¹ Naaco njaji Efraín poco Gedeón irso: ''Coadao pinaitja warso cayoji? Ima corrica piwana faa pinoaca cádanaco Madianitanai ikjoete. Nacoita maatsí Gedeón lrikjaote. ² Njite Gedeón jiepana: ''¿Capja corrica aima pjaaca njaji inaitjalri naoya njaji nonaitjalri? ¿Capja corrica matsiaperri pjaaca njaji jaicotjedaa iniwalri shaa Efraín poco naoya njaji naniwalri njaji Abiazer iipaneta inakjoitéperri? ³ ¡Dio icadaa jiameetá-carro njaji caconaaperri Madian lricope Oreb, njite Zeeb! Ikena nadiaca merroana njemi cádanaco njaji lricaiterri narso. ⁴ Gedeón iaketsawa Jordán nacojle lriyoetá-carro, jlia njite njaji treciento atsianai lriinaiperri. Maapji kenana mitsa napineeta catsa njaji nacoema. ⁵ Lriaco narso njaji atsianai Shaa perri: ''Inaitja matsiacalri iáa naijao injaodati njaji inocape noinai, ima maapjicana njite njoa nopineetaca Zeba njite Zalmuna, njaji talricanaatinai Madian lricoperri.'' ⁶ Njite naaco njaji caconaaperri Gedeón irso: ''Corritoa jipjencatoa Zeba njite Zalmuna, niini ¿coajintja waaca naijawa njaji pinaikite? ⁷ Niini jliepacana, lriaco: ''Wa-Minalri icadaa cádanaco faamá-carro Zeba, njite Zalmuna, noñaa caotsa shaa nasho njaji jaicoapokjape catsotaperri jalrapocolri ricope notsafaa carroatsa íya nasho.'' ⁸ Lria njitewa Peniel-rse njite lriaco narso njaji Peniel perri cayotsa lricaite capisho narso njaji Sucot perri, mitsa njaji Peniel perri cayo tsenakja njeepacani nacayoshotsa njaji Sucot perri. ⁹ Niini lriaco narso njaji atsianai Peniel perri: Nopietaotsa nonoca corriotsa oowi ricoca, niniotsa nopeeco caotsa jliwao jliaji yemetanda torre.'' ¹⁰ A cadana Zeba njite Zalmuna Karkor lrico naapiya njaji natsolrodaope, quince-detsa atsianai njaji nainaiperri nanakjoite njaji aimadan pia tsolrodaonai inocapem jeerri imoto kemjeteo. Mayami ciento vente mil tsolrodaonai nacanantaji matsia nainoacá-carro matseeta-sho. ¹¹ Gedeón iawa lri-ricoda jliaji inipo naacarroji njaji iajicape manawa yofajiwa, jliyapa Noba njite Jogbeha. Icaamitsa lriinoca njaji tsolrodaonai lricoema ima corrica nawapana nainoacá-carro. ¹² Zeba njite Zamuna oopitoa napitoa, mitsa Gedeón ipinetana atee lriá jlipa njaji talricanaatinai Madian lricope Zeba njite Zamuna, njite nafiocawa pekirritsa njaji tsolrodaonai narsoperri. ¹³ Gedeón, Joás irri, lridiawa oowi rikjoite lri-ricoda jliaji inipo yaacadawa Heres ricojle. ¹⁴ Nirse lricapa pada pada yempetitoa Sucot njité-dalri, nini Gedeón itatjaca jlimio lriinai nanaco njaji Sucot-perri. Jliaji yempetitoa icaite lrirso nanaco njaji caconaaperri Sucot lricoperri, nanaco njaji pekipenai, setenta siete atsianai. ¹⁵ Gedeón iawa naikjaolre njaji inaiki Sucot-perri, njite lriaco narso: '' Icapa narso njaji Zeba njite Zalmuna, icaalri ikjaote nonaco icaite cádanaco, '¿Capja opikena pjipa Zeba njite Zalmuna? Corrin waji waacada naijao njaji pinaikite.''' ¹⁶ Niini Gedeón jipa njaji pekipenai yacaalre ricope njite jlirrapiteetaca njaji atsianai jaicoapokjape-sho jalrapocolri ricope catsotaperri. ¹⁷ Lripeeco jliwao jliaji torrena Peniel-dalri njite lriino njaji atsianai ninperri. ¹⁸ Njite Gedeón iaco Zeba njite Zalmuna irso: ''¿Coan-perri pia njaji atsianai