¹ Dio iangeleni íno Gilgal lrikjoite Boquim lricojle, lriaco cayoji: ''Njotana Egipto lrikjoite, njite nodeena lri-ricoda jliaji jiipai nocaiterri pia yaacoti ajádalri narso njaji jinirrinaipemi noacaotsa narso. Noaco tsakja narso: ''Corriotsa noyoaca ioya jliaji yacoti norsolri iinai.'' ² Corriotsa inaitjá carroca yaacoti naainai njaji inaiki yofacape lri-ricoda jliaji jiipai. Irsotsa ipeecoca njewao njaji altar narsolri. Mitsa corrin jimica noaco. ¿Cocao jliaji inaitjalri? ³ Niini cayo noaco panaya: ''Corrinatsa Nopeecó carroca ipeyajle njaji cananeonai, nocadaotsana irso cayoji doowrri itoda capisho paparrema naco, njite njaji nadio, cayocaotsa irsona tooda sho pacadaji copje ipiá.'' ⁴ Niini caaco cádanaco njaji yaacoti jliaji Dio iangele narso njaji Iraelnai pjiomi, njemata kjaida njaji inaiki aimadan, naiya tsakja. ⁵ Nacadaa lriipitanawa niini Boquim. icatsa nainoca maaficalri Dio irso niini. ⁶ Njite Josué imeenaca cádanaco nadiawa njaji Iraelnai; nacoamitsa nadiawa akjerreca nacadaa njepaitewa naofaa carro, nayada carroena jliaji jiipai. ⁷ Njaji iraelitanai nadeji Dio irso Josué jiawajli caafi cádanacotoani, njite caafi cádanacotoa tsakja njaji pekipenai iofaalri pjatoa Josué shapodam, njaji icapacapem njaji manaitjacanaaperri Dio inaitjalri Iraelnai ikjaote. ⁸ Nun irri Josué, Dio irsodalri, mayamini 110 walria lripekirrica naco. ⁹ Nadawani jlipaite ioyawaaca nacadanda lrirso Timnat Sera lrico, jiipai awacadacawa nayada lrico njaji Efraín poco, atsiakemjete lrirso jliaji Awacada Gaas. ¹⁰ Pjiomi njaji njaacoma, oopi mayamina nacayoshotsa njaji njanirrinaipemi. Niini pacomenakja njaji jinicolri njanirrinaipe jiapodam, njacomaca njaji corriperrinatsa ianjii Dio naco, corrin tsakja najíi njaji Dio inaitjalri Irael ikjaote. ¹¹ Njaji Iraelnai nanaitja maatsi Dio ipeyajle ima nadejica Baalnai irso. ¹² Namaca naoyao na-Milri, njanirrinaipemi iDiote, Jliaji jitalri-piana Egipto lrikjoite. Naoma narsowao njaji paanatsa dionai, njaminitsa dioca narsolri njaji inaiki naofaji ipecolrico, niini nacoajacawa naikjaolre. Cayo carroena nakerroataca Dio naikjaolre ¹³ namaca capoa Dio naacarro matsiadalri Baal irso njite Astarot tsakja. ¹⁴ Dio iirroa jinico nakjoete njaji Iraelnai, niini Lricadaacana nacaapi rico njaji inaiki iofaacape tsoomi njepaite ioya. Njaji jipacapemna oowi rico njatsa njaji iofacapetsa njepaite icodapita, Dio icadaa navendee carrona narsoperri carrona njaji apaana inaiki, niini corrinatsa nataita neemaca nacoema nakjoete. ¹⁵ Kjerrerse cadaa Irael iaawa inoacawa oowi rico, Dio iema manawa nakjoete wadee njamaca nacoema, cayotsa Lricaite capisho piatsa narso yaacoti ajádalri sho lrinaitja caotsa. Niini aima njerrapitaca pekirritsa. ¹⁶ Ikeena Wa Minalri icadaa narso jueznai, ikena njaji imanacota mana njaji Iraelnai naoya njaji yofacape njepaite icodapi. ¹⁷ Cayo cadanatsa corrin njemica narso njaji jueznai. Icaamitsa nanaitja maatsi Dio irso njite nacadaacawa cawilreperrim-sho narso njaji apada dionai naacarro narso matsiadalri. Kjeyetsa namaca naoyao cayoji njanirrinaipemi iofaa capisho pia; njaji jiepacape pia njaji Dio icaite pialri narso lriaco lrico, mitsa njaji corrin nanaitja nacayosho. ¹⁸ Dio icadaa cádanaco juez narso, Dio ikitsindata njaji jueznai lrimanacotá-carro njaji iraelitanai nacoema ioya caafi cádanco njaji jueznai Lricadaaji. Dio jimi narso njaji jueznai natatja cádanaco kjaida nama njaji jirrapitetacapena njite nainona kjaida-sho. ¹⁹ Mitsa mayami cádanaco jliaji juez, njaji iraelitanai, napieta tsenakja nanaitjaca namatsicanao matsinaa pjaa naoya njaji njanirrinaipemi inaitaji pia. Naaca njapodam njaji apaana dionai nadejí-carro narso njite naacarro narso matsiadalri. Corrin naoma namacaca naoyao jliaji nanaitjanda maatsi, tarra capoa nawaopiakje. ²⁰ Dio iirroa jinico nakjoete njaji Iraelnai, niini Lriaco cayoji: ''Corri capoa nanaitja njaji yacoti norsolri pia naapiya njaji inaiki, jliaji yacoti Nonaitjalri naapiya njaji njanirrinaipemi; corri capoa njeni noaco; ²¹ panaya nakjoite, corriotsa nopeeco carroca njaji apaana inaiki Josué imacaji mayamirri ioya. ²² Nonaitja cayo nocapá-carro njepacatsa noaco njaji Iraelnai njite nanaitjaca cayoji noaco icaite capisho cayoji njeepa capisho njaji njanirrinaipemi. ²³ Cayoshopa Dio imaca njaji apaana inaiki, jlimotoita kjeya njitena njite lricadaacana Josué icaapi-rico