1 Jliaji Iminalriti, icatsa nocamarranaca njite icatsa jliaji imanacota cadaca njoa; ¿niini coca ikjoete nofiowa? Jliaji Iminalriti icatsa jliaji idanatacadaca nocafica; ¿Coca ikjoetentja nofiowa? 2 Natsomita cádanaco njoa njaji inaitjacape matsi nainócarro njoa, oopi natoda njaipa pjiomi njaji nocoema niini njewacawa. 3 Niini nawacaaca cadantja aima tsolrodaonai nowaida naco inocape nokjoete, corrin nocaolre ifio carroca; njenico cada oowi ricó nokjoete, nocada catsa nocaolre matsia Dio nacó. 4 Notatja pada Dio iinai, njite noomaca lrioya njaji: noomaca nofacawa lriipana lrico jliaji Iminalriti caidalritsa jalredaoca icoam caafi cádanaco toa njoa, notaitácarro nocapaca lri-matsiaca jliaji no Minalri njite nowaopiácarro Lrinaco lriipana lrico. 5 Coacaojli cadaotsa jirrapitinaperri iocawa noikjaolre Jlietaotsa njoa Lriofacawa lrico taimí-dalri; Lridawaotsa njoa Lripana yapjite. Jiipada yenondalri naco watsa Jlirreta njoa. 6 Niininaotsa yenonca njoa naoya njaji nocoema yemalriwa nowaida naco, njite noino watsa maficalri Lriipana lrico catimacalri ikjaote. Nocanta watsa Lriso njite nodana watsa canción tsakja Dio irso. 7 Pjia no-Diote matsiadalri, Pjimiotsa norso nowana cádanacoatsa pikjaolre. Kjena Picapaca norso njite pjiepaotsa njoa. 8 Nocaolre icaite njoa cayoji: ''Pia pitatja Lriinai. Noá Piipana lricojle notatjácarro Piinai, Pjia no-Diote matsiadalri. 9 Madawatsa Piecoa noya, mjenetatsa pioyao jliaji Pirsodalri irroati lrico. Icatsa Pjia ikitsindatacadaca njoa, mamacatsa njoa, Pjia Dio imanacotacaita njoa. 10 Njonirri, njodoa imaca cadaa njoa, Jliaji Iminalriti icoadataotsa njoa. 11 Picananta njoa nofácarro cayoji pioma capisho. No Diote matsiadalri, Pimanacota njoa naoya njaji nocoema. 12 Macadatsa nanaitjaca norso cayoji naoma capisho njaji nocoema, ima aima jinicowa njaji icaitecape ishati nonaco, njite naoma nainoca njoa. 13 ¿Coajintja njoa corri pia cada njoepa nocapacaotsa Dio imatsiaca naofacawa lrico njaji inaiki caafiperri? 14 Piwapa Jliaji Iminalriti; kjaida pjia, njite pikjaidata picaolre. Piwapa Jliaji Iminalriti.