¹ Njaji inaiki Irael lricoperri nanaitja maatsi Dio ipeyajle njite lricadaana madianitanai icaapi rico siete walria icoa. ² Kjaidaperrica njaji Madian lricoperri niini namatsiketa aimatsa njaji Iraelnai. Njaji Iraelnai, nafio capoa naiwana njaji madianitanai nanaitja nadawaaca arrodawa jiipana taji naco, pjiomi jalraacawa lrico nini njite coancawajle catsa tsakja. ³ Njite naapana cádanco mana napania njaji Iraelna, njaji amalecitanai, njaji madianitanai njite njaji inaiki inaiki iofacape jerri imotokemjete namatsica mana naoya njaji iraelitanai. ⁴ Nacadaa natsolrodaonai Iraelnai jipaite rico niiní namatsiketa napania iinaca naoya, cayo minitsa nanaitjaca atee lriocawa Gaza lricojle. Corrin nacadaa naijao njaji Iraelnai, corrin nacadaa naovejaniwa, navacaniwa o naorronwa. ⁵ Nanoca icoami njaji madianitanai Iraelnai jipaite lricojle, navacan iapiya njite nadee naplasticon napanaita icaona, nacapa mana nanoca aimasho cayoji tacaapa aimadan iaacape sho, corrinatsa pataita paniweetaca njaji inaiki njite nacamellon tsakja. Njepa narowao jliaji jiipai namatsiketá-carron. ⁶ Madianitanai imjaidata matsiapee njaji Iraelnai, niini nawanaca Dio ikjaolre njaji Iraelnai. ⁷ Nawana cádanco Dio ikjaolre njaji Iraelnai madianitanai ikjaote, ⁸ wa-Minalri imeenaca pada inoparrotacada iraelitanai irso: ''Cayo lricaiteca irso jliaji wa-Minalri, naDiote njaji Iraelnai: 'Njota shaa Egipto lrikjoite, njerrapitetacawa lrikjoite pia shaa. ⁹ Nomanacota shaa Egiptonai icaapi rikjoite, naoya tsakja njaji jirrapitetacape shaa pekirritsa. Njotana njepaite ioya nocadaa-carro irso njepaitemi. ¹⁰ Noaco pia irso: ''Icatsa Iminalri Dioca njoa; nonaa piaca shaa wadee iaca matsiadalri nadiote irso njaji amorreonai, njaji iofaji iinai njepaite rico.'' Mitsa corrim jiepa noaco.'''' ¹¹ Jliapodamjite lrino lriofawa jaico macani iapjite Ofra lrico jliaji wa Minalri iangeleni. Jliaji jaico, Joás, Abiezer lricoda lriyada piacani, njite cadana Gedeón, Joás irri, lriñaaca trigo jiipai nacojle lricakjaa carrona, anjí napitsioca cawa lrico jaico tjeda nanaitjashopa vino, lridawá carrona naoya njaji madianitanai. ¹² Niini wa-Minalri iangeleni imoto lrikjaolre, lriaco lrirso: ''¡Pinai catsa wa-Minalri, pjia oowi kjaidete.'' ¹³ Niini Gedeón iaco lrirso: ''Pjia, no-Minalri; wainai cadaa wa-Minalri, ¿Coada tsakja cayo faaji? ¿Kjrrena njaji pjiida inaitjacape manaitja canaaperri, nacaiteji nama femio njaji fanirrinaipemi? Nacaite cádanaco cayoji: 'Wa-Minalri jita pia faa Egipto lrikjoite.' Mitsa panaya oopi Lrimaca faa njite Lricadaaca faa madianitanai icaapi rico.'' ¹⁴ Wa-Minalri icapa lrirso njite lriaco lrirso: ''Warsena piawa lrisho jliaji jiidati pirsorina. Pinacota Iraelnai naoya njaji madianitanai. Njoa imeenaca pjia.'' ¹⁵ Njite Gedeón iaco lrirso: ''¿Coajetja No Minalri notaita