Capítulo 8 22
1
David cöntämä yotonno töwootenetädö wetä yaadö acä yää Adulam je chäätö cönä´ja´dö yää eta´jäcä, yuichomo, tameedä yuumö wä´jimmä´tädö mmaja, yöiña cänä´döicho chääjadä töweichöcoomo wetä.
2
Tameedädä ñanno yäntunamjödööcomo, töwwäiñe täjemaamö ejeemajaichojöncomo mmaja ñanno ta´cwaiñeda cönä´ja´todö mmaja, Tameedädä tönwanno tujuuma chääjadä cönejunmaicho. Chäädhajäätoncomoje David cänä´döi yaawä, chäjaadä cönä´jato yaawä 400 dhanwaacoomo.
3
Yaawä David cöntämä Mizpa ña, yää Moab ñaano jata, töwö cönädöacä Moab ñaano cajichaana wwä: " Jaaja, maama mmaja jaadä naato. Ajaadäiñe nötä´ñato, Wanaadi wwä yäädötoojo yoowanääcä yä´dödö wa´cä.
4
Töwö cönnomoicho Moab ñano Cajichaana jadä yuumö, yeenö cönonomjoicho chäjadä, yaadö tawä David weichö wadaadädä.
5
Yääje mma yaawä ñäädä Wanaadi wa´deuwödö ecammajä´nei Gad, cönä´döacä David wwä: "Yaadö awä´daane eichä´de eduuwa adhejacacä, äjäne yaawä Judan ña. Yäätonno David cäntämä, Haret ñaano chuutaca tö´täädä wetä.
6
Saul cönetai David ecaadö eta´jäcä töwwä tösootoi jadäiñe, yaawä Saul shuucu cönä´ja´cä Guibea ña, natö tamarisco o´nä Ramá ña, tusuucujiiyö dha´me, jooje shootoi dhawoodhecääcä cönä´ja´to.
7
Saul cönä´döacä tösotoi wäiñe ñanno dhawodhecääcä cönäjatodö: "¡Etaatäcä eduuwa änwanno Benjamin atöödöcoomo!" ¿Isai ne´dö u´jai äwwäiñe nai onoonodööcomo anaatödööcomo mmaja?¿Töwö nödö´a´tode tameedädä änwanno töweewänä´taamo, miide (1.000) wa´cä´como edhaajätoncomooje jeiñe mma,
8
Änwanno tameedädä öwwä anecamma´da mato önnedö tadeddu utuudu näädä Isaí ne´dö wä. Cönontäda mato änwanno tameedädä. A
ne´que´nei änwanno anecammada maato önnedö ni´wa´tädööje yaanonö jääcä nöjoduta. Eduuwa töwö notoneta, womo´ca äwwadödö yojudutädö we´tä."
9
Yaawä Doeg, ñäädä Edom ñano, ñanno Saul sotoichomo jadänñe, cöneccujä´acä: "Isaí nnedö weneeaqueene Nob ña yä´döaajä, Ahimelec ñäädä Ahitob ne´dö.
10
Töwö cönecatäi Wanaadi wä tö´wa´tädö we´tä. Äwanshi cuntui cömö mmaja Goliat wä ñäädä Filisteo weichö."
11
Yaawä Cajiichana cönanontäi tösotoi adeja´jo Ahitob ne´dö Ahimelec, tameedä yuumö wä´jimmä´tädö mmaja, Nob ñancomo Wanaadi a´deddu ecammanamo mmaja. Cajiichana wadädä cöneejoto tameedäädä.
12
Saul cönä´dö´a´cä chäwwä: " Etacä eduuwa amäädä Ahitob nnedö." Töwö cönecwajätöi: "Eetäwa, yeedhajä.
13
Saúl cönä´dö´a´cä chäwwä: "¿Ane´cätoojoje jääcä aata´deucwe mädötääne Isaí nnedö acä? Uu mu´ne chäwwä, sauda mmaja, oodaje mä´döne Wanaadi öwatädä wetä jääcä yä´jödu´tädö wetä Jehova wwä chäwwonooje ecamajäancädä eduuwa naadöje tödöjoone?"
14
Yaawä Ahimelec Cajiichana cöneccujä´töi cönä´döacä: "¿Änäcä adhanonööcoomo antawaiñe David wa´cä ashichaato tönnöe weneene, änö´cöcä Cajiichana jonöje nai, äwoije chäänonge tödöönei adhe´saca chänönge tödöemö jaiñoone.
15
¿Awadenato odaje wädöanö Wanaadi äwatädöcoomo wetä? ¡Jääcä amöinche neiñojo määdäje weichojo!. Yää äjääcä töwojudu´tä mecammadö ñaa owanöcä´da cönä´jaacä jaaja wäjimmätädö wwäiñe tacaade´da cönäja´dea. medeeje osootoi dhowanöcänñeda na edä weja´tädö."
16
Cajiichana cöneccu´jätöi: "Äwä´ja´tocoomo määdä eduuwa, Ahimelec, tameedä oomo wäjimmä´tädö mmaja.
17
Töwö Cajiichana cönä´döacä töjadäncoomo suddau wwäiñe: "Ojoncoomo töja´tantäcä Wanaadi a´deddu ecammanamo, David jadäncomoone yeiya´coomo, töwö dhowanäcä yäneje´jädö, öwwä aneecama´da cöneiya´to." Yääje yeichame Cajiichana sootoi ämjajoda cöneiyato ñanno Wanaadi a´deddu ecammanamo.
18
Yaawä Cajiichana cönä´döacä Doeg wä: " Yääje yeiya´jäcä amädääne töja´coto Wanaadi wä töwa´dewamo." Yää anoto awä sauda quee Doeg cömjajoicho (85) to´cwa´cä Wanaadi a´deddu ecammanamo ñanno tajeede´dato yoom´coomo.
19
Nob ña Doeg cöntämä yaawä yää Sacerdoote jataadöcoomo. Iiña mmaja sauda quee dhanwacomo, wodiiñamo cömjajoicho, mudeshi´chä mmaja, shushu jäcuncha´como jadäiñe´jödöödä oveja, jaaca, cawayu mmaja cönamöiñä´caichodea.
20
Tooni mma Ahimelec needö, ñäädä Ahitob needö, Abiatar täätö, cönänejei David öncäcä.
21
Abiatar cönecammai David wwä Wanaadi a´deddu ecammanamo töjaajo´jocoomo Saúl wwä.
22
David cönä´döacä Abiatar wwä: " Yäätä Doeg Edom ñaano eneea´jäcä yoowanöcä cönä´jacä Saúl wwä ecammatojo chäwwä. ¡Woijatooje cönä´jajoicho tameedä oomo wäjimmätädö!
23
Tösade´daane eichä jaadä´nooje eichä´de mäwanacaiye. Ñäädä yema´senaadö adhe´mase mmaja nadea."