¹ Jliadaa pia jalredaoca Dévora njite Barac, Abinoam irri, nacanta pia jliaji canción: ² ''Matsiadalrica pjia wa-Diote ima njaji Iraelnai iapiyawalre nacaite nainoacacaotsawa, njite njaji iraelitanai pomena naaca nainoacawa nainai. ³ Jimi shaa talricanaatinai, iwapa jimi matsia shaa iwapacape yacaalre. Nocantaca wa Minalri irso; noaca matsiadalri no-Minalri irso, Iraelnai iDiote. ⁴ No-Minalri, oopi pia Pimoto píno Awacada Seir lrikjoite, Pino caojli pia njepaite rikjoite njaji edomitanai. Jliawajli pia canani jliaji jiipai, canani tsakja njaji eenocoma; njite ooni yarrowa iyadaoca yooya. ⁵ Cananica njaji jiipana nacapa cádanaco Dio yeecoa; canani tsakja jliaji jiipana Sinaí lricapa cádanaco Dio yeecoa, na Diote njaji Iraelnai. ⁶ Samgar jiawajli pia, Anat irri, Jael jiawajli pia, namaca njaji inipo njeyapacawa pjiomi, njite njaji aimadan yaajicapewa-mana corritsa naaca lri ricoda icaamitsa naacawa inipokjape rico nayofiá-carro lrioya. ⁷ Tsopienatsa njaji oowinai Irael rico, njite nocaketsawa, njoa Dévora, njoá-carro iajii nanaco, cayoca njoa narso njaji iraelitanai njadoa sho. ⁸ Njite naniwa cádanaco narsowao pada nadiotewa njaji iraelitanai, ikena niinica oowi yacaalre ipananoma lricotsa, njite corrin lricoaca narso nadanaita njite namolroconiwa njaji coarenta mil iraelitanai. ⁹ Catiima nocapaca narso njaji comandantenai Irael lricope, njite njaji icadaaca capewa njawacatsa, wacaite matsia Dio irso nanaco. ¹⁰ Iwaopia nanaco njaji nocaiterri, pjia iajicadawa borro jaalreni naco, pjia yofacadawa yamacatiita nacotsa, njite pjia iajicadawa pjiipa shotsa inipo lrico. ¹¹ Jimi coanca nacantaca njetacawa lrico ooni njetanda naoya. Nacaiteca coanca Dio inaitjaca narso matsia, coanca njamaca nacoema njaji kjenaperritsa Iraelnai ikjaote. Njaji Dio inaikite aimadan naorrocoa yacaalre ipananoma lricojle. ¹² ¡Picafiawa, picafiawa, Dévora! ¡Picafiawa, picafiawa, picanta apapeco canción! Pjinicoa Barac, pjipá-carro pirsowao njaji picoema, pjia Abinoam irri. ¹³ Icamina naorrococawa njaji Iraelnai nainoacá-carro nakjoete njaji kjaidaperri; naawa noikjaote njaji aimadan Dio irsoperri nainoacá carro nakjoete njaji atsianai kjaidáérri oowinai. ¹⁴ Náno Efraín lrikjoite njaji iofacapewa Amalec lrico; njaji Benjamín poco naawa shapodam. Naawa Maquir lrikjoite njaji picomandantenaipe, njite Zabulón nakjoite naawa njaji iwapacaperri yacalre. ¹⁵ Njite njaji caconaperri Isacar lricope naawa Dévora iinai, njite nja paana Isacar nakjoitepe naawa tsakja Barac iinai, naawa lriinai jiipai yoyawaaca cawa njite jliaca iajíi nanaco.