¹ Matsiapatoa lriaji kjenadalri lricadacaca ajadalri lrioya lriaji matsidalrin cacoca icatsa lriaji majicadalrin. ² Corritsaca matsia,pawaopiaca parroca lriaji corridalri paji coamishopaca lriaji yecocada keya manalrecaotsani lriapowa yoya ³ Lrimajican ima jliaji apada inaiki lrinaitja maatsi lrirsotsa njite ikena kerroacani lricaolre ricó Dio ikjoete. ⁴ Jliaji irsocada aima lrinaani aima tsakja lrikitsiñapenji, mitsa jliaji kjenadalritsa corrin naomani njaji lrikitsiñapenji. ⁵ Corriotsa yomjé carroca jliaji icaitecada ishatitsa apada naco njite jliaji cashadalrim cayo tsakjaotsa lricayosho. ⁶ Aimaotsa njaji itatjacape matsiacalri lrinai jliaji capondalri njite aima lrikitsiñapenji jliaji iacada macoadatsa inaiki irso njaji lriyarro. ⁷ Pjiomi njaji lrikitsin jliaji apada kjenaite maatsi nacapaca lrirso; ¡Omamikena naaka lrioya teeco njaji lrikitsiñapenji! Lriwana tjana, mitsa corrinatsa njemi lrirso. ⁸ Jliaji irsocada yanjikjeti lripeyoaca jliwacatsa; jliaji irsocada aima iwaopiakje lrioketaotsa aima matsiaperri. ⁹ Jliaji icashatacada apjetsida naco lrirsotsa jlirrapitaca lrikjaote, mitsa jliaji cashadalri icamitsaotsa lriwayacaaca caotsawa. ¹⁰ Corrin matsia apada mawaopiakjedalri iofacawa panti matsiade lrico, corrin tsakja matsia apaa narsodalri italricanataca nanaco njaji talricanatinai yenipe. ¹¹ Jliaji inaiki yanjicada cocaca lrinaitja corrin kerroacani kjeya njite matsiaca lriacona corri cada coadaca lrirso jliaji nanaitjanda lrirso maatsi. ¹² Yawi írroa shoca lrírroa jlaiji talricanati, mitsa lrimatsiaca cayocani tiñajli sho jiwacadawa malritsi naco. ¹³ Ikjenatacadaca jlinirri jliaji lrirri mawaopiakjedalri, njite lriino cainoacakjedarro cayocano iyao jiwacada panti rico jalramidalri ricó. ¹⁴ Njaji njanirri namaca neenipe irso napana njite nayarroaji tsakja, mitsa rsoaji inarro canjikjedarro Dio iyadacano. ¹⁵ Jliaji inocalri lricadaa talricai rico jliaji inodalrim, mitsa jliaji corridalritsa pomena idenjica, jlirrapitacaotsa mawitacai. ¹⁶ Jliaji shepacada jliaji Dio yaco nacananta shopani lriwapaca lricafica matsia, mitsa jliaji corridalri iwaopia coajica lriofacawa mayamicaotsani. ¹⁷ Jliaji ikitsindatacada apada kjenadalri Dio irso lricadatoa njaji lriyarro, njite Dio watsa idieta lricoadao lrirso lrikitsindata capoani. ¹⁸ Pjirrapiteta pienipe tso- cádanacotoani, mitsa manaitjatsa lrirso maatsi pjirrapiteta cádanacon. ¹⁹ Jliaji inaiki kjeyadalritsa kerroacani lrirsotsa lricaoñaca jliaji matsirri lrinaitjalri. Njite lrinaitja cadaa maatsi apada irso, aima pjaotsa lrimatsicana lrirso. ²⁰ Pjimi jliaji nacaiterri pirso njite pinaitja cayoji nacananta capisho pjia niniwatsa canjikje caafi cádanaco toa pjia. ²¹ Ima iwaopiakjeti lricaolre ricó jliaji apada inaiki, mitsa jlia watsa jliaji Dio iomalri lrinaitjaca icatsaotsa jliaji lrinaitjalri. ²² Njaji inaiki corrin naoma apada imatadaca narso njite matsia pjatoa apada inaiki kjenadalritsa lrioya jliaji cashadalrim. ²³ Jliaji inaitjacada matsia Dio irso naofa caotsa wia jalredaoca lrico; njite jliaji inaiki cayodalri matsia watsa lrianjiacacawa njite corriotsa jlirrapitacarroca matsidalri sho. ²⁴ Jliaji inodalrim jlieta lricaapi lri-parraton lrico; mitsa corrin lritaita jlietaca lriñjaoda lrinoma lrico iino capoa calretsan. ²⁵ Piñáa cada jliaji icacadalri apjetsida icao, njite jliaji manjicadalrim lrianji watsa coajica; pjirrapiteta jliaji iomacada yanjikjewa, njite lrirso pjaotsa aima yanjikjeti. ²⁶ Jliaji iñaitocada jlinirri iyarro njite lripineta rsoaji jlidoa icatsa jliaji neenipe icadacada capaimanicana njite corrin naomacana lrikjaote. ²⁷ Pjia nirri, yami cada pjimica coajica nacanantaca pjia, icamitsaotsa pjienacawa naoya njaji yacoti yaacada yanjikjeti ²⁸ Jliaji icaitecada apada yacona naco ishatitsa icamitsa lricaaca matsiadalri iicao, njite jliaji matsidalritsa iwaopiakje icamitsa lricatimatacawa lrimatsicana ikjaote. ²⁹ Jirrapitakjeti iwapaketsa njaji icacaperri apjetsida naco njite nawapaketsa nañácarro jaico sho lridanjite jliaji mawaopiakjedalrim.