¹ Abimelec 'corujuhuächinö o'ca'a, ruhuo ä̧rä̧mi̧'i̧nö̧ Israel ttö̧ja̧rö̧ ppäda pä'ö, Tola Púa i̧tti̧, Do̧do̧ ö̧do̧. Ja̧u̧mä̧ Isacar ahuäruhuä 'cotö ttö̧ja̧'i̧sa̧ ji̧na̧'a̧ Samir pä'ö micuome ki̧nö̧ Efrain de'iyunä. ² Ja̧u̧mä̧ ruhuo hue'ö ki̧nö̧ 23 a̧'ȩ jo̧mȩnä̧ Israel ttö̧ja̧rö̧, ja̧u̧nö̧ o'ca'a 'corujuhuo'ächinö Samirttö̧tä̧ ju̧huȩnȩtä̧ 'törö tticuinäcu̧. ³ Jaunu o'ca'a 'cuopina'a Jair Galaadita ttö̧ja̧sarö̧. Ja̧umä̧ hue'inö̧ Israel ttö̧ja̧rö̧ 22 año jomenä̧. ⁴ Ja̧u̧mä̧ kunä̧rinö̧ i̧tti̧mö̧rö̧ treintanö̧(30) jo̧me jahuättö o'catoi'önä̧ burronä̧ huä̧cuä̧huä̧ isottö ji̧na̧'a̧ ja̧hua̧nö̧ ja̧'a̧ttö̧ kunä̧rinä̧tö̧(30) ötahuiyä jo̧me Galaat rȩjȩnä̧, juȩnȩmä̧ micuome Havot Jair pä'ö jitä mo̧ro̧ jubu. ⁵ Jair 'corupä'i'nö̧ ja̧hua̧nö̧ ja̧'a̧ttö̧ tturepö tticuincu Camon rȩjȩnä̧. ⁶ Israel ttö̧ja̧mä̧ TU̧RU̧HUA̧ to̧ä̧ro̧mȩttö̧ pä'äjita'anö suronä jȩpö̧mä̧ Aram ttö̧ja̧, Sidón ttö̧ja̧, Moab rȩjȩ ttö̧ja̧ Amón ttö̧ja̧ ja̧'hua̧ta̧'a̧nö̧ Filisteas ttö̧ja̧ ttö̧ä̧nä̧huo̧tö̧ Baalesrutä, Astarotrutä, ucuo te'ähuinätö̧. Jahuätömä TU̧RU̧HUA̧RÖ̧ jaropi'ö yabonömä ucuo te'ähuocotö pinätö̧. ⁷ TÖ̧Ä̧NA̧HUA̧MÄ̧ Israel ttö̧ja̧rö̧ ru̧ȩnä̧ a̧mi̧surächi'inä̧cu̧, ja̧'hua̧nö̧ ja̧'a̧ttö̧ Filisteas ttö̧ja̧ ja̧'hua̧ta̧'a̧nö̧ Amon ttö̧ja̧ huettatö pä'ötä iyipinä̧u̧. ⁸ Ja'huätö Israel ötahuiyä ttö̧ja̧mä̧ dieciocho a̧'ȩ jo̧mȩnä̧ tta̧'cua̧ tta̧ȩcu'í̧nä usurä inä ȩmähuí̧nätö̧ ja̧unu pä̧nä̧mä̧ ja̧'hua̧ta̧'nö jahuätö o'catoi'önä̧ Israel ttö̧ja̧mä̧ juiyo riänä usurä emähuí̧nätö Jordán aje jua'a yabonänö Amorreos ttí̧rejä̧nä̧ Galaad ötahuiyänä ttö̧jo̧cuinömä. ⁹ Ja̧'hua̧nö ja̧'a̧ amon ttö̧ja̧mä̧ kähuächinätö̧ Jordán aje judá ttö̧ja̧cu ttörohuahua pä'ö Benjanmín ahuäruhuäcu'inä̧ efraín ahuäruhuäcu'inä, ja̧'hua̧nö̧ ja̧'a̧nä̧ Israel ttö̧ja̧mä̧ rö̧'ä̧nä̧ toe'inätö̧. ¹⁰ Ja̧'hua̧nö̧ jä̧u̧ Israel ttö̧ja̧mä̧ TÖ̧Ä̧NÄ̧HUA̧RÖ̧ pä̧i̧cu̧nä̧ huopönö̧ pä'inätö̧ "Ucuru suronä jȩpä̧jä̧tö̧jä̧, juhua'amä TÖ̧Ä̧NÄ̧HUA̧RÖ̧ cä'ädi'ö Baales pä̧ttä̧u̧rö̧tä̧ ucuo tetähuomenä." ¹¹ TÖ̧Ä̧NÄ̧HUA̧MÄ̧ Israel ttö̧ja̧rö̧ pä'inö, "¿Egipto ttö̧ja̧ttö̧'i̧nä̧, Amorreos ttö̧ja̧ttö̧'i̧nä̧, Amon ttö̧ja̧ttö̧'i̧nä̧, Filisteos ttö̧ja̧ttö̧'i̧nä̧, ¹² ja̧'hua̧ta̧'a̧nö̧ Sidon ttö̧ja̧ttö̧'i̧nä̧ rä'epömä chicuoco̧u̧ pinätöjä̧?" Amalecitas pä̧ttä̧u̧'i̧nä̧, Madián ttö̧ja̧'i̧nä̧ pä̧i̧cu̧nä̧ cuäcuäpö huettinäujä̧ ja̧'hua̧nö̧ jä̧u̧ ajäunö jäcuepätucuäcumä jahuätö huettomettö̧ rä'epö chicuinä̧u̧jä̧. ¹³ Ja̧'hua̧nö̧ ja̧'a̧nä̧'i̧nä̧ ttörömä jaropinätö̧jä̧ korotö ttö̧nä̧huo̧tö̧rö̧tä̧ ucuo teähuinätö̧jä̧. Ja̧'hua̧nö̧ ja̧'ttö̧ ji̧nä̧ yabocumä ppä'ädocö chä̧cua̧sä̧. ¹⁴ Ja̧'hua̧nö̧ ja̧'a̧ttö̧ 'chä̧nö̧ jä'epätucui yapare cu̧huä̧nä̧hua̧tu̧ru̧ ucuo tecuähuinäu̧tu̧cu̧ru̧ huȩnȩ cu̧ju̧nä̧rä̧tu̧cu̧ttö̧mä̧ jahuätötä ppättädätucuacujä̧. ¹⁵ Ja̧'hua̧nö̧ ja̧'a̧nä̧ Israel ttö̧ja̧mä̧ pä'inätö̧ Ttö̧ä̧nä̧hua̧rö̧, "iso päi'önä ujutumä jäyänä jȩpä̧tö̧jä̧. Ja̧'hua̧nö̧ ja̧'a̧ttö̧ ucurutä adihuomenä jȩpi̧ttö̧. Ja̧'hua̧nö̧ ja̧'a̧ ji̧yȩtȩtä̧ jä'epätöjä, pi̧yȩ mo̧ro̧ ppäcuädattö pä'ö. ¹⁶ ja̧'hua̧nö̧ ja̧'a̧ttö̧ Israel ttö̧ja̧mä̧ yapare ttö̧ä̧nä̧huo̧tö̧rö̧ jaropinätö̧, pä'äjita'anö Ttö̧ä̧nä̧hua̧ Diosrötä ucuoteähuinätö̧, ja̧'hua̧nö̧ ji̧yä̧cu̧ a̧cua̧tta̧'ȩcui̧nö̧ Israel ttö̧ja̧ usurä ttȩma̧hua̧'a̧ topö. ¹⁷ ja̧u̧nu̧ o'ca'a Amon ttö̧ja̧mä̧ ji̧nä̧ yo̧metȩ pä'i'inä̧tö̧ ja̧hua̧nö̧ pä'i'ömä̧ Galaadnä̧ ka̧cuä̧minä̧tö. ¹⁸ Israel ttö̧ja̧mä̧ ji̧nä̧ yo̧metȩ pä'i'inä̧tö̧ ja̧hua̧nö̧ pä'i'ömä̧ ka̧cuä̧minä̧tö̧ Mizpa rȩjȩnä̧. ¿diquijä̧ ujututtu ä̧cuomenä̧ kä̧mä̧dö̧ ö̧ro̧huä̧huä̧cua̧mä̧ Amon ttö̧ja̧cu̧? Ja̧u̧ jä̧cua̧'a̧ Galaad rȩjȩnä̧ ka̧cuä̧tö̧ ttu̧ru̧hua̧ jä̧cua̧mä̧.