¡ Ajádalri! Niinica tsolrodaonai kjaidaperri oowi icaona nanakjoite njaji Roben poco corri perritsa ifiowa. ¹⁶ ¿Njite coada corrin iawa ikitsindata faa? Ima iofaa catsa waoya jimí-carrotsa coanca nawanaca na ovejan njaji iwapacapena. Njaji atsianai kjaidaperri Robén poco inakjoitepe corrin naa nakitsindatana, icaamitsa naofacawa naapana lrico njemí-carro icantacape. ¹⁷ ¿Njaji Galaad poco, atsa naofawa Jordán pemajletsa; njite njaji Dan poco, naofawa nawaopiakje inonadalri yaapiyatsa natan icodapitsa? Njaji Aser poco, atsa naofawa ooni yaalrapi ricotsa, njite naofawa tsoomi inipjioda ioya. ¹⁸ Njaji Zabulón poco, icadaacacapewa corri-perritsa ifiowa atee naino cadantjana, cayo tsakja njaji Neftalí poco, naacadanaco nainoacawa oowi rico. ¹⁹ Naocawa njaji talricanaatinai nainoacá-carro; njaji talricanaatinai Canaán lricope nainoacawa Tanac lrico ooni Meguido icodapi. Mitsa corrin nadee narsowao napalraatani. ²⁰ Naorrocowa eeno lrikjoite njaji jiwirsida nainoacá-carro, naapowa lrikjoitetsa eenolrikjoite nainoacawa Sísara ikjoete. ²¹ Jliaji Ooni opikaitsa Cisón, oopi lripiyona, jliaji Ooni Cisón. Noaco nocafica irso, warsa pikjaidatacawa piá carro pipeyajle. ²² Njite icaamitsa kjemaca njaipacoda njaji caballo ipitocape, njaji caballo kjaidaperri, Sísara iyaape oopi napitowa. ²³ ¡Caaco maatsi Meroz inaikite ikjoete! lriaco jliaji wa-Minalri iangeleni, ima corrica naoma Dio ikitsindatana, Lrikitsindatá carromtjana nainoacá carroa nakjoete njaji oowinai kjaidáperri. ²⁴ Matsiadarro dekja rsoaji Jael naoya njaji apjetsida inaitjepe, Jael, Heber Querinita dalri iino, icatsa rsoaji maatsiadarro pjaaca naoya njaji apetsida inaitjepe nanakjoite njaji iofaacapewa pantita lrico. ²⁵ Jliaji atsia lritatja roinai ooni njite roaca lrirso iniati; rodee lrirso mantequilla parrato lrico, naijácarroapi rico njaji caconaaperri. ²⁶ Rsopa rocaapi sho jliaji jaicoapo ropanaita lricoda, njite royekema-sho rsopa lri-martillon jliaji idejicaa; lrisho jliaji martillo roñaa Sísara jiwida naco njite romatsiketaca jliwida. Robolrontaca jliwida paitapena roñaa cádanaco jliwida iparrema naco. ²⁷ Lria daimini rsoipa icodapi, icatsa jliwaca lriorsoawa niini. Jliwa pokjonwa rsoipa icodapi. Jliwacawa daimi, icatsa mayamica niini jliaji roinonda. ²⁸ Pemajle ventana ioya rocapa, Sísara jidoa icapa panti idanaita ipecolrico njite rowanaca inonacalri rico, ''¿Coadapa wiacalretsa lrinoca Sísara yaapiya jliaji lriajicarrofia? ¿Coada corrin kjeya lriocawa panti ricojle? ²⁹ Njite njaji inaitjepe cajikjeperri icaitecape iacoti narso, naaco njeepacano cayotsa rocaite capisho: ³⁰ ¿Corricapa naoketa nanaanipem cacoadaperri naacarro narsowaca? ¿Apama, o yaamama inaitjepe nacoanaa narso njaji atsianai, njite Sísara irso njaji yamacati nadatanda matsia, njaji yamacati nadatanda matsia naoconda matsia inomaakja, njite yamapoco yamacati nadatanda matsia naoconda inomaakja narsowajle njaji iñaitocapena napapí-carro nawedalrico? ³¹ Niini mayamicaotsa pjiomi njaji picoema, ¡NOMINLRI! Mitsa njaji pikitsindaji cayocana irrirriapji-sho kjaidaperri cádanacoena-na'' Njite jliaji jiipai naofaa namaodaca coarenta walria icoa.