¹ Jerobal i̧tti̧ Abimelec 'chi̧nä̧ ja̧ju̧ kahuäruhuä ttojusodera'a Siguemra̧'cu̧, jahuätö ocato'inärö̧ ja̧ju̧tu̧tä̧ ji̧na̧ yotöte huotörömä pä'inö: ² "Ppä'ädipätucuitöpi̧yȩ ji'äu, Siquemttö̧ ruhuo hue'ätö o'catoinä ttä̧ju̧cua̧: ¿Däje ö'adihuä ja̧'a̧ttö̧ ucuturumä: Setenta huotö Jerobaal i̧tti̧mö̧ ruhuo huetta'anä cu̧jä̧tu̧cua̧'a̧mä̧, ja̧hua̧'a̧nö̧ jo̧ca̧ jö̧ttö̧mä̧ ya̧tȩtä̧ huea'anä cu̧jä̧tu̧cua̧'a̧nö̧ ja̧'a̧ ucuturumä? amucuädatucui ttö'inä jahuätötä ta̧hua̧ru̧hua̧sä̧. ³ Ja̧ju̧ttu̧ ahuäruhuämä ja̧u̧nä̧ ucuocuinätö̧ Siquemm ötahuiyä ruhuotörö, ja̧hua̧nö̧ jo̧mȩnä̧ Abimelec o'ca'anä ti̧'chä̧cuo̧tö̧jä̧ pä'ömä, pa̧'a̧nö̧ pä'inätö̧. "Jaumä isopä'inä ujututä tuhuo ja̧'a̧. ⁴ I̧yi̧nä̧tö ya'ate ki̧lo̧ jo̧mȩ pärätä yapare ttö̧ä̧nä̧hua̧ Baal Berit ojusodettömä. Jahuanö ja̧'a̧ttö̧ Abimelecmä ttö̧ja̧ huȩnȩ huotörö ja̧hua̧ta̧'a̧nö̧ juruhuätörö mitö ca̧ca̧ti̧nö̧ jahuätö tti̧'chi̧nä̧cu̧. ⁵ Abimelecmä Ofra ötahuiyänä jä'o ojusodera'a 'chä̧huo̧ä̧ji̧'ca̧, ja̧hua̧nö̧ ja̧'a̧ i̧nä̧huä̧ huä̧mȩ kä̧mä̧dö̧ ahuaruhuä i̧ja̧hua̧tö̧ diez y sietenö huotörö cuä'ö icuinö, Jerobaal i̧tti̧mä̧ru̧. Jerobaal i̧tti̧ röji ru̧hua̧tä̧ ji̧na̧'a̧ ki̧'i̧pi̧nö̧mä̧ ja̧u̧tä̧ dajahuächinömä. ⁶ O'catoi'önä Siquem ötahuiyättö ruhuo hueätö'inä Bet Milo ojusodenä ji̧na̧ yo̧mȩtȩ ca̧ca̧cui̧pö̧ Abimeclerö ttö̧ru̧hua̧ jö̧nä̧ jȩpi̧nä̧tö̧, Siquem ötahuiyä tö'cö käji dau röäinä. ⁷ Jotánmä pi̧yȩ tö'cö jittähuäcu, 'chä̧hui̧'ö̧ Gerezim mö̧ä̧'ca huä̧mȩ kä̧mä̧dö̧ huopönö pä'inö: "Ä̧ju̧cuä̧tu̧cui̧ttö̧, ucutu Siquem ttö̧ja̧ tturuhuotö Dios ä̧ju̧cuä̧tu̧cua̧cu̧. ⁸ Ya'utenä dauhuiyämä ya̧tȩ ru̧hua̧rö̧ ttu̧ru̧hua̧ jö̧nä̧ hueatö pä'ö ku̧nö̧ 'chi̧nä̧tö̧. Ja̧'hua̧nö̧ ja̧'a̧ jahuätömä Olivo daurö pä'inätö̧, 'Ujutu tu̧ru̧hua̧ jö̧nä̧ hue'itö' ⁹ Ja̧'hua̧nö̧ ja̧'a̧nä̧ Olivo daumä pä'inö: '¿Chua̧dȩ chiya pä'ö ja̧'a̧, ttö̧ä̧nä̧huo̧tö̧ ja̧'hua̧ta̧'a̧nö̧ ttö̧ja̧ ucuotö jȩtta̧'a̧ ttö ppa̧'a̧chö̧ koro dauhuiyärö ucuotö