¹ Njite Jerobaa, jliaminitsa Gedeón icafiawa deepitoa, nacafia tsakjawa njaji inaiki lriinaiperri, njite naatoa naofawa onipaokja jiwidapa icodapi Harod-dalri. Njite cadana njaji madianitanai, naofatoawa napanaitape rico atsiajliemajle lrirso jliaji jiipai yoyawaca rico tsoomi awacada More ioya. ² Njite Dio iaco Gedeón irso: ''Aimacalretsa njaji piinaiperri nocadaa-carro Iraelnai jiameta njaji madianitanai, ima nawaadadaotsa corrica njoaca jliaji iyomjetalrina, nacaitenamtja ayoji: 'Faamana kjaidaperri capoa faa.' ³ Niini panaya picadaa najii-carro cayoji: 'Cocacadaa itetjewa lrifió capoa, itaita idiacawa atsa jaiteji Awacada Galaad lrikjoitetsa. Niini venti do mil atsianai idiawa njitetsa, yofawa die mil natsa. ⁴ Njite Dio iaco Gedeón irso tsenakja: ''Aimatoana. panaya pidee nairra-carro ooni, nocadaotsa pirso tsoenatsa inaiki. Niini nocaite cadaa pjia, jliawatsa yaa piinai, jliacaotsa iawa piinai, mitsa nocaitecadaa, jliaji corriotsa lriácarroca piinai, corriotsa lriacarroca.'' ⁵ 5Njite Gedeón ideena ooni ikjaolre, niini Dio icaiteca Gedeón irso: ''Pjienitaotsa teecojle njaji iperro-capetsa ooni, tsiino iperro capisho; naoya njaji jiwacape naorsipada sho nairrá-carro.'' ⁶ Niini treciento-tsa njaji atsianai iperro capemi ooni. Njite nja paana njewa natoda naorsipada nairra carro. ⁷ Dio iaco Gedeón irso: ''Nashotsa njaji treciento atsianai iperrocapetsa ooni, No-manacotaotsa shaa madianitanai ioya njite shama caotsana. Niini picadaa nadiawa naapana lricojle njaa paana.'' ⁸ Niini njaji naniwananipe, njepa naijaope njite natrompetan. Njite nja apjetsida, Gedeón imeenaca nadiawa napaita lricojle naofacawa lricotoa, icaamitsa iofanica lriinai njaji treciento atsianai. Tjewacajlre cadanatsa naoya naofacawa lricotoa njaji madianitanai, jiipai ioyawaca lrico. ⁹ Njite jliadaatsa deepi wa-Minalri iaco Gedeón irso: ''Warsena pjinico piawa piino-carro njaji madianitanai naofacawatoa lrico, ima Njoa catsaotsa icadaa pjiamá carrona. ¹⁰ Mitsa pifió cadaa piaca naderse, piawa naofacawa lricotoa lriapiya jliaji pirsodalri Fura, ¹¹ pjimiotsa coanca nacaitepeca, niniotsa pikjaidatacawa piinócarrona naofacawa lricotoa.'' Ikena Gedeón iawa lrirsodalri Fura iapiya, nawapacawa lricojle njaji iwapacape naofacawa lricotoa. ¹² Njaji madianitanai, amalecitanai njite njaji iofacapewa jeerri imoto kemjetewa, napakjanta jiaji jiipai ioyawaca-dalri, aimadancana cayoji tacaapa sho iorsocapewa malriitsi coa lrico. Aima tsakja njaji na-camelloni corri-perrinatsa pataita paniwetaca, ima cayocanaji caida coa sho manoá inomapi lricoperri. ¹³ Gedeón ioca cádanaco naikjaolre njaji madianitanai, jlimi pada tsolrodao icaitepeca jlitaponialre lri-kitsinda irso. Lriacope lrirso cayoji: ''Oopica njotapon, pada pan cebadape iderriñjacawa waofacawa lricotoa nacojle. Niini lrioca cádanco waofacawa lricotoa, lrioca lriñaa lrinacojle njite lripeeco jliwao