iinolri pia Tabor lrico?'' njite naaco lrirso, njeepacani: ''Caiperri piacana picayosho. nacoamitsa pacapa piacana talricanaatinai yenipe-sho.'' ¹⁹ Njite Gedeón iaco narso: ''Noweenaipe piacana, njodoa yeenipe, Caafidalrica Pjia no-MInalri, corricada piantja iinona, corri tsakjantja noinoca shaa.'' ²⁰ Gedeón iaco Jeter irso, lrirri pjerriti: ''¡Pjinico piinona!'' Mitsa corrin lritaita lriinocana lri-matsetan-sho ima yempeti catoan. ²¹ Njite Zeba, Zalmuna tsakja naaco lrirso: ''¡Pino piino fa pjiwacatsa!'' ima atsia idejicalreca jliaji.'' Gedeón jinico iino Zeba njite Zalmuna. Njite jlipa njaji patjepi walripi keerri jinapjiami irrocape naweda naco njaji na-camellonim.'' ²² Njite njaji Iraelnai, naaco Gedeón irso: ''Pitalricanata wanaco, pjia njite njaji pidakenai, ima pimanacotaca faa naoya njaji Madian lricope. ²³ Mitsa Gedeón iaco narso: ''Corriotsa njoa carroca italricanaataca inaco, corrin tsakja noenipe cantja italricanataca caotsa inaco. Dio watsa jliaji italricanaatalriotsa inaco. ²⁴ Gedeón iaco pja narso: ''Icada notatja iinai pada: icoana watsa nooma iaca norso njaji shentadati jitaji naoya njaji madianitanai ioya.'' Njaji madianitanai narso piaca shentadati owirrodape minitsa ima ismaelitanaicana. ²⁵ Njite naaco lrirso: ''Catiimaca faa-carro pirsona.'' Naorsoeta pamaca tsayana natsayan nacoda jiipai naco, njite nacoamitsa napeeco lrinaco pjiomi njaji shentadati njetaji madianitanai ioya. ²⁶ Icapiatsa njamiñaca njaji shentadati owirrodape lriniwalri naoya, dieciocho kilo njite seteciento gramo pjaa lrinacojle. Teecojle tsakja naoya njaji keerri walripi jinaana njetaji naoya, njaji shentadati, na-tsayanimi irraiperri njetaaca carrodao njaji talricanaatinai Madian lricope, teecojle tsakja naoya njaji cadena kjaape napapiji nawedalrico njaji camello. ²⁷ Gedeón inaitja pamaca tsaaya nasho njaji shentadati owirrodape njite lricadaani yacaalre Ofra lrico, niini pjiomi njaji Iraelnai nanaitja maatsi Dio irso naacapoa matsiadalri lrirso jliaji tsaaya. Maatsitsa lrimotoca Gedeón irso jliaji lrinaitjalri njite narso njaji lriipaneta. ²⁸ Cayotsa Iraelitanaca yaaji nanaco njaji Madian lricope njite corrinatsa napieta neemaca nakjoete tsenakja. Njite coarenta walria icoa corrica nanaitja oowi, caafi cádancotoa Gedeón. ²⁹ Jerobaal (Gedeón), Joás irri, lriawa lriofáa-carro lriipana lricocatsa. ³⁰ Gedeón irso piaca setenta lrienipe, icatsa njaji lrienipe lrinakjoité perri, ima aima piaca njaji lrininai. ³¹ Rsoaji lrinaidarro, Siquem-darro, kenipe Gedeón irso, njite lricadaa lriipitanao Abimelec. ³² Njite Gedeón, Joás irri, mayamini lripekirrica naco njite nadawani Ofra lrico, Jlinirri Joás icodapitsa, nanakjoite njaji Abiezernai iipaneta. ³³ Niini mayamica ikjoetetsa Gedeón, napieta tsenakja nanaitjaca maatsi Dio irso njaji Iraelnai ima naaca matsiadalri baalnai irso tsenalja. Nacadaaca nadiotewa jliaji Baal Berit. ³⁴ Njaji iraelitanai corrin nawaada naaca matsiadalri na-Minalri Dio irso, jliaji imanacotalri-piana naoya njaji nacoema nacodapi-perritsa. ³⁵ Corrin nanaitja cayoji nacaite capisho pia Jerobaal irso (Gedeón), naikjaote njaji matsiaperri lrinaitjalri Iraelnai irso.