¹ Jliaji Iminalriti lrideji nakjoete njaji idejicape matsi nokjoete; lrinoacawa nakjoete njaji inoacacaéwa nokjoete. ² Pjipa pidanaita tsoite njite jliaji macaite; pjinicoena njite pikitsindata njoa. ³ Pidee Pimolrocon njite piyocan pinoacácarro nakjoete njaji ipinetacape njoa; Picaite nocafica irso cayoji: ''Icatsa njoa iyomjetacaita pjia.'' ⁴ Picadaa capaimanca naicao njaji yajicape ipineta njoa njite picadaa nanaitjaca narso maatsi. Picadaa nadiaca njapodamwa njaji iwaopiacape inaitjaca norso matsi njite pimanalrieta nawaopiakje. ⁵ Picadaa napocotacawa cayoyoji caolri ipjia capisho panapje metapemi, lripeco cádanacoatsana jliaji wa-Minalri i-angeleni. ⁶ Picadaa cadaocaca nawaopiakje aima cawa narsoca matsiarri, wa-Mialri i-angeleni ipineta cádanacoenaotsana. ⁷ Naoma njepaca njoa mikjapantsa cayoji pjepa capisho copje tooda sho; njeca nopia irrirri njowa carro lri-ricoda mikjapantsa. ⁸ Picadaa matsicana kjeyanadatsa. Picadaa njewacawa lriricodatsa jliaji tooda nacadanda nopia. Picada njewacawa lri-ricoda, nácarroa matsirri ikjaolre nanaitjandatsa narsowao. ⁹ Mitsa nocatimatacawa wa-Minalri naco njite nojoitacawatsa Lrimanacota capoa njoa. ¹⁰ Nacaiteotsa njaji noapi cayoji: ''Iminalriti, corrin pacapa apada caidalriji Picayosho, jliaji itaitacada iyomjeteca jliaji njerrapitanda naoya njaji kjaidaperri jirrapitetalrini, iyomjetacada njaji kjenaperri, canacaiperri irso pjiomi naoya njaji iomacape iñaitoca nanaani.'' ¹¹ Aima njaji icaitecape ishatitsa jinicoa nokjoete; niini nacaiteca noacona ishati nacotsa. ¹² Nonaitja narso matsia, mitsa nja nanaitja norso matsi. Niini coyolreca njoa panaya. ¹³ Nayami cojli pia, njoeta nonacoa notsayapalre; noitawa naikjaote njite noyamjeta njowida notatja cádanaco nanaco. ¹⁴ Noiya nanaco paiya capisho pakitsinda naco catsa; noiya kjaida mayami capishotja njodoa. ¹⁵ Mitsa njowa caojli pia, icamitsa catimacana lrikjaote njite nawacacawa, icamitsa nawacacawa nokjoete njite njota nocaolre nocapa cádanaco cayocana. Neema nokjoete njite corrin yamicana. ¹⁶ Corrin coadaca njoa narso kerroa cádanacona nokjoete; namjoa netsa nokjoete kerroa capoana. ¹⁷ No-Minalri, ¿Coancaojli pjenaotsa poicapa minicatsa jliaji nanaitjalri? Pyomjeta njoa naoya ima caidalricatsa nanaitjaca norso matsi, piyomjeta njoa naoya njajiyawi kerroaperri. ¹⁸ Nocaite carroatsa matsiadalrica Pjia njemiwerrico njaji iwacaacacapewa aimadan; noa watsa matsiadalri Pirso njemiwerrico njaji inaiki aimadan. ¹⁹ Macadatsa catimaca nonaco njaji nocoema cashaperri; macadatsa lromotoca narso cayoji nawaopiakje matsidalri ioma capisho. ²⁰ Corrin cacocana imaodacakjeti naco, icamitsa caacocana ishati nacotsa nakjoete njaji iofacape imaodacatsa jalredaoca lrico. ²¹ Kjaida cacocana nacaitécarro matsi nonaco; nacaite: ''Ajádalrica wacapaca watsi sho jliaji wacaiterri.'' ²² Picapjentsa no-Minalri jliaji nocaiterri, Picaite nacona naikjaote jliaji nanaitjalri; maatsa teco nooya, no-Minalri. ²³ Picafiawa njite pjinicoa pidanatácarro njoa naoya njaji nocoema, Pjia noDiote, Pjia no-Minalri, piwapaca njoa pinaiwa. ²⁴ Pidanata njoa, matsiadalri capoa Pjia, no-Minalri; macadatsa catimacana noikjaote. ²⁵ Mcadatsa nacaiteca nacaolre rico cayoji: ''Matsiatsa, opina warso jliaji waomalri. Opina wawayaketani.'' ²⁶ Pipaimanietana njite Pimanalrieta nawaopiakje njaji iomacape inaitjaca norso matsi. Picada capaimanica naicao matsícarrona pjiomi njaji icacaperri noicao. ²⁷ Njite picadaa catima njemataca pjiomi njaji iomacape matsiaca tsenakja njoa; nacaité-carro caidalritsa cayoji: ''Ajádalri waca matsiadalri wa-Minalri irso, jliaji icatimatacadawa matsia capoa jliaji lrirsodalri.'' ²⁸ Niniotsa cacoca njoa pimatsiaca naco njite noaca matsiadalri pirso jalredaoca icoam.