noyomjetaca njaji Iraelnai? Picapa, njaji nopaneeta nanakjoite njaji Manasenai ikatsa njaji mjaidaperri pjaaca naoya, njite midalrim catsa njoa njonirri ikitsiñape nakjoite.'' ¹⁶ Njite wa-Minalri iaco Gedeón irso: ''Njoa tsaotsa piinai, njite pjiametacaotsa njaji tsolrodaonai aimadan Madian lricope cayoji pada capishotsa tsolrodao.'' ¹⁷ Gedeón iaco lrirso: ''Matsia cadatsa pjimica norso no-Minalri, picadaa peda noajii-carro pjiaca jliaji caalri norso. ¹⁸ Pinaitja matsiacalri, maatsaotsa ajaiteji, atee kjerreca nodia noocawa piderse njite nodeecaotsa noinai paana inaaniti macoadaperritsa nocadaa-carro pirsona.'' Niini wa-Minalri iaco lrirso, lriwapacaotsani atee kjerreca lridia lriocawa liderse. ¹⁹ Njite Gedeón iawa lrimatsietá-carro lrijao apana cabra ienipe, njite apana tambor ioya irsocada vetido kilo icoa harina, lrinaitja peetje meewidalritsa. Lricadaa lriipe walrayaita lric, lricadaa lriana palangana lrico njite lrideena wa-Minalri irso lriwapalri niini jaico macani iapjite. ²⁰ Njite wa-Minalri iangeleni iaco lrirso: ''Pjipa nja ipeti, njite jliaji peete mewitetsa picadaa carrona lrinaco jliaji jiipada macani, njite piarroatsa lrianaa nanaco.'' Njite Gedeón inaitja cayo. ²¹ Niini jliaji wa-Minalri Iangeleni imawatacana jaicoapo jiwidana sho jlipanda lricaapi rico. Lrisho jliaji jaicoapo linota njaji ipeti njite jliaji peete meewitetsa; ikena tiyee imotocawa jiipada lrikjoite lrimjaitá-carro njai ipeti njite jliaji peete meewitetsa. Icaamitsa wa-Minalri Iangele iawa Gedeón ioya njite corrinatsa lripieta lricapacani. ²² Niini Gedeón iajíi wa Minalri Iangele-cani. Njite Gedeó icaite, ²³ ''¡Pjia No-Minalri! ¡Nocapjen dekja jliaji wa-Minalri Iangeleni notjisho catsa!'' Niini wa-Minalri iaco lrirso: ''¡Pimaodacatsao! Mafiotsawa, corriotsa mayam carroca pjia.'' ²⁴ Gedeón inaitja apana altar wa Minalri irso niini. Lricadaa lriipitanawa niini, ''Imaodaca kjetica jliaji wa-Minalri.'' Panashete toa niini catoa jliaji altar Ofra lrico, icatsa naofacawa njaji Abiezer ikitsiñape. ²⁵ Jliadaa deepica Dio icaite lrirso: ''Pjipa pjinirri itoron, njite jliaji yaamanashopa toro irsocada siete walria, njite pipeecoatsa jliwao jliaji Baal ialtarni pjinirri irsolri, njite piyoawatsa jliwao jliaji jaico iemalri lricodapi naacarrona matsiadalri rorso rsoaji nadiote Asera. ²⁶ Pinaitjaotsa apana altar pi-Minalri Dio irso lri-ricodatsa jliaji nadawaaca-carroda lrico, pinaitjaotsa matsiani. Njite jliaji yaamanashopa vaaca atsiana pjipa pimjaitani matsia ofrenda sho nashotsa njaji jaico piyoaji Aasera iyapepem.'' ²⁷ Niini Gedeón idee die lrirsoperri njite lrinaitjatsa cayoji wa-Minalri inaa capishoni. Mitsa lrifio capoa naiwana njaji lrikitsiñape jlinirri iipaneta, njite naoya njaji inaiki lriyacalre ricope corrin lrideji jaalrewerrico, mitsa lrideji deepi rico. ²⁸ Piyompinacojlena nacafia cádanaco njajii inaiki yacaalre ricope, nacapa jiwacadamitsa Baal ialtarni, njite acapa naocanamitsa jliaji jaico Asera iyarrona yemalri pia lricodapitsa, njite nacapa jliaji vaaca atsiana yaamana shopa namjaitanda lrinaco jliaji altar nanaitjanda. ²⁹ Niini njaji inaiki yacaalre ricope naaco narsowaaca: ''¿Cocapa jliaji inaitjalri cayoji?'' caaco cayami naapiyawaacana najíi-carro kjaiterrica jliaji inaitjalri cayo, naaco. ''Gedeón, Joás irri jliaji inaitjalri cayo.'' ³⁰ Njite njaji inaiki yacaalre ricope naaco Joás irso: ''Pimotoita pienipe wainí carroni, ima lripeecoca jliwao jliaji Baal ialtarni, lrioca tsakja Asera jiecolre yemalriwa lricodapitsa.'' ³¹ Mitsa Joás iaco narso njaji yaalri lrikjoete: ''¿Capja inoacacaotsa Baal ikjaote? ¿Capja shaa caotsa iyomjetani? Coca cadaa iawa Baal iinai, mayamicaotsana lripjetoatsa jaalrecani. Ajádalri cadaa Dioca jliaji Baal, icadaa jliwaca carrotsa idanataacawa ima pada ipeeco lri altarni jiwao.'' ³² Niini jliadaa pia nacadaa Gedeón iipitanao ''Jerobaal,'' ima lriaco cayoji: Gedeón ipeeco capoa Baal ialtarni, icadaa Baal carrotsa inoacawa Gedeón ikjoete. ³³ Niini pjiomi njaji madianitanai, amalecitanai, njite njaji inaiki iofacapewa jeerri imotokemjetewa nayoeta jliaji ooni Jordán njite naatoa naofawa jiipai ioyawaaca cawa Jezreel-dalri. ³⁴ Mitsa Dio Icaolrini iorroco Gedeón naco. Gedeón ipjia trompeta lriwaná-carro njaji Abiezar iipaneta naacarro lriinai. ³⁵ Lrimeenaca atsianai nacaitecarro njaji Manasenai pjiomi naacarro tsakja lriinai, njite naaca lriinai. Lrimeenaca tsakja yaacoti Aser poco irso, Zabolón poco irso, njite Neftaló poco irso tsakja naacarro lriinai, niini nacawa lrikjoete naacarro lriinai. ³⁶ Njite Gedeón yaaco Dio irso cayoji: ''Piomacadaa pimanacotaca njaji Iraelnai nonakjoite, cayoji picaite capisho njoa, ³⁷ niini norsoeta caotsa oveja iyami irsocada aima lriiyo jiipai rico. Niini piyompinacojle nocapa cadaa potsiaca jliaji oveja iiyo tsa, njite corrin potsiaca jiipai, nini noajiwatsa piomaca njoa nomanacotá-arro njaji Iraelnai cayoji picaite capisho njoa.'' ³⁸ Njite cayotsa jliyapacawa lricaite capishotsa. Tjewaijle piyompinacotoa Gedeón icafiawa, niini jlipa lripitsioca jliaji oveja iyam keyomaki, niini deepi itiñajleca imotaca lrioya wadeepe lripakjantaca paapi palangana. ³⁹ Njite Gedeón iaco Dio irso tsenakja: ''Merroa tsenaotsa pjia nokjoete, ima caacoca tsenakja njoa pirso. Picadaa nocapa carro papienatsa oveja iyam sho tsenakja noajíi-carro matsia. Mitsa panaya corriotsa potsiá carroca tiñajli sho deepi rico jliaji oveja iyam keeyomaki, mitsa potsiacaotsa dekja pjomi jiipai lriwaida naco. ⁴⁰ Dio inaitja lrirso jlia deepicani cayoji lritatjá capisho Lriinai. Corrin potsiaca jliaji oveja iyam keeyomaki, mitsa potsiaca jliaji jiipai lriwaida nacó.