capatsitam.'' ¹⁴ Niini lrikitsinda lriaco lriepani: ''Gedeón ipjeya jliarra pjitapon, jliaji Joás irri, iraelita. Dio icadaacani jliamá-carro njaji madianitanai pjiomi natsolrodaofie.'' ¹⁵ Gedeón jimi cayami jlitaponialre jliaji madianita-dalri njite coamishopacani, icaamitsa lriaca matsiadalri Dio irso. Lridiawa naofacawa lricotoa njaji Iraelnai njite lriaco narso: ''¡Jinicowa! Wa-Minalri icadaaca shaamá-carro njaji tsolrodaonai aimadan Madian lricope.'' ¹⁶ Jlienita madalripocoa naoyawaca njaji treciento-dee, njite lria narso nacoanaa na-trompetaniwa, njite yaaropetida meetadapemtsa, njite pada lamparina nawawalricopetsa njaji yaarropetida meetadapem. ¹⁷ Njite lriaco narso: ''Icapa iicao njoa inaitjá-carro cayoji nonaotja capisho. Icapaotsa nocacawa naofacawatoa pemajle njaji wacoema, inaitja tsakjaotsa cayo. ¹⁸ Njite nopjia cádanacoatsa no-trompetani, njite njaji noinaiperri tsakja, ipjia tsakjaotsa iyape pjiomi naofacawa lricotoa, njiteotsa iwana: '¡Wa Minalri nacó njite Gedeón nacó tsakj!'' ¹⁹ Niini Gedeón njite njaji cien atsianai lriinaiperri naocawa nacoema iofacawa lricotoa inomapirse, deepi pamoyoa iinita cádanaco caatsa. Cayo cadana tsakja njaji iwapacape madianitanai paana-caarro jimaao iwapacana, ikena napjiaca na-trmpetani njite nabolronta tsakja njaji yaarropetida njepanda nacaapi rico. ²⁰ Njaji madalripoco inaiki napjia natropentan njite nabolronta njaji yarropetida meetadapem. Njepa njaji lamparina inarroekjete sho, njite njépa natrompetani atsialriema sho. Njite nawana cayoji: ''Dio imatsetan njite Gedeón tsakja.'' ²¹ Njite mananitsa neemacawa nacoamitsa njaji atsianai naofacawa iwaida naco njaji madianitanai.Njite pjiomi njaji tsolrodaonai aimadan madianitanai njecoa. Nawana kjaida napitocayawa. ²² Napjia cádanaco njaji trecientopi trompeta, ikena wa-Minalri icadaa madianitanai jipaca matseeta nainoacá-carro nakjoete waacatsa nakitsinda iapiya, njite nakjoete njaji tsolrodaonai aimadan tsakja. Napitoa njaji tsolrodaonai aimadan Bet Sita lricojle, Zerera ikjaolre, Abel Mehola jinaa yocacawa nacojle, tsoomi Tabat ioya. ²³ Njite Gedeón iinaica njaji Iraelnai Neftalí, Aser njite pjiomi Manasenai inakjoite-perri napineetá-carro madianitanai. ²⁴ Gedeón imeenaca iacoti naofacawa lrico njepaite rico njaji Efraí poco, cayoji: Ino nakjoete njaji madianitanai jlia-carro iwapa jliaji Ooni Jordán, teecoatsa jlinaa iwapaca Bet Bara nacojle, idaanatá carrona.'' Cayotsa nawacaacawa njaji atsianai Efraín poco nawapá-carro njaji Ooni, teeco jlinaa Bet Bara nacojle njite jliaji ooni Jordán. Niini njepaca njaji caconaaperri Madian lricope, Oreb njite Zeeb. ²⁵ Naino Oreb lrinaco jliaji jiipada najirri panaya Jiipada Oreb-dalri, njite naino Zeeb napjoacawa lrico jaicotjeda njetá-carro lriana vinoa. Naawa madianitanai shaapodam, njite nadeeca Gedeón irso Orb njite Zeeb jidawidam, njaji corri perritsa iyoeta nainai Ooni Jordán.