ja̧rȩyö̧ pädi'a pä'ömä̧? ¹⁰ Dauhuiyämä higo daurö pä'inätö̧: 'Ichi, ujutu tu̧ru̧hua̧ jö̧nä̧ huecuatö.' ¹¹ Ja̧'hua̧nö̧ ja̧'a̧nä̧ higo daumä päinäi: '¿Ttömä chu̧sa̧di̧'i̧nä̧ ja̧'hua̧ta̧'a̧nö̧ chu̧hua̧jö̧ adiu'inä cädädächa pä'ö ja̧'a̧, ja̧u̧ ji̧yȩtȩnä̧tä̧mä̧, ja̧'hua̧ta̧'a̧nö̧ ppa̧'a̧chö̧ koro dauhuiyärö ucuotö ja̧rȩyö̧ pädi'a pä'ömä̧? ¹² Dauhuiyämä viña u̧ru̧hua̧rö̧ pä'inätö̧: 'Ichi, ujutu tu̧ru̧hua̧ jö̧nä̧ huecuatö.' ¹³ viña u̧ru̧hua̧mä̧ ädätinö: '¿Chu̧huä̧ju̧ vino jareu chiyä'ija'amä̧ chiyoca'a jä̧cua̧'a̧, ttö̧ä̧nä̧huo̧tö̧'i̧nä̧ ja̧'hua̧ta̧'a̧nö̧ ttö̧ja̧'i̧nä̧ ttesehuachi'önä ja̧'hua̧ta̧'a̧nö̧ ppa̧'a̧chö̧ koro dauhuiyärö ja̧rȩyö̧ pä̧di̧'ä̧cua̧'a̧? ¹⁴ Ja̧u̧nö o'ca'a dauhuiyämä o'cajuiyönä päina'a Zarzarö: 'Ichi, ujutu tu̧ru̧hua̧ jö̧nä̧ huecuatö.' ¹⁵ Zarzamä̧ dauhuiyärö pä'inö: 'Isopäi'önä ucuturu ru̧hua̧ jö̧nä̧ huedätucuacu pä'ö cutätucua päcuätucuttömä, ttö chi̧dȩa̧'a̧ ttijo̧mȩ po̧cui̧pö̧ dajahuächö cu̧jä̧tu̧cua̧ ichätucui. Ja̧'hua̧nö̧ jö̧ juiyöttömä, zarza isadettö ocurä cuoa'anä ja̧'a̧tä̧ topätucui ja̧'hua̧ta̧'a̧nö̧ Libano mö̧ä̧'quiyönä ka̧cu̧ cedro dauhuiyä cuo'ö icua'anä ja̧'a̧tä̧ topätucui.' ¹⁶ Ja̧'hua̧nö̧ ja̧'a̧nä̧ jitämä, isopäi'önä̧ jö̧nä̧'i̧nä̧ ja̧'hua̧ta̧'a̧nö̧ jueö huȩnȩnä̧'i̧nä̧ jȩ'cuä̧'i̧jä̧tu̧cu̧ttö̧mä̧, Abimelecrö ru̧hua̧ jö̧nä̧ cutinätu̧cu̧mä̧, chutä Jerobaalrö'inä ja̧'hua̧ta̧'a̧nö̧ i̧tti̧mö̧'i̧nä̧ adiu jȩpä̧'i̧jä̧tö̧jä̧, ja̧'hua̧ta̧'a̧nö̧ churutä adihuomenä ro̧'ȩpi̧nä̧tö̧jä̧ ¹⁷ Ja̧hua̧ta̧'a̧nö̧ ttö chä'o ucutunä örohuähuinö'inä usurä ȩmä̧hui̧nö̧'i̧nä̧ ja̧hua̧ta̧'a̧nö̧ Madián ttu̧mu̧nä̧ cu̧jä̧tu̧cua̧'a̧ ppädinäu̧jä̧. ¹⁸ Ja̧hua̧nö̧ ppädinäu̧ cuätuca'anä jitä mo̧ro̧mä̧ to'ija̧'a̧cu̧tä̧ jȩpä̧tö̧jä̧ chä'o ojusodenämä ja̧hua̧nö̧ jȩpö̧ setentanö huotörö inähuä ju'tattö cuä'öuicuäjätöjä, ja̧hua̧nö̧ja̧'a̧nä̧'i̧nä̧ ucutumä Abimelecrömä jȩpä̧tö̧jä̧. Chu̧tä̧ umuhuäyajuttö i̧tti̧rö̧tä̧ Siquen ru̧hua̧ päi'önä ö̧ja̧ pä'ö ja̧u̧mä̧ isopä'iönä ujututä i̧sa̧ päcuätucua'attö. ¹⁹ Jitä mo̧ro̧ adiu juhueönä cua̧cua̧ huenärö̧ jȩcuä̧i̧jä̧tu̧cu̧ttö̧mä̧ Jerobaalrö ja̧'hua̧ta̧'a̧nö̧ ahuaruhuärö'inä, jahua'anö jö̧ttö̧mä̧ Abimelecu esecuätucui parocua'attö ja̧u̧'i̧nä̧ eseu ö̧jä̧cua̧'a̧nö̧ ucutucu. ²⁰ ja̧'hua̧ta̧nö̧ adiu a̧cua̧huä̧nä̧rö̧ jȩo̧ca̧'a̧ jö̧ttö̧mä̧ ocumätä̧ rä'opäcua̧, Abimelecmä. Ja̧'hua̧nö̧ jȩpu̧ ku'icuä̧cua̧ Siqueminä ja̧hua̧ta̧'a̧nö̧ Bet Milo ttö̧ja̧rö̧mä̧. Ja̧'a̧tä̧ topätucui ocurämä ra'opa'anä Siquem ttö̧ja̧tö̧'i̧nä̧ juata'anö Bet Milo ttö̧ja̧tö̧'i̧nä̧, Abimelecrö ku 'tticua pä'ö. ²¹ Ja̧'hua̧ta̧'a̧nö̧ Jotammä otó jopu töipächinö, ja̧hua̧'a̧nö̧ ja̧cu̧ ihuinö Beera'acu. Juahua'atä otó ki̧nö̧ ubu'o Abimelecrö ye'ecu. ²² Abimelecmä huäbodäcuä a̧'ȩ jo̧mȩnä̧ ruhuo hue'inö Israelnämä. ²³ Diosmä Abimelecrö ja̧'hua̧ta̧'a̧nö̧ Siquem ttö̧ja̧ ttöröhuotörö'inä suroppa hue'inö. Siquem ttö̧ja̧ ttöröhuotöömä Abimelecu esecu ttö̧jä̧'i̧mä̧ jarotti'inäcu̧. ²⁴ Pi̧yȩmä̧ Diosmä jȩpi̧nö̧ Jerobaal ö̧ja̧hua̧mu̧ diecisietenö huotörö suronä jȩttä̧ji̧ micuähuächia pä'ö ja̧'hua̧ta̧'a̧nö̧ jahuätörö huättähuinömä Abimelec ö̧ja̧hua̧tö̧ ji̧na̧'a̧ jä̧cua̧nö̧, ja̧'hua̧ta̧'a̧nö̧ Siquemttö u̧mä̧tö̧rö̧ 'chöttätäcuanö ttö̧ja̧cua̧tö̧rö̧ cuä'ö tticua'a pä'ö ppättäteta'anö. ²⁵ Ja̧'hua̧nö̧ ja̧'a̧ttö̧ Siquem ttö̧ja̧ ttöröhuotömä u̧mä̧tö̧rö̧ ku̧ni̧nä̧tö̧ pä̧mä̧ro̧mȩ tta̧'a̧rö̧ juȩnȩ 'cuä'opätörö 'chu'ätächö ttö̧nä̧'i̧cuä̧ra̧ pä'ö. pi̧yȩ huȩnȩmä̧ jiähuinätö̧ Abimelecrö. ²⁶ Ebed i̧tti̧ Gaalmä̧ tö'cönä ahuaruhuäcu ichinö̧, ichi'ömä̧ Siquem ötahuiyära̧'a̧cu̧ 'chi̧nä̧tö̧. Siquem ötahuiyä ttö̧ja̧ tturuhuotömä ja̧u̧rö̧ tta̧'cua̧ huȩnä̧ri̧nä̧tö̧. ²⁷ Jahuätömä cuähuä ka̧cuo̧mȩ 'cha̧hui̧'ä̧'cotö ca̧ca̧ti̧nä̧tö̧, ja̧'hua̧ta̧'a̧nö̧ uvas oi ka̧cuo̧mȩttö̧ uvasmä 'cuȩ'cui̧nä̧tö̧. Jahuätömä ttö̧ä̧nä̧hua̧ ojusodettö pä'cäri jȩpö̧ juhuorötä cuä̧nö̧ ja̧'hua̧ta̧'a̧nö̧ au kä̧nö̧ Abimelecmä̧ suronätä̧ ja̧rö̧jä̧ pä'inätö̧. ²⁸ Ebed