¹ Icatimatacawa Dio naco, sha matsiaperritsa; Njaji matsiaperri icatsa njaji ialrica matsiuadalri Dio irso. ² Ia Lrirso matsiadalri arpa sho; icanta matsiadalri naco Lrirso arpa sho irsocada die neñada. ³ Icanta Lrirso walriperri canción; ikjemata matsia njaji ikjemataji njite icanta itimati lrico. ⁴ Jlaji Iminalriti Corrin lricashataca nanaco njaji Lricaiterri; njite matsiaperri catsa pjiomi njaji Lrinaitjalri. ⁵ lripeyo njaji inaitjacape coajica nacaiteca njite njaji inaitjacape matsia. Njite jliaji Dio icaitenda inaco Lrinaitjaca pacapaca pjiomi jalredaoca. ⁶ Dio iaco sho Lrinaitja pjiomi njaji eenocoma, pjiomi njaji jiwirsida eeno lricojleperri lrinaitjana Lriaco sho Lrimjeco cádanco lrinoma caco cádanaco. ⁷ Lriwaketa njaji ooni imaimaca pawaketa capisho lriarrona lrico; Lriwaketa njaji Manoa ionitena pafetsa. ⁸ Narsotsa nafiocawa Dio iwana pjiomi njaji jalredaoca lricoperri; narsotsa njetaca nacaolre Lripeyajle pjiomi njaji jalredaoca lricoperri. ⁹ Ima caco cádanaconi icamitsa nanaitjacacawa njaji Lricaiterri inaco; Lrimenacana, njite icamitsa naofacawa nacoanamitsa naofacawa lrico padenirri. ¹⁰ Wa-Minalri imatsiketa njepaaca cádanaco papocotsawa njaji inaiki jalredaoca lricoperri; Lrimatsiketa nawaopiakje njaji inaiki aimadan. ¹¹ Corripetsa iwayacawa njaji Dio iwaopiakje, njaji Lriwaopialre lricaolre lricope narsowalrepe pjiomi njaji walricomanai. ¹² Matsiadalrica njaji inaiki iofacape njepaite ricó icadacape na-Dioteca Jliaji IMINALRITI, njaji inaiki aimadan Lriniwananda Lriyarrope carrona. ¹³ Jliaji Iminalriti Lricapa enolrikjoite, Lricapa pjiomi njaji inaiki. ¹⁴ Lriofalri njite, Lricapa yenonjite pjiomi njaji iofacape jalredaoca lrico. ¹⁵ Lrikitsindata matsiacarro nawaopiakje njaji inaki cayoji lricayosho jliaji idejicada caalri sho lrimatsieta njaji lridejicalre, Lricapa pjiomi njaji nadejicalre. ¹⁶ Jliaji talricanati corrin yomjeni aima capoa lrirso tsolrodaonai; corrin tsakja yomjé carroca apada oowi kjaida capoani. ¹⁷ Corrin nataita nawadaca naofacawa namaodacatsa nayacalre rico narso capoa aima caballo nainoaca shopa; kjaidaperritjana, mitsa corrin nataita nayomjetacana. ¹⁸ Dio icapa cadana nanacojle njaji ifiocaperri lriwana, njaji icaitecape corrica Lrimacana ¹⁹ lriyomjetá carrona mayamicalri ioya njite lricada cafitsana mawitacai ino cádanacoatsa njaji jalredaoca lricoperri. ²⁰ Wacadaa wacaolre Dio naco; Icatsa Jliaji ikitsindatacadaca fa njite wadanaitacani. ²¹ Catima wacaolre Lrinaco; ima wacadaca wacaolre lripitana matsiadalri naco. ²² Pinaitja cayoji Picaite capisho warso, Pjia Dio matsiadalri, Pjia tsaotsa wainai wacada cádanaco wacaolre Pinaco.