¹ Mayami cayami Aod, njaji Iraelnai napieta tsenakja nanaitjaca maatsi Dio ipeyajle. ² Niini Dio icadaana Jabin icaapi rico, Canaán italricana, italricanatacada Hazor rico. Sísara pia lriipitana jliaji lritsolrodaonai icapitamani, Sísara irsodalri, iofacada Haroset Goyim rico. ³ Njaji Iraelnai nawana kjaida Dio ikjaolre lrikitsindatá-carrona, ima Sísara irso piaca noveciento carretafiape nanaitjaji tsipalrasho minitsa, njite jlirrapitetapiena aimatsa njaji iraelitanai vente walria icoa. ⁴ Njite cadana Dévora, apama inoparrotacada, Lapidot iino, icapiatsa rsoaji icaitecada iapiwalreca nanaco njaji Iraelnai jliawajli. ⁵ Dévora ipeyo mana iofacawa yaaawapi iapjite rocadanda iipitanao Dévora tsakja, iemalriwa Ramá njite Betel ioyawaaca, awacada cawa nayacalre rico njaji Efraín poco. Njaji Iraelnai naamanawa roikjaolre matsietá-carro iacoti narsonda nakjoetewaca. ⁶ Romeenaca naacarro naoma rorso Barac, Abinoam irri, Cedes irri Neftalí rico. Njite roaco lrirso cayoji: ''Cayo lrinaa pinaitjaca jliaji wa-Minalri, na-Diote njaji Iraelnai, ''Piawa lrinacojle jliaji Awacada Tabor, pideotsa pikitsiñapewa die mil atsianai Neftalí poco inakjoite-perri njite zabulón inakjoité-perri tsakja. ⁷ Ima Nodeecaotsa Sísara, Jabín itsolrodaonai icomandanteni, lriá-carroatsa pikjoete, njite ioketaacacaotsawa ooni Kishon naco, lrideewatsa njaji carretafiape njite njaji lritsolrodaonai aimadan, mitsa nocadacaotsa pjiácarro shamani.'' ⁸ Njite Barac iaco Dévora irso: ''píno cadaotsa noinai, noawatsawa, mitsa corricadatsa píno noinai, cotsa noá carrocawa.'' ⁹ Niini roaco lrirso, ''ajádalri noacaotsa piinai, mitsa corriotsa pjiá carrocaotsa idee jliaji matsiadalri lrikjaote jliaji wanaitjalriotsa, ima jliaji wa-Minalri lricadaaca Sísara inarro icaapi rico.'' Ikena Dévora jinico iawa Barac iapiya Cades ricojle. ¹⁰ Barac iwana atsianai Zabulón poco inakjoite-perri njite Neftalí inakjoite perri naa-carro pacoacawa Cadaes ricojle. Die mil atsianai iawa lriinai njite Dévora iawa lriinai. ¹¹ Njite Heber, Quenita-dalri, jlienaca naoya njaji Quenita ricope, icaóiatsa njaji Hobab inakjoite-perri, Moisé iñjawerri; lrinaitja lripanaitawa apana jaico macani icodapi Zaanain rico, tsoomi Cades ioya. ¹² Njite nacaite cádanaco Sísara jimio opica Barac, Abinoam irri iawa Awacada Tabor lricojle, ¹³ Sísara iwaketa pjiomi njaji lricarren tsípalra fiape, noveciento namaimaca padenirri, njite pjiomi njaji tsolrodaonai lrinaiperri, Horoset Goyin nakjoite atee Ooni Cisón nacojle. ¹⁴ Dévora iaco Barac irso: ''¡Warsena piawa! Ima icatsa jliadaaca jliaji wa- Minalri icadaacawa pirso pjiamá-carro Sísara.'' ¿Capja corrica piajíi wa-Minalri catsa jliaji waapiyawalri?'' Ikena Barac iorrocowa Awacada Tabor nakjoite njite die mil atsianai iawa jliapodam. ¹⁵ Wa-Minalri imanalrieta nawaopiakje njaji Sísara itsolrodaonai, cayo tsakja njaji carreta tsipalra fiape nacope, cayo minitsa pjiomi njaji Sísara itsolrodaonai iacape njaipa shotsa. ¹⁶ Mitsa Barac ipineta njaji carreta tsipalra fiape, njite njaji tsolrodaonai aimadan Haroset Goyin nacojle, njite pjiomi njaji Sísara itsolrodaonai aimadan, Barac iinona matsetasho, corrin caafi pada nanakjoite. ¹⁷ Njite Sísara ipitowa jlipashotsa Jael ipanaita lricojle, Heber, Quinitadalri iino iderse, ima corripiaca maatsi naapiyawaaca Jabin, Hazor italricanaa, Heber, Quinita dalri iipaneta iapiya. ¹⁸ Jael imotoa rocoadatá-carro Sísara, roaco lrirso: ''Pinoena noderse, pjia icanantacaita njoa, mafiotsa pinoca.'' Ikena lriacawa roderse, jliewa ropanaita lrico, njite roñampani pamaca pájleti sho. ¹⁹ Sísara iaco rorso, ''Pinaitja matsiacari, pia noirrawa ooni, ima meetaca nocaolre.'' Niini romjeco rodejicarroda vaaca inia maaficalri iyam rico roá-carro lrirrawa, njite rodia tsenakja roñampani. ²⁰ Njite lriaco rorso: ''Piemaotsa piwapa pipanaita ipananoma lrico. Pada ínocadaa, njite lritatja jlimio aacada pada piinai, picaiteotsa corrica pacapa pada.'' ²¹ Njite rsoaji Heber iino Jael, rsopa apapo jaico ropanaita nacoda, pada martillo rocaapi rico njite roawa dawacalri ricotsa Sísara ikjaolre, ima Sísara imaaca daimi, ikena roñaca martillo-sho jaicoapo jiwida naco jliewa-carro Sísara jiwida-lrico, jliyapa pemajle, niinitsa mayamini. ²² Barac ipineta cadana Sísara, niini Jael imoto icoadatan, roaco lrirso: ''Pino noinai nocañjatá-carro picapa jliaji atsia piajirri pioma.'' Icaamitsa Barac iacawa roinai, njite lricapa Sísara mayam-dalrimitsa lrisho jliaji jaico sheewalri jliwida lrico. ²³ Jliadaa pia Dio shameta Jabin, Canaán italricanaa, nacapatsa njaji iraelnai. ²⁴ Ikena kjaida pjaaca njaji Iraelnai Jabin ioya, Canaán italricanaa, atee naa nataitani.