i̧tti̧ Gaalmä̧ pä'inö: "¿Dijä̧ttö̧ Abimelecmä̧ ja̧'hua̧ta̧'a̧nö̧ dijä̧ttö̧ Siquemä, däje ppätädarö pä'attö̧? ¿Ja̧u̧mä̧ Jerobaal i̧tti̧mä̧cö̧? ¿Ja̧u̧ u̧mö̧huä̧ya̧mä̧ Zebulmä̧cö̧? ¡Siquem jä'o Hamor i̧tti̧mö̧rö̧tä̧ ppä'ädätucui! ¿Tta̧'a̧nö̧ pä'ö Abimelecmä ppätädarö pä'attö̧? ²⁹ ¡Pitö ttö̧ja̧ ttörö adihuomenä hueda'anä ttö̧ja̧cu̧ttö̧mä̧! Ja̧'hua̧nö̧ jö̧ttö̧tä̧ Abimelecrömä rä'epö chicu'anö̧ ja̧'a̧. Ttömä Abimelecrö pädö'anö̧ ja̧'a̧: Cu̧mö̧huäyotö su̧ro̧da̧u̧ o'catoi'önärö̧ rä'epu icui.' ³⁰ Jahua'nö jomenä bäreu ötahuiyättö Su̧ro̧dau̧ ttu̧ru̧hua̧ Zebul a̧ju̧cui̧nö Ebed i̧tti̧ Gaal ucuocu huene, jahuanö jo̧menä röä̧'inä amisurächi'inäcu. ³¹ Ja̧u̧mä hueinö huȩnȩ ttöja̧i̧sa̧rö̧ jiähuäja pä'ö yapare huene Abimelecrö pa'anö pä'ö: Topihuä Ebed i̧tti̧ Gaalmä jahuata'anö chutä ahuaruhuäcu ichätö Siquem ra̧'a̧cu̧, jahuata'anö jahuätömä ötahuiyänä suronä ucuocuä'chattö ucuru suroju ttepapä'ö. ³² Jitämä, ucu cumö̧huäyotö su̧ro̧da̧u̧cu yodo ä̧rä̧mi̧'ö̧ täi, ja̧'hua̧ta̧'a̧nö̧ cuähuä ka̧cuo̧mȩ dajahuächö'ca̧ rä'o'ö curohuähuäcuome jo̧mȩnö̧ jȩpö̧ cu̧ju̧na̧. ³³ Ja̧u̧nu̧ o'ca'a koro mo̧ro̧, pä'ö mo̧ro̧ juoa'a, ji̧nä̧ yo̧ä̧i̧ ä̧ra̧mi̧'ö̧ ötahuiyära̧'a̧cu̧ docuächajä̧. Ja̧'hua̧nö̧ ja̧'a̧ ttö̧ja̧ chutäcu ka̧cuä̧tu̧mä, ucucu tturohuähua pä'ö rättoi'omenämä̧, o'cajuiyönä ucuru pä̧huä̧rö̧jo̧mȩnä̧ jȩ'cua̧tö̧ja̧." ³⁴ Ja̧'hua̧nö̧ ja̧'a̧ttö̧mä̧ Abimelecmä chodo ä̧rä̧mä̧chi̧nö̧, ja̧u̧mä̧ o'catoinä umuhuäyo'inä, Siquem ttö̧ja̧rö̧ chöttäda pä'ö jȩpi̧nä̧tö̧ pa̧ja̧cuä̧nö̧ jo̧mȩnä̧ 'cä̧'ȩcuä̧chö̧. ³⁵ Ebed i̧tti̧ Gaalmä ötahuiyä apate toächäcuähuomecu̧ rä'ochö jo̧mȩnö̧ ki̧nö̧. Abimelec'inä ja̧hua̧ta̧'a̧nö̧ chucutä ka̧cuä̧tö̧mä̧ ttödacuächomettö̧ rä'opinätö̧. ³⁶ Gaal jahuätörö topömä, ja̧u̧mä̧ Zebulrö pä'inö: "¡Topi, u̧mä̧tö̧mä̧ pä̧mä̧ro̧mȩttö̧ mȩyȩhuö̧ iyätö! Zebulmä päinäcu̧: "Ucutumä topätöjä pämärome a̧cua̧juȩ u̧mä̧tö̧ a̧cua̧rö̧nä̧". ³⁷ Gaalmä pä'äjita'anö ucuocuinö pä'inö: "Topätucui, u̧mä̧tö̧mä̧ mȩyȩcuä̧tö̧ rȩjȩ kä'conä, ja̧hua̧ta̧'a̧nö̧ jitötemä jeruö huo̧juä̧tö̧ dauhuiyä oicu mä̧nä̧nä̧ iyätö. ³⁸ Ja̧u̧nu̧ o'ca'a Zebul pä'inö: " ¿ jitämä tene ka̧'acuä̧ttö̧ huene ucuo tecuähuäjimä?. Ucutäkö̧ dinä pä'inömä ¿Dijä̧ttö̧ Abimelecmä ujutu hue'ö jȩttiya̧rö pä'ämä.? ¿ pitömäcö̧ tä̧ji̧ ucu cua̧u̧tinäu̧mä? jitamä rä'opi jahuätucu curohuähua. ³⁹ Gaal ra'oinö Siquem tu̧ru̧hua̧ pä'iönä, jahuanö jepa̧'ö rohua huinö Abimelecrö. ⁴⁰ Abimelecmä ru̧huä̧rinö Gaal tö'ipächa'a ä'ca jo̧metö. Recuätö 'corujuhuo ächinätö̧ öyahuiyä röo̧me doächäcuome ä'catö. ⁴¹ Abimelmä Arumanä ki̧'i̧pi̧nö̧. Zebulmä Gaalru'inä ja̧'hua̧ta̧'a̧nö̧ ahuäruhuäru''inä Siquemra̧ ti̧'cha̧'a̧ pä'ö. ⁴² Koro mo̧ro̧mä̧ Siquem ttö̧ja̧mä̧ rä'opinätö̧ meje'cacu ja̧hua̧nö̧ jö̧mä̧ jiähuinätö̧ Abimelecrö. ⁴³ Ja̧u̧mä̧ umuhuäyotöcu pä'iö, huäbodäcuänö jo̧mȩnä̧ 'cä̧'ä̧cuä̧chö̧, jomenö jȩpö̧ ku̧ni̧nä̧tö̧ tteruhuonä 'chuttädatö pä'ö. Ja̧u̧mä̧ to'ome topinö ttö̧ja̧ utahuiyättö rättopa'a. Ja̧'hua̧nö̧ ja̧'a̧ttö̧ rohuäu cuä'ö icuinäu̧. ⁴⁴ Abimelec u̧mö̧huäyotö chutäcu kä̧tu̧mä̧ rohuäu ötahuiyära̧'a̧cu̧ doächäcuähuomȩ mö̧'ȩpö̧ icuinätö̧. Korotö tosaremä̧ pättiyönä ka̧cuä̧tö̧ o'catoi'önä̧rö̧ rohuäu cuä'äu icuinätö̧. ⁴⁵ Abimelecmä̧ mo̧ro̧ cuäo'önä̧ rohuähuinö ötahuiyä ttö̧ja̧cu̧mä̧. Ja̧u̧mä̧ ja̧u̧ ötahuiyänä ka̧cuä̧tö̧rö̧ 'chu'ädö cuä'äu icuinö. Ja̧u̧mä̧ ötahuiyä ttoecu obä pparopö icu, ja̧u̧tä̧ huä̧mȩ 'cäruhuäbö riripinö̧. ⁴⁶ Jahua'a̧nö̧ jo̧menä o'cato'inä ucuo ruhuotörö ttahuärä̧cuähuome ju'toju jodettö Siquem, ttöja̧mä huȩnȩ ä̧ju̧cuinätö, ja̧hua̧nö̧ ä̧ju̧cu̧ jahuätömä do'ächinätö̧ Berit ojusode 'quiyodera'a. ⁴⁷ Abimelecrö jiähuinätö̧ o'cato'inä ucuo ruhuotömä jinä yo̧mȩtȩ pä'iäjätö Siquem isode ju'ttoju iso̧ca̧ taboiyotörö tta̧huä̧rä̧huomettö̧. ⁴⁸ Abimelecmä Salmón möä'cara̧ 'ca'achinö, ja̧u̧'i̧nä̧ ja̧hua̧ta̧'a̧nö̧ o'catoinä umuhuäyotö chucutä ka̧cuȩyä̧tö̧cu̧. Abimelecmä