¹ Icatsa jiipai Canaán ricoda lricadaalri iraelitanai isho jliaji sacerdote Eleazar, Josué Non irrí njite njaji iraelitanai iapiyawanai njanirrinai inaikica nacó nacoanaa. ² Napeeco paperrapjaipe nanaco njaji noeve poco iraelitanai njite njaji pamoyoa toa manasenai nanjíi carró cjerre dalrica jiipai nacadaa nasho, cayotsa Diu inaa capisho pia Moisé inaitjaca. ³ Moisé icada piena njepaitewa nasho njaji manasenai Jordán peemajle, mitsa pamoyoa ishotoa nanacjoite njaji manasenai. Corrím naa njepaitewa nasho njaji Leví poco. ⁴ Yamapoco pienacja njaji José inacjoiteperrí, Manasés njite Efarín. Mitsa nasho njaji Levínai corrí naa nayaadao jiipai, icaamitsa nacadaaca nasho apacoape yacaalre matsia cawa paofaacawa, matsiacawa paapanaca njite matsiacawa patawiñaca vaaca. ⁵ Nanaitja njaji iraelitanai cayoji Diu inaacapisho pia Moisé inaitjaca, icamiina lricadaa nasho nasho njepaitewa. ⁶ Njite njaji Jodá poco naawa Josué iderse Gilgal ricó, niini Caleb, Jefone irrí, cenezeo dalri, iaco Josué isho: Pianjíntsa coanca wa Minalri icaite pía lrishodalri Moisé isho pinaco njite nonaco tsacja Cades Barnea rico. ⁷ Noshopiaca coarenta jámolri jiicocami njoa, Diu ishodalri Moisé imeenaca caojli njoa Cades Barnea ricojle noa carró nocapa dawacalri ricotsa jliaji jiipai. Nodee iacoti njite nocaolre ajádalri iapiya. ⁸ Mitsa njaji nokitsiñape iacapem noinai nameenacja nacaolre ifiocawa pekirritsa njaji inaiki. Mitsa njoa nonaitja cayoji no Minalri Diu inaacapisho njoa. ⁹ Moisé icaite iacoti ajádalri sho jliadáa pia jeecoapica, lriaco: ''jliaji jiipai pipjoalri piemaje carrom picapa, piyadacani naapiya njaji pienipe pikeetem, pinaitja capoa cayoji wa Minalri Diu inaa capisho.'' ¹⁰ ¡Picapa, paanaya! Coarenta cinco jamolri jiyapeenawa lricadaatoa caafica njoa jliaji no Minalri, cayotsa lricaite capisho, caacocayami wa Minalri Moisé isho, naajecawiaca jalrapocolri rico njaji iraelitanai. Panaya noshoena ochenta cinco jamolri nopekirrica nacó. ¹¹ Caicarromtsa cjaidaca njoa cayo caojli shotsa Moisé imeenaca caojli pia waa wacapa jliaji jiipai. Pacoacatsa njoida jliawalri shotsa, notaita toa noaca oowi rico, njite nodía carró njite tjacja. ¹² Niini panaya, picadaa nosho jliaji jiipai awacadacaawa, on Minalri icaitenda nosho jliawajli pia. Ima pjiatsa jími tsacja jliadáa pia, níinica naofáawa njaji anaceonai (inaiki macanepe) inaitjacape taimi nayaclre idaanao. Wadetsantja noinai catoa wa Minalri, njotaotsa njitena cayotsa Lricaite capisho''. ¹³ Icamina Josué icadaa iacoti matsiadalri lrisho jliaji Jefone irrí Caleb, lricadaa carroena lrisho lrienipenaipe iapiya jliaji Hebrón. ¹⁴ Niini Caleb, Jefone irrí enezeo dalri, iyaadenacja jliaji Hebrón, atée panajiete. Ima Caleb jiepa ajádalri lriaco jliaji Diu, Iraelitanai Italricanaa. ¹⁵ Quiriat Arbá pia lripitana jliaji Hebrón oopi. Ima, Quiriat Arbá piaca lriipitana jliaji ape atsia caanadalri nanacjoite njaji Anácnai, inaiki macadalripe piacana. Jliapodamjite corrí pienatsa nanaitja oowi Hebrón ricó.