua̧nö̧tä̧ 'corupä'i'inö. ²² Baracmä Sisararö o'ca'anä ru̧huä̧ra̧'a̧ topö, Jael pä̧tȩcuä̧nö̧ rä'o'ö päjinäcu̧, "ichi'i, cu̧sä̧rä̧cu̧ru̧ chi̧jȩpa̧cu̧". Ja̧hua̧nö̧ ja̧'a̧ Jahuäjucu 'chä̧hui̧'ö̧ Sisararö unä i̧so̧'quȩnä̧ pȩ'o̧cua̧, o'co jähuätä pa̧'a̧ po̧cui̧pi̧nö̧. ²³ Ja̧'hua̧nö̧ ja̧'a̧ttö̧ ja̧u̧nö̧ mo̧ro̧ TÖ̧Ä̧NÄ̧HUA̧MÄ̧ Canaán rȩjȩ ru̧hua̧ Jabinrö̧, rohuä'ö iso juo'epinö Israel ttö̧ja̧ ttä'ca jo̧mȩttö̧. ²⁴ Ja̧'hua̧nö̧ ja̧'a̧ttö̧ Israel ttö̧ja̧mä̧ yabocutä juruhuächi'inätö̧ Canaán rȩjȩ ru̧hua̧ Jabin a'ca jo̧mȩttö̧, si'epö tticuome jubö päinä.