na̧pä̧'quȩ 'chu'ätö öäre dau sä̧ya̧ cui'opinö. Ubi'canä huä̧nä̧hui̧'ö̧ chucutä ka̧cuä̧tö̧rö̧ huȩ'i̧nö̧: "Ttö jȩcha̧ tocuätöcu jö̧'ta̧nö̧ jȩpä̧tu̧cui̧ jurunänö". ⁴⁹ Ja̧'hua̧nö̧ ja̧'a̧ ya̧cu̧nä̧ dau sä̧ya̧ cui'opö Abimelecu 'chi̧nä̧tö̧. Jahuätömä utahuiyä toecuäpinä rötinätö̧, ja̧hua̧nö̧ jȩpu̧ ucurä köinätö̧, ja̧hua̧nö̧ jȩtto̧mȩnä̧ o'catoinä Siquem ttö̧ja̧ totteäcuanö, milnö jo̧mȩnä̧ u̧mä̧tö̧ttö̧'i̧nä̧ ja̧'hua̧ta̧nö̧ nä̧tö̧ttö̧'i̧nä̧. ⁵⁰ Ja̧u̧nö̧ o'ca'a Abimelecmä Tebes ötahuiyära̧'a̧ 'chi̧nö̧, 'chä̧ji̧'ca̧ Tebes ötahuiyä jäyä kä̧mä̧dö̧ tto'epö 'chu'ädinö. ⁵¹ Ja̧'hua̧nö̧ ja̧'a̧nä̧ ju̧huȩnȩ ötahuiyänämä ju'tonä to̧ä̧rä̧cuä̧huo̧mȩ 'kiyöjueittö adicuome ki̧na̧'a̧, ja̧'hua̧ta̧'a̧nö̧ u̧mä̧tö̧'i̧nä̧, nä̧tö̧'i̧nä̧, ötahuiyä ttö̧ja̧ tturuhuotö'inä o'catoi'önä ju'tojunä to̧ä̧rä̧cuä̧huo̧mȩra̧'a̧cu̧ dö'ecuächö, äpate mö̧'ȩcu̧ icuinätö̧. Ja̧u̧nö̧ o'ca'a jahuätömä ju'tojunä to̧ä̧rä̧cuä̧huo̧mȩ huä̧mȩ 'cha'chepächinätö̧. ⁵² Abimelec ichinö isode ju'toju jodera'acu örohuähua pä'ö juhuodecu apatecu to'cö pächi'inö juhuode ku icua pä'ö. ⁵³ Ja̧hua̧nö̧ ja̧'a̧nä̧ yajute isaju i̧sa̧ppȩ päi'önä curähuo'qui käjinäcu̧ usätta diunä. ⁵⁴ Ja̧u̧nu̧ o'ca'a ja̧u̧ jurunä huopönö umuhuäya̧ mu̧ä̧ya̧rö̧ öäre curä rohuäu u̧'ca̧tä̧huä̧ti̧yu̧ chu̧huä̧rä̧cuä̧'i̧sa̧rö̧ pä'inö: "cucurächu rä'opo'ö cuä'öhuitö, pätta'acu ttörö. Isaju cuä'ö kicuinäcu̧". Ja̧hua̧'a̧nö̧ ja̧'a̧ttö̧ ja̧u̧ mu̧ä̧ya̧ ucurächumä ppurahui'önä icuäcu 'corupä'inö. ⁵⁵ Israel ttö̧ja̧mä̧ Abimelec 'corujuoächaja'a topömä, toju odehuiyära̧'a̧cu̧ i̧hui̧nä̧tö̧. ⁵⁶ Ja̧'hua̧nö̧ ja̧'a̧ Abimelec jä'orö'inä, ö̧jä̧hua̧tö̧ setentanö̧ huotörö'i̧nä̧ cuä'ö icu suronä jȩi̧nö̧mä̧, ja̧'hua̧nö̧ micuähuächunä̧tä̧ jȩpi̧nö̧ TÖ̧Ä̧NÄ̧HUA̧MÄ̧. ⁵⁷ TÖ̧Ä̧NÄ̧HUA̧MÄ̧ Siquem ttö̧ja̧ o'cajuiyönä suronä jȩtti̧nö̧nä̧mä̧, jiturutä ppa̧huä̧chi̧'ö̧nä̧ jȩpi̧nö̧ ja̧'hua̧ta̧'a̧nö̧ Jerobaal i̧tti̧ Jotam suronä ja̧tö̧ja̧ päinömä jahuätörömä rȩbȩhui̧na̧'a̧.