¹ Noaca matsiadalri Dio irso jecoapi icoa, caidalritsa cacoca njoa matsia Lrinaco. ² Noaca matsiadalri Dio irso. Njemícarro njaji njerrapitetaji njite catimá carrona. ³ Ia matsiadalri Dio irso noinao, warsa wacaite pacoaca coandalrica Jliaji Iminalriti. ⁴ Notatja Dio iinai njite Jlimi norso, njite Lricadaa njoametácarro pjiomi njaji icadalri nofiocawa. ⁵ Catimaca njaji iomacapeni, njite corriotsa capaimanperica nacapácana. ⁶ Jliajiatsia njerrapitetaji lritatja Dio iinai njite Jlimi lrirso niini Lriyomjetani naoya pjiomi njaji jlirrapitalri. ⁷ Jliaji waMinalri i-angeleni iwapa pjiomi njaji ifiocape Dio iwana njite lriyomjetana. ⁸ Iwi icapao jliaji Iminalriti, icapácarro matsiadalricani. Catimadalrica jliaji atsia icadacada icaolre Dio naco Lriwapácarrona. ⁹ Ifio Iminalriti iwana sha Jlienitaji Lrirsowawa. Corriotsa coca canacai watsa narso njaji ifiocaperri Lriwana. ¹⁰ Canacai mana naijao njaji yaawi kjaidaperri toa niini njerrpita mana mawitacai, mitsa njaji itatjacaperri Dio iinai corriotsa pacapá carroca pada matsiadalri canacaidalri narso. ¹¹ Inoena noenipenai jimícarro norso. Nocanantácarro sha coajica pafiocawa Wa-Minalri iwana. ¹² Pjiomi njaji inaiki jalredaoca lricoperri napeyo naofacawa jalredaoca lrico njite naoma naofacawa aima jecoapi jalredaoca lrico njite naoma naofacawa matsia. ¹³ Niini piwapa pienene matsidalri ioya njite piwapa pinoma ishati ipyua. ¹⁴ Pjienawa matsidalri ioya njite pioma pinaitjaca matsia. Pioma jliaji imaodacakjeti njite mamacatsani. ¹⁵ Wa-Minalri icapa caidalritsa njaji inaitjacapé matsia njite caidalritsa Lriwapa jlimi coajica naiyaca. ¹⁶ Jliaji wa-Minalri corrin lrioma lricapaca narso njaji inaitjacape matsi, niini Lriwayaketaotsana wade naofacawa jalredaoca lrico toa. ¹⁷ Jliaji Iminalriti jimi narso njaji matsiaperri nawana cádanaco Lrikjaolre njite lriyomjetana lrioya jliaji njerrapitalri. ¹⁸ Tsomitsa jliaji Iminalriti naoya njaji inonaperri icaolre pekirritsa, njite lriyomjeta njaji mjaidaperrimi. ¹⁹ Aiuma jliaji njerrapitalri njaji inaitjacape matsia, mitsa jliaji Iminalriti lriyomjetana naoya pjiomi. ²⁰ Lriwapa matsiana padenirri, njite corrin coca itaita imatsiketacana. ²¹ Njatsa ino njaji inaiki matsiperri njatsa njaji nanaitjaji maatsi. Njite Lricadaotsa njerrapita njaji icapacape matsi narso njaji inaitjacape matsia. ²² Jliaji iminalriti Lriyomjeta njaji Lrirsoperri. Corriotsa lricadaa carrioca njerrapita njaji icadacape icaolre Lrinaco.