¹ Dio icadaa njaji apaana inaiki lriwishopa njaji Iraelnai, najii corriperri inoaca-piawa oowi rico canaán lrico, najíiwatsa coanca oowicalri. ² Dio inaitja cayo lricanantá carrona oowicalri naco narso njaji Iraelnai inakjoite perri corriperritsa ianjíi coanca oowicalri-naco. ³ Icatsa njaji apaana inaiki iofalriwa macacoepe rico yacaalre: njaji cinco talricanaatinai filisteo, pjiomi canaan lricope, sidonionai, heveonai njaji iofani piawa awacada naco Libano lrico, Baal Hermón iawacadate nakjoite Lebo Hamat nacojle. ⁴ Dio-tsa icadaa njaji apaana inaiki nacodapitsa Lriwishopawa njaji Iraelnai, Lricapa carrocatsa njeepaca njaji lriaco Lricadaji narso njaji naferrinaipemi Moisé nakjoite. ⁵ Niini njaji Iraelnai naofacawa napecolrico njaji cananeonai, hititanai, amorreonai, ferezeonai, heveonai, njite jeboseonai. ⁶ Njeta naninaiwa iraelitanai itonaipe, njite nacadaa tsakja naitonaipe iraelitanai irrinonaiwa, njite nadeji pacoaca nadiote irso. ⁷ Njaji iraelitanai nanaitja maatsi Dio irso, njite namaodaca na-Minalri Dio ioya. icaamitsa naaca matsiadalri Baalnai irso njite Asera irso tsakja. ⁸ Cayoshopa Dio iiroa ipojliawa Iraelnai ikjoete, niini lrivendena lrirso jliaji talricanaati Cusán Risataim, Aram Naharaim italricanaa. Njaji Iraelnai nadejica Cusán Risataim irso ocho walria icoa. ⁹ Njiite nawana cádanaco Dio ikjaolre njaji iraelitanai, Dio icadaa-mana pada ikitsindatacada njaji iraelitanai, icatsa jliaji imanacotalri-mananaa: Otoniél, Quenaz irri, jliatsa jliaji Caleb iwerri. ¹⁰ Wa-Minalri Icaolrini ikitsindatani njite lricadaa lrirso lriajíi-carro coancarro naapiyalrecan, icatsa jliaji icaiterrica Iraelnai nacó, njite lriámanawa oowi ricó. Dio icadaa jliamá-carro Cusan Risataim, Aram italricanaa. ¹¹ Coarenta walria naofawa namaodacatsa njepaite rico. Mitsa mayami naoya Quenaz irri, otoniél. ¹² Otoniél jiapodami, njaji iraelitanai napieta tsenakja nanaitjaca maatsi Dio irso, Njite Dio icadaa kjaidaca Eglón, Moab italricanaa, jlia-carro iajii nanaco njaji iraelitanai. ¹³ Eglón ioma lrikitsiñapewa njaji amonitanai njite njaji amalecitanai, niini naaca nainoacawa iraelitanai ikjoete njite njaamana, Njeta naoya pjiomi njaji Yacaalre Yaacoa lricoperri (Jericó). ¹⁴ Njaji Iraelnai nadeji Eglón irso, Moab italricanaa, dieciocho walria icoa. ¹⁵ Nawana cádanaco Dio ikjaolre njaji iraelitanai, wa-Minalri icadaa narso ape ikitsindatacaodana, lricadaa Aod, Gera irri, pada nanakjoite-dalri njaji Benjamín poco, ape atsia caatódalri. Njaji Iraelitanai nameenacani Eglón iderse, Moab italricanaa, lridee njaji nacaoñaacashopawa lrirso jliaji talricanaati. ¹⁶ Aod inaitja lri-matsetaniwa yameemá-dalri iema, irsocada yamaita pacaapi jliwalripaca; njite lripapini lricotsipa-nacó atsialriemjete lri tsayan iapjite. ¹⁷ Lriá njaji palraata nacaoñaaca shopawa lrirso jliaji Moab italricanaa Eglón, njite pekirri cadanetsakjani. ¹⁸ Aod iaa cayami jliaji palaraata nacaoñaca shopawa, lridia lrimoto nainai njaji ideecapem njaji palraata. ¹⁹ Njite Aod ioca cádanaco nanaitjacawa njaji idolonai, tsoomi gilgal rico, icaamitsa lricabocowa jliapodamrsewa njite lriaco talricanaati irso cayoji: ''Norso pada iacoti pirsowalri corridalritsa coca itaita iajiica.'' Njite glón imacoitaca njaji lrinaiperri njite namotoca lrioya lriofacawa lrikjoite. ²⁰ Icaamina Aod iawa lriderse. Jliwaketsa iofawa jliaji talricanaati lriofacarrotawaje rico jlipacawa japerri yamacoma naco lriipana. Aod iaco lrirso: ''Norso pada iacoti Dio inakjoite-dalri pirso.'' Niini jliaji talricanaati jinico yemawa lriofacarroda ioya. ²¹ Aod jipa inarroema-sho lrimatsetan lricotsipa atsialriema nakjoite-dalri, njite lritoda talricanaati lrisho. ²² Lritoda kjaidani atee lricawana jiewani, niini lrimotoca jliaji lritodashopani jliawa pemajle, niinitsa lrimacan lrinaco. ²³ Icaamina Aod imotoca njiteo, lriita taimi lripananoma lrimoto cádanaco njiteo. ²⁴ Aod idia cayamiwa, njaji talricanaati irsoperri nawa lriderse; njite nacapa taimica jliaji pantinoma, niini nawaopiaca: ''Paji matsiaca lriajíi jlipaca japerri lriwafeta carroda lrico yenon.'' ²⁵ Mitsa wiaa cayamina, njetena caolre ima nacaite corrica nanaitja capisho nadejicalre, ima corricatoa talricanaati imjecoca jliaji lriwafetacarro tawajle ipananoma. Niini njepaca njaji tsaawi namjecó-carro jliaji pantinoma, namjeeco cádanaco, nacapa natalricanaa iorsoawa jiipai naco mayandalriminatsa. ²⁶ Nawapa cawiaca toa njaji lrirsoperrimi, natatjacawa coancaotsa nanaitjaca, Aod ipito naoya njite jliyapa njaji nanaitjacawa idolonai, jiipada nayoaji. Cayotsa lriptocawa, lriawa Seirat lricojle. ²⁷ Lrioca cádanco nirseo, lripjia kjema trompeta awacada cawa lrico, njepaite njaji Efraín poco. Niini njaji Iraelnai iofacapewa jiipana taji nacó naaca lriinai, njite jliaca iajíi naapiya. ²⁸ Aod iaco narso: ''Íino njoapodam, ima icaminaotsa wa Minalri jiametacaotsa njaji icoema Moab lricope.'' Naawa jliapodam njite naawa Jordán yalrapi rico, moabitanai icoemjete, corrin nacadaa pada iyoetaca jliaji ooni. ²⁹ Jliawajli pia wadeepe nainoca die mil atsianai moabitanai, pjiomi piacana atsianai kjaidaperri, mafiocaperritsa. Corrin yoomje pada nanakjoite. ³⁰ Icapiena jliadaa, njaji Iraelnai yapirsetaca njaji moabitanai jiidati rico. Njite cochenta walria icoa lriwafetacawa jliaji njepaite. ³¹ Njite Aod jiapodamdalri, Samgar nakja jliaji icaitecada Irael nacó, Anat irri, icatsa jliaji iinolri-piaca seiciento atsianai filisteonai jaico nawititashopa vaaca iipe. Lrimanaco tsakja Irael cafainadalri ioya